Koop die brooddeeg vir dié resep by die supermark se bakafdeling.
Genoeg vir 4-6 mense
Bereiding: 15 minute
Gaarmaaktyd: 40-45 minute
15 ml (1 e) olie
15 ml (1 e) botter
2 uie, in ringe gesny
2 knoffelhuisies, fyn gedruk
500 g maer beesmaalvleis
1 pakkie (50 g) tamatiepasta
1 blik (410 g) kersietamaties
15 ml (1 e) suiker
sout en peper
1 kg brooddeeg
slaai vir voorsit
Voorverhit die oond tot 180 °C. Voer ’n bakplaat met bakpapier uit.
- Verhit die olie en botter. Braai die uie en knoffel tot die uie deurskynend is. Voeg die vleis by en braai tot dit verkleur. Meng die tamatiepasta deur die mengsel en braai nog effens.
- Voeg die tamaties by die mengsel en laat 10 minute prut. Geur met die suiker, sout en peper en roerbraai effens. Laat die mengsel afkoel.
- Rol die brooddeeg 1 cm dik uit. Versprei die vleis bo-op en rol die deeg op. Sny die rol in skywe en pak die skywe teen mekaar op die uitgevoerde bakplaat.
- Bak 40-45 minute tot gaar en sit voor saam met slaai.