Dié lae-GI-beskuit word gemaak soos biscotti en is ideaal vir diabete. Onthou net, dis nie so bros soos gewone beskuit nie en moet goed geweek word in jou koffie of tee.
Lewer 20 stukkies
Bereidingstyd: 15 minute
Gaarmaaktyd: 25 minute
Uitdroogtyd: oornag
3 eiers
125 ml (½ k) fruktose
250 ml (1 k) hawermout
250 ml (1 k) semels
250 ml (1 k) ProNutro Wholewheat
Apple Bake met soja
7 ml (1½ t) bakpoeier
100 g neut-en-sademengsel
Voorverhit die oond tot 180 °C. Smeer ’n bakplaat.
- Klits die eiers tot skuimerig en lig, voeg die fruktose by en klits goed.
- Meng die hawermout, semels, ProNutro en bakpoeier goed en voeg by die eiermengsel. Meng deur.
- Voeg die neut-en-sademengsel by en meng deur.
- Plaas op die bakplaat, vorm in ’n lang, ovaalvormige rol en bak 25 minute of tot gaar en tot ’n toetspen skoon uit die middel van die beskuit kom.
- Laat afkoel en sny in skyfies van 5 mm dik.
- Pak in ’n enkellaag op ’n bakplaat en droog oornag uit in die oond by 100 °C.