As jy dié somer aan die Suid-Afrikaanse kus in die see baljaar en van ver ’n wit vorm in die water sien aankom wat nes ’n ysbeer lyk, moenie bekommerd wees nie; dis waarskynlik net ’n Mola Mola-sonvis.
Die fotograaf Amos Nachoum het onlangs aan die Suid-Afrikaanse kus ’n foto van dié eienaardige vis geneem, wat gewoonlik in warm dele van die Atlantiese, Stille en Indiese Oseaan voorkom.
Volgens huffingtonpost.com lyk die wit Mola Mola-sonvis in die water baie na ’n ysbeer en kan dit tereg as sy dubbelganger beskryf word. Sy grootte dra ook tot die oëverblindery by: Dit weeg ’n allemintige ton.
Die goeie nuus is dat dié visse nie gevaarlik is nie. Volgens marinelife.about.com is hulle banger vir mense as wat ons vir hulle is.
– Christiaan Boonzaier