Toe die gr. 1-leeder van Pretoria Ruben Venter se ma, Drika, hom help om sy wetenskap-projek oor sosiale media van die grond af te kry, het hulle nooit gedink dit sal so ’n groot sukses wees nie.
Drika het ’n foto van Ruben met ’n plakkaat op Facebook geplaas wat lees: My Graad 1 Wetenskapprojek. Sosiale Media. Hoe ver sal my foto in ses dae reis? Lewer asseblief kommentaar met die plek waar jy my sien. Baie dankie. Ruben Venter. Pretoria, RSA.
Foto: Facebook
Op Saterdag 19 Julie het Drika geskryf Ruben se foto is ná ses dae 293 539 keer gedeel.
Mense so ver soos Texas, die Filippyne, Christchurch, Siprus, Bangladesj en nog vele ander eksotiese plekke het kommentaar gelewer met die plek waar hulle die foto gesien het.
Almal was vol lof vir sy eksperiment, en ouers reg die wêreld oor het gesê hul kinders wil nou dieselfde doen.
Die inligting moet na Facebook se hoofkantoor gestuur word om te bepaal hoeveel keer daarop kommentaar gelewer is.
Die oorspronklike foto wat op sy ma se muur geplaas is, is 27 110 keer van gehou en daar is 108 571 keer op kommentaar gelewer.
Foto: Facebook
In dié stadium is dit nog nie moontlik om te sê hoeveel keer mense op die gedeelde foto kommentaar gelewer het nie. Drika het wel ’n rowwe berekening gemaak en gevind as daar op ’n gemiddeld van tien mense per gedeelde foto gewerk word, sal dit beteken 2 miljoen mense het Ruben se foto gesien.
Ruben is verheug en trots op sy projek, het sy ma geskryf.
Marelize Potgieter