Gerrie Nel, het kruisondervraging van Oscar Pistorius se sielkundige gevra of die besoek aan ’n nagklub, wat tydens ’n kritieke stadium van sy verhoor gebeur het, sin maak.
(Foto: Marco Longari/AFP/Sapa)
Oscar Pistorius se besoek aan ’n nagklub tydens sy moordverhoor maak sin, het die hooggeregshof in Pretoria Maandag gehoor.
“Dit is nie wat ek sou verwag nie, maar dit val binne die kriteria – dit kan gebeur,” het Oscar se sielkundige, Lore Hartzenberg, tydens vonnisverrigtinge getuig.
Die aanklaer, Gerrie Nel, het tydens sy kruisondervraging gevra of die besoek aan ’n nagklub, wat tydens ’n kritieke stadium van sy verhoor gebeur het, sin maak.
“Wat soek u, dame?” het Gerrie gevra toe sy buk om iets op te tel.
Dit was ’n foliant, die Diagnostic and Statistical Manual of Mental Disorders V.
“In ’n toestand van hiperopwekking sou hy uitgaan en probeer wegkom van sy eie nagmerries en gevoelens om van die trauma te probeer wegkom,” het sy gesê.
Sy het in die handboek verwys na die kriteria vir post-traumatiese stressteuring, waaraan Oscar ly. Dit sluit in prikkelbaarheid en roekelose en selfvernietigende gedrag.
Op 12 September is Oscar skuldig bevind aan die strafbare manslag van sy meisie, die model en regsgeleerde Reeva Steenkamp, maar nie van haar moord nie.