Daar is min dinge so lekker soos ’n snoesige wolkombers of warm wolsokkies. Nou blyk dit hierdie wondermateriaal hou mediese voordele in.
Wol is hipo-allergeniese, antibakterieel en die beste opsie vir hitteregulering. Hier is nog drie redes waarom wol goed is vir jou:
Skoner lug
Wol help die lug suiwer hou deur allergene en besoedeling daaruit te verwyder. Dit help ook die groei van stofmyte bekamp.
Wol se veselstowwe vang tydelik die goed vas wat jou lugweë irriteer en dit word eers weer vrygestel wanneer dit gestofsuig of gewas word.
Beter slaap
As jy onder ’n wolkombers slaap, kan jy die fase waartydens jy droom en vinnige oogbewegings ervaar, verbeter danksy die hittereguleringseienskappe en gemak van die stof.
Wol beskerm teen die koue, maar op warmer aande hou dit jou koeler omdat die stof lug goed ventileer.
Wol absorbeer ook die hitte en vogtigheid van die vel wat ’n optimale slaapomgewing skep. Hierdie temperatuurregulering is veral belangrik vir pasgeborenes omdat hulle nog nie ten volle die vermoë het om hul liggaamstemperatuur te reguleer nie.
Antibakterieel
Oefenklere en sokkies van suiwer wol weerhou ook die slegte reuke van bakterieë wat met sweet vrygestel word. Die hoë vlak lanolien of wolvet in wol is antibakterieel.
Bron: Cape Wools