Daardie dag waarop jou lewensmaat jou die eerste keer verbaal of fisiek aangerand het, sal jy nooit weer kan uitwis nie, sê Zelda la Grange, ons blogger oor geweld teen vroue en kinders.
DIS nie mag wat mense korrup maak nie. Dis die vrees om mag te verloor wat mense korrup maak. En ek glo dieselfde is op verhoudings van toepassing.
As iemand met ’n lae selfbeeld eers voel hulle kan mag oor iemand anders verloor, kan dit in die een of ander vorm van mishandeling ontaard.
Waarom moet ons verantwoordelik voel vir ander mense se swak selfbeeld? Waarom voel ons altyd ons moet hulle voed en hul ego masseer?
Ons moet na onsself omsien en ons eie oorlewing verseker. Dis 2013 en hoewel dit in die haak is om jou man of vrou te ondersteun, is dit nie gesond om dit ten koste van jou eie selfbeeld te doen nie.
Ons is dikwels te vergewensgesind, maar ek glo vas verhoudings het grense. As ’n grens eers oorgesteek is, kan jy nie teruggaan en maak of dit nooit gebeur het nie. Jy kan vergewe, maar nooit vergeet nie.
“Daardie dag” toe hy my die eerste keer verbaal aangeval het, my vertel het ek is te vet of dat ek nooit weer met ’n manlike kollega mag praat nie, of “daardie dag” toe hy my die eerste keer geslaan het, kan nooit uitgewis word nie. Van daardie dag af word ’n mens uitgedaag om nie die volgende grens oor te steek nie en as daar eers mishandeling is, veronderstel dit ’n verlies aan respek.
Hy sal nooit weer jou waardigheid of jou liggaam respekteer nadat hy die eerste dag daardie grens oorgesteek het nie.
Hoewel ons dus kan vergeef, laat ons nooit vergeet dat uitdaging deel van die menslike natuur is nie en dat as ons dit eers een keer toegelaat het, is daardie grens weg.
- Zelda
Zelda la Grange blog tot 10 Desember elke weekdag vir ons tydens die 16 dae van aktivisme teen geweld teen vroue en kinders. Dié bekende en gewilde vrou werk steeds as Madiba se persoonlike assistent vir die Nelson Mandela-stigting en hou ook motiveringspraatjies. Sy is aktief betrokke by projekte soos Bikers for Mandela Day en Sisters with Blisters in haar rol as beskermvrou van die 1st for Women Insurance-trust. Een van haar lewensdoelstellings is om SA vroue te help bemagtig.