Genoeg vir 4 mense
Bereiding: 5 minute
Gaarmaaktyd: 20 minute
Die appelskyfies word geurig sag gekook saam met speserye en kry dan ’n ligte amandeldegie oor.
7 Royal Gala-appels, ontstronk, geskil en in dun skyfies gesny
300 ml suiker
3 ml (ruim ½ t) fyn kaneel
knippie fyn kardemom
2 ml (½ t) gerasperde suurlemoenskil
15 ml (1 e) Calvados (appelbrandewyn) of brandewyn
4 eiers, geskei
60 ml (¼ k) fyn amandels
Voorverhit die oond tot 200 °C en smeer ’n oondvaste bak met botter.
- Plaas die appels saam met 250 ml van die suiker in ’n kastrol. Voeg die speserye en suurlemoenskil by en laat oor lae hitte prut tot die appels sag is. Roer nou en dan sodat die suiker kan oplos. Roer die Calvados of brandewyn by en giet in die gesmeerde bak.
- Klits die eiergele en die res van die suiker tot dik en romerig en roer die amandels by.
- Klits die eierwitte tot stywe punte begin vorm en vou by die eiergeelmengsel in.
- Skep die eiermengsel bo-op die appels en bak 20 minute of tot goudbruin.