“Jayde was baie, baie lief vir hom(Christopher Panayiotou),” het Cherise Swanepoel, ’n kollega en vriendin van die vermoorde Jayde Panayiotou, Dinsdagoggend in die Port Elizabeth-hof getuig.

Sy het ’n tweede keer verskyn nadat die staat versoek het sy moet oor die Panayiotous se huwelik getuig. 

Cherise het ook getuig Jayde was nie heeltemal gelukkig getroud nie en gefrustreerd. Cherise het vroeër aan die ondersoekbeampte lt. Kanna Swanepoel gesê Jayde was eensaam, maar dit is nooit ondersoek nie.

Adv. Terry Price het gesê die Panayiotou-familie het kort tevore ’n OK Grocer gekoop en dat dit harde werk sou verg om dit suksesvol te maak.

Hy het ook gesê Christopher het gereeld saans by die huis saam met sy vrou geëet. Hy sou byvoorbeeld Jayde se gunstelinggereg saamneem: ’n Chinese wegneemete. Cherise het getuig Jayde het dit baie waardeer wanneer dit wel gebeur het.

Lees ook: Jayde Panayiotou se vriendin onthou die dag wat sy verdwyn het

Die advokaat het ook gesê Christopher het Jayde na Ciprus, China, Zanzibar en Thailand geneem, en Cherise het bevestig Jayde was baie opgewonde oor die reise. Op die dag van haar verdwyning het Cherise op Facebook gesê sy was die laaste mens wat voor Jayde se verdwyning met haar gepraat het.

’n Man (43) van die Vrystaat is onder polisiebewaking in die hospitaal nadat hy sy 17-jarige dogter geskiet en toe homself gesteek en geskiet het, het die polisie Dinsdag gesê.

Die voorval het Maandagaand om 20:30 by hul huis in Leeuwenhofstraat, Hospitaalpark afgespeel, het die polisiewoordvoerder kapt. Chaka Marope gesê.

“Die man het na sy pa se huis gegaan en sy vuurwapen gesteel. Hy het toe huis toe gegaan en op sy dogter in die oprit afgekom en haar geskiet,” sê Chaka.

Die 17-jarige meisie is in die nek en linkerbobeen geskiet, sê hy.

“Nadat hy sy dogter geskiet het, het hy by die huis ingegaan en sy vrou en vierjarige seuntjie gyselaar gehou. Hy het ook verskeie skote in die huis afgevuur, maar sy vrou en seun is ongedeerd.”

Chaka sê die man het homself in die maag gesteek en die vuurwapen op homself gerig nadat hy verskeie skote afgevuur het.

Daar is met die man en sy dogter, albei in kritieke toestand, hospitaal toe gejaag. Die motief vir die skietery is onbekend.

Die polisie ondersoek ’n saak van poging tot moord, onwettige besit van ’n vuurwapen en die rig van ’n vuurwapen.

Bron: News 24
Source

Sjoe! As hy nog nie het nie kan die veelsydige Bok-speler Francois Hougaard (28) gerus by Speedo aanklop vir ’n modelkontrak.

Sy meisie, Annebelle van Heerden (23), het haar aantreklike kêrel die afgelope naweek tydens ’n luilekker swembaddag gekiek en ’n foto van hom in ’n klein Speedo gedeel. “My hart! #naweek #gehaltetyd #familiebraai,” het die skoonheid by die foto van haar liefie en ’n klein rakker langs hom geskryf.

‘n Luilekker dag vir die manne! Foto: Instagram, Annebell van Heerden

“Ons het in Augustus (2015) begin uitgaan,” het Annebell vroeër aan Huisgenoot vertel. “Ons het mekaar in ’n vriend se restaurant in Pretoria ontmoet. Ek het natuurlik geweet wie hy is, maar ek het hom nie persoonlik geken nie,” het sy verklap. ’n Vriend het hulle aan mekaar voorgestel en hulle het dadelik gekliek.

En dit lyk of dinge baie goed gaan tussen dié tweetjies . . . Die paartjie straal behoorlik op die foto’s wat hul op die sosiale media deel.

It's never easy to say goodbye Missing my beautiful lady @annebellvheerden

A photo posted by Francois Hougaard (@francoishougaard_) on Oct 17, 2016 at 8:49am PDT

Happy Birthday my love ❤️ I hope you have a beautiful day today. I wish I was with you to celebrate & spoil you today. You deserve the best baba!! I love you ❤️ @annebellvheerden

A video posted by Francois Hougaard (@francoishougaard_) on Aug 12, 2016 at 5:53am PDT

Had the best week with my love 🦁

A photo posted by Francois Hougaard (@francoishougaard_) on Jul 17, 2016 at 10:52am PDT

❤️ @annebellvheerden

A photo posted by Francois Hougaard (@francoishougaard_) on Jul 4, 2016 at 10:14am PDT

Reminiscing… Thank you for the best almost 13 months❤️

A video posted by Annebell (@annebellvheerden) on Sep 1, 2016 at 9:05am PDT

Drie mense sit buite by ’n tafeltjie: ’n pragtige seuntjie, ’n ouer vrou en ’n jong man vol tatoes en armbande. Dit lyk soos ’n normale dag in die buitelug. Tot die jong man begin praat.

“Ek moet jou iets vertel,” sê hy terwyl sy vingers soekend oor die houttafel na die seun se hande reik. Ná ’n paar sekondes neem die seun die man se hand effe onseker in syne. Wat gesê word, is allesbehalwe wat enigeen wil hoor. 

“Mammie is gisteraand dood,” sê die man. Die kind begryp nie dadelik wat gesê word nie. Die man herhaal: “Mammie is gisteraand dood, oukei?” Die vrou skuif ongemaklik rond. Die seun se mond vertrek effens en hy kyk na die twee mense by hom. “Wat bedoel jy? My ma?”

Toe die man bevestigend antwoord, is die oomblik te veel vir die seuntjie. Terwyl hy vra hoe dit gebeur het, duik hy vir vertroosting in die arms van die vrou langs hom. 

“Weens dwelms,” word hy ingelig terwyl hy hartverskeurend huil. Die vrou bly snikkend sê sy is jammer, en so ook die man. Hy klim oor die tafel en omhels almal.

Waarskuwing: Video kan sensitiewe lesers onstel

Die jong man is Brendan Bickerstaff-Clark (29) en die seun is sy seun, Cameron (8). Cameron se ma, Lacy Wood (29), is op 9 Oktober in Warren, Ohio, oorlede, in alle waarskynlikheid weens ’n oordosis heroïen. Die ouer vrou is Cameron se ouma Denise Dezee (51).

Lucy en Cameron.

Brenden het die video doelbewus openbaar gemaak. Hy verduidelik sy redes soos volg op Facebook:

“Dis vir ieder en elke dwelmverslaafde met kinders dié. Vandag moes ek my agtjarige seun vertel sy ma het weens ’n dwelmoordosis gesterf. Dit is die werklikheid . . . en die werklikheid van ons siekte. Moenie dat hierdie siekte maak dat iemand anders jou kind moet vertel jy is as gevolg daarvan dood nie.

“Dit was een van die swaarste goed wat ek nog moes doen. Weens heroïen het my seun nie meer sy ma nie. Dis nie maklik om dit te hoor nie, maar jy kan hoor wat ons sê. Kry asseblief hulp sodat ons kinders nie moet ly nie. Dis nie toneelspel hierdie nie; dis werklik. Ek het iemand gekry om dit af te neem sodat verslaafdes met kinders die erns van ons epidemie kan besef. Ek is ’n gerehabiliteerde dwelmslaaf wat nou al 94 dae lank skoon is. Deel hierdie asseblief en miskien kan jy ’n kind se ouer se lewe red.”

Luidens berigte gee Brenden toe die verslawing het ’n hoë tol geëis en dat dit sy en Cameron se lewe vernietig het. 

“Ek was meer in die tronk as wat ek kan onthou; vir goed soos aanranding, betreding en die besit van dwelms. Dwelms is sleg, sleg, sleg, en in Ohio is dit ‘n epidemie. Ek wou iets positiefs uit Cameron se ma se dood laat voortspruit.”

Volgens die Amerikaanse Sentrums vir Siektebeheer en Voorkoming sterf daar daagliks sowat 78 mense as gevolg van heroïen.

Bronne: Facebook, inquistr.com, mailonline.co.uk, wkbn.com

Sou Jayde Panayiotou die drie skote oorleef het wat op haar gevuur is, sou sy dalk nooit weer kon loop nie.

Kapt. Gideon Oliver, ’n ballistiese kundige met 17 jaar ervaring, het al meer as 4 500 sake agter sy naam. Hy het Dinsdag in die hof getuig hy het ’n verseēlde houer met bewysstukke ontvang, onder meer drie 9 mm-Parabellum-patroondoppies. Daar was ook ’n bruin koevert met ’n stukkie materiaal wat uit ’n top se rugkant gesny is.

Gideon het die misdaadtoneel op 22 April 2015 saam met a.o. Becker besoek. Hy moes foto’s uit ’n album aan die hof identifiseer. Van die foto’s is nie op die skerm in die hof vertoon nie.

Toe Gideon op 23 April na die toneel terugkeer, het hy die plek ondersoek waar Jayde se kop was. Hy het getuig hy het opgemerk die blare en grond daar lyk ongewoon. By nadere ondersoek het hy ’n koeël uitgegrawe.

Die polisieman het getuig hy sal by die laaste skoot begin en terugwerk na die begin. Die laaste skoot was die een wat Jayde se kop deurboor het. 

“Die ingangswond was voor die linkeroor. Dit het regs uitgekom, agter haar kop.” Dit was hierdie koeël wat in die grond vasgesteek het. Dit beteken die skieter was by Jayde se linkerskouer.

Gideon het uit die bank opgestaan om die hof te wys hoe die skieter waarskynlik oor Jayde gestaan het. Hy het ook aan die hof geïllustreer watter verskil dit sou maak as die skieter regop eerder as op sy knieë gestaan het.

Tydens die lykskouing het die dokter bevind daardie skoot  het Jayde waarskynlik verlam gelaat. Gideon het getuig die tweede rugskoot het Jayde in die rugstring getref.

Hy het ook gesê al drie skote is met ’n semi-outomatiese wapen afgevuur.

Die 87-jarige Doreen Mann van Southend, Essex, was vir vier dae in haar bad tuis vasgekeer. En omdat sy op haar eie bly, was daar niemand wat haar kon help nie.

Haar noodkrete was tevergeefs. Sy het boonop haar knieë gekneus met verskeie pogings om uit die bad te kom, maar haar kragte het haar in die steek gelaat.

Sy het aan die lewe gebly deur die warmwaterkraan te laat loop, water uit die kouekraan te drink en haarself in haar kamerjas toegedraai te hou. En te bly hoop dat iemand iewers gaan agterkom dat sy hulp nodig het.

Gelukkig vir Doreen het sy ‘n gereelde roetine gevolg. Dit was om minstens vier keer per week by ‘n nabygeleë restaurant, Tomassi’s, in te loer om ‘n stukkie koek en ‘n glasie wyn te geniet.

Een van die kelnerinne, Sonia Congrave (39), het besef dat Doreen nog nie vir haar gereelde soet bederfie by haar “tweede huis” ingeloer het nie. Sy het bekommerd geraak en die polisie in kennis gestel.

“Doreen is ‘n wonderlike mens,” het sy gesê. “En toe sy vir ‘n dag of twee nie ingekom het nie, het ons besef iets is fout.

Nou het Sonia aangedui dat sy gereeld by Doreen gaan inloer om met badtyd te help. Sy gaan ook vir haar ‘n selfoon vir noodgevalle gee.

En Doreen? “Ek kan nog steeds nie glo wat gebeur het nie. Ek dank die Here dat ek oorleef het.”

Bronne: presandjournal.co.uk, bbc.com,telegraph.co.uk

Huisgenoot word van jaar ’n 100 jaar oud en as deel die eeufeesvieringe het ons in samewerking met kykNET Films die romantiese drama Vir Die Voëls vervaardig. Nou is die amptelike lokprent hier!

KLIK HIER vir meer inligting oor die fliek.

Maandagoggend het sy nog ‘n Instagram-foto met van ‘n hartjievormige ring gedeel met die byskrif Maandagoggend-‘blues‘.

Dinsdag het die nuus egter gebreek dat die bekende juwelier vir die sterre, Jennifer Meyer, en haar baie bekende man, Tobey Maguire van van Spiderman-faam, se paaie uiteen gaan.

A photo posted by J E N N I F E R M E Y E R (@jenmeyerjewelry) on Oct 17, 2016 at 7:55am PDT

Die paartjie het saam ‘n verklaring uitgereik waarin hulle bevestig dat hulle na baie oorweging en sielsondersoek besluit het om nie langer saam te wees nie.

“As toegewyde ouers bly ons kinders ons eerste prioriteit en ons sal hulle saam met volgehoue liefde, respek en vriendskap grootmaak.”

Die 41-jarige Tobey en Jennifer (39) het twee kinders: Ruby (9) en Otis (7)

A photo posted by J E N N I F E R M E Y E R (@jenmeyerjewelry) on May 21, 2016 at 1:19pm PDT

Hulle het vroeg in 2003 mekaar ontmoet. Vier jaar later is hulle tydens ‘n intieme geleentheid in Hawaii getroud met net ‘n klein groepie vriende en familie teenwoordig.

Jennifer het destyds gesê dat dit absoluut die beste tyd van haar lewe is. “Ek is in die wolke. Ek gaan trou, ‘n gesin begin en ek het ‘n ongelooflike maatskappy.”

Haar ontwerpe word deur mense soos Jennifer Aniston, Drew Barrymore en Blake Lively gedra.

Tobey, wat glo onder moeilike omstandighede grootgeword het, het erken dat stabiliteit een van die groot prioriteite in sy lewe is.

“Weens die manier waarop ek grootgeword het, het ek ernstige ambisies gekoester om geld te maak, sekuriteit en gerief in my lewe te hê,” het hy in 2007 aan Parade-tydskrif gesê.

Tobey se laaste verskyning op die silwerdoek was as die skaakmeester Bobby Fisher in “Pawn Sacrifice” in 2014.

Bronne: people.com, pagesix.com

As daar nou een ding is waarvoor Charlize Theron nie bang is nie, is dit om daardie beroemde lokke met ‘n skêr by te dam nie.

Die 41-jarige aktrise is beroemd om haar blonde lokke, wat sy al in style soos ’n kabouterstyl en tuimelende golwe gedra het.

Maar sy was nog nooit bang om dinge te meng nie en sy het selfs haar hare in 2015 geskeer vir die rol van Imperator Furiosa in Mad Max: Fury Road – veilig in die wete dat dit nie ’n permanente verandering is nie.

Vir haar vertolking van Aileen Wuornos, in die fliek Monster, waarvoor sy met ‘n gesogte Oscar-beeldjie beloon is, het sy selfs haar wenkbroue afgeskeer!

“Om die een of ander rede koester ek geen vrese oor my hare nie. Ek is glad nie geheg aan my hare nie – dit is vir my opwindend om veranderinge aan te bring en ek dink altyd dat, indien ek dit haat, gaan dit weer groei, het sy skouerophalend aan Vogue.co.uk gesê.

“Die stuk waaraan ek op ’n bepaalde tyd werk, het ’n invloed op my hare.”

“Ek doen nie tonne glansryke dinge nie, dus bestaan my hare gewoonlik uit wortels wat uitgegroei het en natuurlike hare.

Wat produkte aanbetref, het ek beslis die verskil gemerk tussen formules wat sulfate bevat en dié daarsonder, dus is dit die een ding wat nie gaan verander nie – my haarprodukte moenie sulfate bevat nie.”

Charlize se foutlose gelaatskleur word ook wêreldwyd bewonder. Aangesien sy die moeder is van ’n seun, Jackson en ’n dogter, August, het die ster nie soggens vroeg veel tyd nie, dus skenk sy hoofsaaklik saans aandag aan die versorging van haar vel.

“Ek het werklik geleer om saans na my vel om te sien, dus gebruik ek soggens regtig net ’n warm waslap, borsel my tande en sit sonskerm aan. Ek bedoel letterlik en dis al,” het sy verklaar.

“Ek kan saans ’n bietjie meer doen – dis gewoonlik wanneer die kleingoed slaap en ek meer tyd het vir myself. Ek kan my nie voorstel dat ’n mens nie jou gesig saans was en ten minste twee keer per week afskilfer nie.”

© Euan Cherry/WENN.com/Cover

Ná ’n uitval die afgelope naweek by ’n hotel in Beverly Hills het die rapper Azealia Banks die akteur Russell Crowe van aanranding aangekla.

The premiere was incredible four days ago! Did anyone go last night? Thanks to @russellcrowe_fans for the picture. #manofsteelmovie

A photo posted by Russell Crowe (@russellcrowe) on Jun 14, 2013 at 8:44am PDT

Die 25-jarige musikant het die 52-jarige Gladiator-akteur op Facebook daarvan beskuldig dat hy rassistiese aanmerkings teenoor haar gemaak het en sy het glo daarop aangedring dat hy verskoning vra. Toe dit nie gebeur nie, het sy Sondagin Beverly Hills ’n klag teen hom gelê.

Volgens bronne van TMZ was Russell eintlik die slagoffer in die onderonsie. Luidens berigte het die rapper RZA Azealia na Russell se kamer geneem nadat die akteur hom vir ete genooi het. Dinge het handuit geruk toe Azealia die musiek kritiseer wat Russell speel en die akteur en van sy gaste “vervelige wit mans” noem.

“Verskeie ooggetuies” het aan TMZ gesê Azealia het Russell aangeval. ’n Ongeïdentifiseerde vrou het hom verdedig en Azealia probeer oorreed om haar vyandige houding te laat vaar. Bronne het aan TMZ.com vertel Azealia het gesê: “Julle sou mal wees daaroor as ek my glas breek, julle in die keel steek en bloed spuit oral, soos iets is ’n Tarantino-fliek.”

Sy het glo heeltyd die n-woord gebruik en toe na haar glas gereik. Dit het Russell laat besluit om haar te gryp en uit die kamer te dra. Hy het daarna glo die veiligheidspersoneel by die hotel ontbied en hulle gevra om Azealia van die perseel te verwyder.

TMZ berig ’n ondersoek het gevolg, waarna minstens vier van die gaste en ooggetuies by die ete verklarings afgelê en Azealia se gedrag as “wisselvallig” beskryf het.

RZA, wat haar onlangs ’n kontrak by sy platemaatskappy gegee het, weet glo dis Azealia en nie Russell nie wat rassistiese aanmerkings gemaak het.

’n Woordvoerder vir die akteur wou nie kommentaar lewer toe Billboard.com hom kontak nie en Azealia se oorspronklike Facebook-inskrywing is intussen uitgevee.

– Cover Media

Nog ’n terugslag het die tegno-reus Samsung getref: Die plaaslike lugdiens SAL het bekendgemaak hulle sal nie meer die omstrede Galaxy Note 7-selfone aan boord toelaat nie.

“Die besluit is om veiligheidsredes geneem en om die belange van ons passasiers en personeel en ons eiendom te beskerm. Dit raak alle SAL-vlugte en sal van 19 Oktober van krag wees,” het die lugdiens se woordvoerder, Tlali Tlali, in ’n verklaring gesê.

Dit volg nadat die nuwerwetse Samsung-model, wat in Augustus vanjaar bekendgestel is, reeds in die buiteland op sommige vlugte verbied word. Die maatskappy was in die sop nadat ’n paar gebruikers gekla het hul selfoon het vlam gevat of die battery het ontplof.

Dié fone is toe van die mark gehaal en met nuwe modelle vervang, maar die probleem duur glo voort en die selfoon bly ’n veiligheidsrisiko.

“Die Galaxy Note 7 mag nie in reisigers se besit, hand- of ander bagasie aan boord wees nie,” het die SAL gesê.

“Ons het aanvanklik net die gebruik en herlaai van hierdie slimfoon aan boord beperk, maar nadat die selfoon van die mark herroep is weens kommer oor die veiligheid daarvan sowel as besluite deur owerhede aan wie se vereistes ons moet voldoen, moes ons die foon noodgedwonge verbied,” het Tlali gesê.

Radovan Krejcir wil huis toe.

Die voortslepende sage rondom dié Tsjeggiese mafiabaas se lot het verdiep toe Eyewitness News vroeër vandag berig het Radovan wil aan sy tuisland, die Tsjeggiese Republiek, uitgelewer word.

In ruil hiervoor sal hy skuldig pleit op al die aanklagte teen hom (onder meer ontvoering en poging tot moord), tien jaar tronkstraf samelopend uitdien en boonop oor korrupte transaksies met grootkoppe in die polisie getuig.

Dié polisielede sluit die beleërde lt. genl. Richard Mdluli (voormalige hoof van die misdaad-intelligensie-eenheid) en generaal Vineshkumar Moonoo (wat destyds die leiding geneem het in die saak teen Oscar Pistorius) in. Majoor-generaal Joey Mabasa en landdros Stephan Holzen se name word ook genoem.

Radovan wil vanuit die Tsjeggiese Republiek getuig waar die nodige sekuriteit verskaf sal word – dit sal die staat baie geld spaar, skryf sy prokureur, Eric Bryer in ’n brief op 4 Oktober aan adv. Andrew Chauke, die direkteur van openbare vervolging in Suid-Gauteng.

Die staat het gevra die nasionale instituut vir misdaadvoorkoming en die herintegrasie van oortreders (Nicro) moet ’n verslag oor die moordbeskuldigde Henri van Breda indien.

Henri van Breda stap na die beskuldigde bank in die hof in Kaapstad.

Dié nie-winsgewende organisasie staan dikwels howe by om beskuldigdes te evalueer en wanneer ’n beskuldigde na Nicro verwys word, stel hulle ’n verslag saam wat aandui hoe geskik iemand is om deel te neem aan die ingrypingsprogramme wat hulle aan oortreders bied.

“Wanneer ons ’n persoon evalueer doen ons ’n volledige evaluasie wat in-diepte na die persoon kyk – sy geskiedenis (die konteks van sy gedrag) en die gedrag self.

“Ons fokus op die oorsaak van die gedrag en kyk dan na die verskeie risiko-faktore wat hiertoe bydra,” verduidelik Arina Smit, die bestuurder van Nicro se kliniese eenheid.

“Ons probeer ook verstaan hoekom die beskuldigde so optree om te bepaal hoe ons kan ingryp om te help om sy gedrag aan te pas en hom te rehabiliteer. Hoe die persoon funksioneer word ook op elke vlak ondersoek – sielkundig, wat gedrag aanbetref, sosiaal, opvoedkundig en geestelik.”

Henri en sy meisie, Daniellé Janse van Rensburg, het Woensdag saam opgedaag by die Kaapse landdroshof, waar albei aangekla word van dwelmbesit. Die saak is verlede week weens ontbrekende dokumentasie uitgestel.

Die polisie in Table View het die paartjie verlede maand vir die beweerde besit van dagga in hegtenis geneem.
Henri is oornag aangehou en op borgtog van R1 000 vrygelaat. Daniellé is op die aand van haar inhegtenisneming op borgtog van R200 vrygelaat.

Sy het glo met haar eerste hofverskyning aan die hof gesê die dagga was hare.

Henri (21) is tans uit op borgtog van R100 000 nadat hy aangekla is van die moord op sy ma, pa en broer by hul huis op Stellenbosch in 2015.

Tikverslawing vermoed
Hy het in September vir ’n voorverhoor verskyn. Hy staan onder meer tereg vir die byldood van sy ouers, Martin (54) en Teresa (55), en sy broer, Rudi (22). Die voorval het in die vroeë oggendure op 27 Januarie 2015 by hul huis op die De Zalze-gholflandgoed plaasgevind.

Voorheen is berig Henri was glo verslaaf aan tik, ’n dwelmmiddel wat dikwels met sporadiese gewelddadige gedrag verbind word.

Hy het na bewering tyd in ’n rehabilitasiesentrum deurgebring.

Sy bloed is nie ná die aanval op sy gesin getoets nie.

Narita du Toit, Henri se een tannie, het voorheen aan Huisgenoot gesê die gerugte dat Henri dwelms gebruik en in ’n rehabilitasiesentrum en psigiatriese kliniek was, is onwaar.

Die saak is uitgestel tot 11 April.

Bron: News24

Gebruik dié hoëresolusie prentjies hieronder om die Barni doen-dit-self projek in die Huisgenoot van 27 Oktober 2016 te voltooi.

Opsie 1 (links) en opsie 2 (regs).

Ons bied jou twee opsies. Opsie 1 (hierbo links) het in die tydskrif verskyn, terwyl opsie 2 pasella aanbied word. Jy kan albei aflaai as jy wil.

Laai opsie 1 in hoëresolusie hier af.

Laai opsie 2 in hoëresolusie hier af.

Dan Carter ’n verbodemiddel-verneuker? Nooit as te nimmer nie . . .

Dit was die reaksie van die meeste van die gewilde All Black-legende se menigte aanhangers toe ’n opkikkerstorm onlangs losbars. Dan en twee van sy spanmaats by die Franse klub waar hy nou steeds skitterende rugby speel, is betrek.

Die aanhangers was toe heeltemal in die kol.

Dan kon Dinsdag in die sosiale media aankondig die Franse Rugbyfederasie (FFR) het hom vrygespreek van enige oortredings wat middelmisbruik betref.

Dit volg nadat die Franse dagblad L’Équipe vroeër ’n opskudding in rugbykringe veroorsaak het. Hulle het berig Dan (34), sy voormalige All Black-spanmaat Joe Rokocoko (33) en die Argentyn Juan Imhoff (28) het ná die Franse Top14-eindstryd positief getoets vir kortikosteroïed. In dié kragmeting het hul Racing Metro-klub ’n onverwagte sege oor Toulon behaal.

Dan het nou op Instagram en Facebook verklaar: “Dis geen verrassing dat die FFR bevind het ek het niks verkeerds gedoen nie. Ek stel my integriteit en rugby s’n hoog op prys.” Hy het weer benadruk hoe gek hy oor die spel is en hoeveel hy daaraan verskuldig is. Hy het ook gesê hy sal nooit iets doen wat dit in oneer bring nie.

A photo posted by Dan Carter (@dancarter_) on Oct 18, 2016 at 2:07am PDT

Die 2015-Wêreldbeker-held en wêreldrugbyspeler van die jaar het ook almal bedank wat hom en sy vrou, die aanvallige Kiwi-hokkieheldin Honor Dillon, deur alles ondersteun het.

Dit blyk die verbode middel waarvoor Dan en sy spanmaats positief getoets het, het op heel onskuldige wyse in hul gestel beland. Kortikosteroïed word dikwels gebruik om inflammasie en gewrigspyn te behandel.

Dan en Joe se agent het vroeër gesê die twee het vir ’n voorgeskrewe behandeling “terapeutiese kwytskelding” gekry omdat hulle met ligte beserings gesukkel het. Die gewraakte middel het daarin voorgekom. Racing het verklaar die FFR-bevinding het nou bevestig nóg die spelers nóg hul klubdokter het enige reëls oortree.

Model-gesinsman

Intussen lyk dit of Dan en sy jong gesin die lewe in Frankryk geniet, te oordeel na wat Honor in die sosiale media wys en vertel. Die voormalige Black Sticks-hokkiespeler, wat al saam met Dan in onderklerereklameveldtogte verskyn het, het vroeg vanjaar wel die tonge laat klap met ’n iewat kriptiese twiet dat sy “weier om ’n skaduwee vir my man se lewe te wees”.

Maar sedertdien het sy weer talle sosialemedia-inskrywings en -kiekies geplaas wat dui op ’n meestal gelukkige huwelik en gesinslewe: van “vrolike vakansies”, skermerkelkies in Korsika, Dan wat saam met die oudste van hul twee seuns, Marco (3), deur die strate van Provence draf, en haar “ware heer van ’n man” wat ’n ou Franse vrou haar kruidenierware heelpad huis toe help dra.

Dan, speler van die wedstryd in verlede jaar se Wêreldbeker-eindstryd, het juis in ’n eerstepersoonsartikel vir ’n sportwebtuiste onthul hy het tydens sy wedloop om betyds vir daardie toprugbyskouspel van beserings te herstel begin wonder of hy moet uittree. Honor het hom omgepraat om deur te druk.

“Sy was my rots. Was dit nie vir haar nie, het ek dalk al veel vroeër my stewels weggepak.”

Bronne: Reuters, Facebook, Instagram, nzherald.co.nz, stuff.co.nz , dancarter.com

Uit ’n dokument wat Woensdag in die hof in Port Elizabeth ter tafel gelê is, blyk dit Christopher Panayiotou en sy besigheidsbestuurder het mekaar gereeld gekontak.

Volgens die telefoonrekord het hy en Estelle Burger tot en met 8 April tot drie keer per dag gekontak. Sy het dit as besigheidsverwant bestempel.

Estelle, ’n besigheidsbestuurder by Nedbank, was regstreeks betrokke by die finansiering van die Panayiotou-familie se onderneming.

Sy het ’n versoek ontvang van Phillip Vosloo, ’n vriend die Panayiotous, om Jayde se selfoonkennisgewings aan te pas sodat dit na Christopher se foon gestuur word, het die hof gehoor. Estelle het haar takbestuurder glo die volgende oggend daaroor gevra.

Op die dag van Jayde se verdwyning het Christopher en Estelle 14 keer oor die foon gesels. Volgens haar het hy haar oor transaksies uit Jayde se rekening gebel.

Die eerste oproep is ná 08:00 gemaak en die laaste een ná 16:00. Estelle het ses keer gebel en Christopher die ander agt.

Streicher Botha, ’n oudpolisieman wat nou as ’n ondersoekbeampte by Protea Coin werk, het vroeër Woensdagmiddag getuig dis deel van sy werk om indien nodig beelmateriaal aan die polisie te oorhandig.

Op 21 April 2015 het Leon Eksteen van georganiseerde-misdaad-tak hom gebel en gesê ’n vriend van hom se vrou word vermis. Hy het gesê by KwaNobuhle is geld uit haar bankrekening probeer trek.

Met sy aankoms by die betrokke OTM was verskeie polisiemanne, Jayde se pa en ’n vriend reeds op die toneel.

Streicher het glo voorgestel die polisie ondersoek ook twee nabygeleë OTM’s. Christopher het glo by die laaste OTM opgedaag. Streicher het getuig hy kon nie duidelik sien wie die transaksie by die OTM behartig het nie omdat die kameralens dalk vuil was.

Hy het ook gesê die foto wat aan die polisie beskibaar gestel is, is van die verkeerde OTM bekom; Jayde se kaart is nooit by daardie een gebruik nie.

Die tyd op die derde OTM was ook verkeerd. Streicher het dit ontdek nadat die man wat later verkeerdelik as een van die beskuldigdes geïmpliseer is, se onttrekkingstrokie gewys het daar is ’n tydsverskil van 20 minute.

Die ander foto is egter nooit van die stelsel afgelaai en aan die staat oorhandig nie. Die beeldmateriaal is ook nou nie meer beskikbaar nie. Dit word volgens Streicher net drie maande lank geberg. Hy het na bewering die ondersoekbeampte ingelig dat die beeldmateriaal te onduidelik sou wees om as bewys te gebruik en het verklaar hy het self daardie besluit geneem.

Lees ook: So is Jayde Panayiotou geskiet

Vroeër vandag

Die man wat weggehardloop het, loop sy rieme in die hof styf 

Woensdag het Ntsikelelo Gqirana in die Port Elizbeth-hof in die Jayde Panayiotou-moordsaak getuig. Hy is ’n verlangse familielid van Sizwezakhe Vumazonke, die beskuldigde wat intussen oorlede is. Ntsikelelo is ook die man wat weggehardloop het nadat Sizwezakhe in hegtenis geneem is.

Op pad daarheen het Sizwezakhe glo ’n selfoon aan Ntsikelelo oorhandig, maar gesê sy meisie moet dit nie sien nie. Hy het dit as ’n soort tabletfoon beskryf.

Die beskuldigde Sinethemba Nenembe se prokureur het aangevoer Ntsikelelo jok.

Bron: News24

Liewe genade, dis nou ’n tameletjie!

’n Lomp klant het hom onlangs op die Britse dorp St. Austell in Cornwall lelik vasgeloop. Hy was by ’n winkel wat elektroniese toestelle verkoop, maar toe loop sake lelik skeef.

Die arme ou wou nog een van die reuseskerms van naderby beskou, toe stamp hy binne drie sekondes per ongeluk vier slimtelevisies om. Meer as R85 000 se skade is aangerig. Die hele nagmerrie is op die winkel, HBH Woolacotts, se kringtelevisiekameras vasgevang.

Die beeldmateriaal wys hoe die onbekende knaap nader staan om die televisies te bekyk wat by die winkel se ingang uitgestal is. Toe hy op sy knieë voor een van die stelle neersak, waarskynlik om óf aan die geboë skerm te raak of dalk die beheerknoppies, stamp hy dit per ongeluk om.

Met die valslag tref die TV nog een. Toe die lomperd vervaard opstaan, stamp hy nog ’n TV om, en asof dit domino’s is, tref dié TV ook nog een. Binne sekondes vier televisiestelle tot niet.

Die man staan eindelik verslae en toekyk terwyl die winkelpersoneel nader staan om die skade te besigtig.

Kyk die video hier:

“Die personeel was platgeslaan,” sê Mike Collins, assistentbestuurder van die winkel.

“Ek was daardie dag met verlof, maar het ingekom en die beeldmateriaal gekyk,” vertel hy. “My bestuurder het net gesê: ‘Jy sal nooit raai wat gebeur het nie.’ Ek was baie geskok.”

Onder die peperduur televisies wat beskadig is, was ’n Samsung met ’n geboë skerm en twee Panasonics. Mike kon nie bevestig of die klant vir die skade betaal het nie. Die winkel het die beeldmateriaal op die sosiale media gedeel. Tot dusver is dit al meer as 3,6 miljoen keer gekyk. Arme ding!

Bronne: telegraph.co.uk, mirror.co.uk, westbriton.co.uk

Hier is wat jou sterre vandag voorspel. Met Joanne Moore.

DONDERDAG 20 OKTOBER 2016
Hier is wat jou sterre vandag voorspel. Met Joanne Moore.

JOU DAG
Vermy verveeldheid deur vandag ekstrabesig te bly en sosiaal te verkeer.

AS JY VANDAG VERJAAR
Jy het die vermoë om die mense om jou te beïnvloed, maar jy sal moet leer om voordeel te put uit jou invloed. Aanstaande jaar moet jy buigsamer wees – geestelik en liggaamlik.

RAM 21 Mrt.-20 Apr.
Spanpogings of verhoudingskwessies is vandag op die spyskaart. Moenie ’n potensieel produktiewe vriendskap bederf deur baasspelerig en weerbarstig te wees nie. Streef daarna om toegewings te maak en te deel.

BUL 21 Apr.-21 Mei
Hardkoppige Bulle is baie goed met vasval in ’n verhoudingstydkapsule. As dinge in jou liefdeslewe nie reg wil uitwerk nie, is dit miskien tyd om te behou wat werk en ontslae te raak van dit wat nie werk nie.

TWEELING 22 Mei-21 Jun.
’n Gelukskoot kom na jou kant toe danksy ’n ouer, vriend, geliefde, kreatiewe of sport projek of stokperdjie. Moet egter nie oorhaastig raak nie, Tweeling. Gee die geluksgodin ’n kans om jou op te spoor.

KREEF 22 Jun.-23 Jul.
As jy met geliefdes probleme ondervind, gaan dit nie deur norsheid opgelos word of deur in jou dop te kruip nie. Die sterre moedig jou aan om deernisvol en dapper te wees en nie als te systap nie.

LEEU 24 Jul.-23 Aug.
Voel jy gefrustreerd oor die toekoms? Voel dit of jou doelwitte en drome alewig op die agtergrond bly? Moenie stres nie. Jy moet prioritiseer, beplan en bowenal supergeduldig bly.

MAAGD 24 Aug.-23 Sept.
Jy is vandag ekstranuuskierig terwyl jy opwindende nuwe idees soek en aan ’n paar omstrede gesprekke deelneem. Wees ook gereed om jou siening oor ’n sake- of geldkwessie te verander.

WEEGSKAAL 24 Sept.-23 Okt.
Vandag is onvoorspelbaar vir alle soorte verhoudings. Wat jy ook al verwag van ander mense; hulle gaan net mooi die teenoorgestelde doen of sê. Wees dus superbuigsaam.

SKERPIOEN 24 Okt.-22 Nov.
Jy is gretig om vandag ’n blitsbesluit te neem, veral waar ’n werk- of gesondheidskwessie ter sprake is. Is dit egter so ’n goeie idee? Dit is wyser om daaroor te slaap ’n nuwe perspektief te kry.

BOOGSKUTTER 23 Nov.-21 Des.
Skaal jou neiging tot veelpratery effens af, asook die gewoonte om impulsiewe opmerkings te maak. Neem eers nadat dinge rustiger geraak het ’n belangrike besluit oor ’n geliefde of vriend.

STEENBOK 22 Des.-20 Jan.
Pas die manier waarop jy vandag kommunikeer effens aan. Een oplossing gaan beslis nie almal pas nie. Sommige mense moet sagkens behandel word, so vermy omstrede onderwerpe en duidelik verbode terreine.

WATERDRAER 21 Jan.-19 Feb.
Jy is propvol uitmuntende idees oor jou toekomsrigting, maar jy sal sien denke verskil van dade. Hoe meer geestelik wisselvallig jy is, hoe erger gaan die dag raak.

VISSE 20 Feb.-20 Mrt.
Jy is gretig om met ’n uitdagende projek voort te gaan en het die insette van ander mense nodig om dit aan die gang te kry. Jy moet egter geduldig wees, want baie mense voel ongemotiveer of wil net nie saamwerk nie.

Kopiereg: Joanne Madeline Moore 2016.

Moeg van die gewone aartappelslaai met mayonnaise? Dan sal jy dol wees oor dié weergawe.

GENOEG VIR 6 MENSE
Bereiding: 10 min.
Gaarmaak: 35 min.

15 ml (1 e) olyfolie
8 baba-uie, gehalveer
100 g spek, gesny
15 ml (1 e) meel
15 ml (1 e) heelgraanmosterd
300 g baba-aartappels, gehalveer
500 ml (2 k) sider
100 g groenbone
2 murgpampoentjies, gesny
sout en vars gemaalde peper
100 g ertjies
hand vol pietersielie

1. Verhit die olyfolie in ’n pan en braai die uie 5 min. tot dit begin karamelliseer. Voeg die spek by. Braai 4 min. tot bruin, roer die meel en heelgraanmosterd by. Voeg die aartappels by en giet die sider oor.
2. Laat saggies met ’n deksel op 20 min. kook.
3. Voeg die groenbone en murgpampoentjies by. Kook 8 min. Geur met die sout en vars gemaalde peper en roer die ertjies en pietersielie by.

Knyp ’n tydjie af en waag ’n kans.

Die onderneming Hallmark-horlosies is in 1990 gestig. Sedertdien het dit ’n handelsmerk geword wat bekend is vir bekostigbaarheid en goeie waarde vir geld. Uitstekende gehalte en goeie stilering word gebied. Hallmark se uitgebreide horlosiereeks sluit ’n groot verskeidenheid style in – van kleurryke mode-leer vir sosiale geleenthede tot klassieke goue horlosies vir meer formele tye.

Hallmark-horlosies het ’n eenjaar-waarborg.

Vir meer inligting oor die handelsmerk, besoek hul webwerf, skakel 011-257-6000 of gaan loer op hul Facebookblad.

WEN!

Wen een van twee vir-hom-en-haar Hallmark-horlosiestelle ter waarde van R1 100 elk. Sy horlosie is verguld en het ’n sjampanjekleurige gesig, terwyl haar horlosie ’n wit leerbandjie, vergulde omhulsel en wit gesig het.

Hoe om in te skryf:

Antwoord die kompetisievraag en SMS jou naam, adres en antwoord na 35407* teen 12:00 om middernag op 27 Oktober 2016.

*Elke SMS kos R1,50.

Vraag: In watter jaar is Hallmark-horlosies gestig?

Kompetisiereëls, bepalings en voorwaardes: Die kompetisie is oop van 20 Oktober 2016 tot middernag op 27 Oktober 2016. Elke SMS kos R1,50. Gratis SMS’e kan nie gebruik word om in te skryf nie. Jy moet die eienaar wees van die selfoon of die eienaar se toestemming hê om die selfoon te gebruik. Jy mag soveel keer inskryf as wat jy wil. Personeel van Media24 en die borg (Hallmark), sowel as hul families, mag nie inskryf nie. Jy moet die vraag korrek antwoord om in aanmerking te kom vir die prys. Wenners sal gekies word deur ’n lukrake trekking en telefonies in kennis gestel word. Ons sal drie keer probeer om ’n wenner binne kantoortyd te kontak. As hulle nie bereik kan word met een van die drie oproepe nie, sal ’n nuwe wenner getrek word. Media24 en die borg van die prys aanvaar geen verantwoordelikheid vir enige skade wat kan spruit uit deelname aan die kompetisie nie. Pryse is nie oordraagbaar nie en mag nie verruil word vir kontant of ’n ander prys nie. Die borg is verantwoordelik daarvoor om die prys binne ’n redelike tyd te verskaf (4-6 weke). Die kleur van ’n prys kan nie gewaarborg word nie en is onderhewig aan beskikbaarheid van voorraad. As jy inskryf vir die kompetisie, aanvaar ons dat jy Media24 toestemming gee om jou soms te kontak met promosies en ander bemarking.