Sy het jare lank gely: verskriklike skeelhoofpyne, hoë bloeddruk, oorsuising, disoriëntasie, warm gloede, mislikheid, asma. Dokters het aangehou om vir Anna* te vertel sy is gestres, maar sy het geweet hulle is verkeerd.

“Ek het jare lank met skeelhoofpyn, hoë bloeddruk, oorsuising, warm gloede, mislikheid, asma en ander onaangename aandoenings saamgeleef. Ek het verskeie dokters en spesialiste geraadpleeg, ek is deur tientalle toetse, skanderings en X-strale, maar niemand kon ’n behoorlike diagnose maak nie.

“Die meeste dokters het gesê dis alles aan stres te wyte, maar ek het geweet hulle is verkeerd. Toe kom ek drie jaar gelede af op ’n allergiespesialis en hy diagnoseer sensitiwiteit vir salisilaat by my. Dit het beteken ek moes ’n klomp kossoorte, hoofsaaklik vrugte, party soorte groente, speserye, kruie en preserveermiddels, laat staan. Ek het wel ’n ruk lank beter gevoel nadat ek die sondaars uitgeskakel het.

“Voorgeskrewe medisyne het my toestand laat versleg”

“Toe plaas my huisdokter my twee jaar gelede op ’n lae dosis medisyne vir hoë bloeddruk, ten einde my skeelhoofpyn-aanvalle te help beheer. Ses weke later het my bloeddruk onreëlmatig geraak en baiekeer gevaarlik hoog. Gedurende drie keer se hospitalisasie, bloedtoetse, X-strale en skanderings wat gedoen is en wat uitgeloop het op ’n slegte reaksie op jodium, was daar nog geen antwoorde nie, want al die uitslae was redelik normaal.

“Elke soort medisyne wat voorgeskryf is, het my toestand laat versleg en ek het dae in die bed deurgebring omdat ek het te siek gevoel het om op te staan. Ek het uit desperaatheid opgehou om my bloeddrukmedisyne te drink en ná ’n paar weke was my bloeddruk normaal!

“Toe ontwikkel ek gluten-intoleransie en suikeragtige kos het my boonop ook begin affekteer. Ten spyte van al die negatiewe uitslae, het ek nog geen idee gehad van wat met my skort dat ek soveel probleme ervaar nie. Ek moes ’n paar maande gelede drie dae in die bed bly met kwaai duiseligheid, skeelhoofpyn en verhoogde bloeddruk nadat ek rypgemaakte steak vir aandete gehad het.

“Al raad was om maar my eie navorsing te doen en ek het toe agtergekom hierdie aanval van lighoofdigheid was te wyte aan histamien-intoleransie. Wel, ek het in die afgelope nege maande vasgestel dat ek aan VCS (veelvuldige chemiese sensitiwiteit) ly en dit is deur ’n nuwe allergiespesialis bevestig.

“Baie soorte voorskrifmedisyne bevat amiene”

“Ek het weerstand teen gluten, salisilate, sulfiete, laktose en amiene (histamien); dus is die lysie van voedsel wat ek met veiligheid kan eet, uiters beperk. Baie soorte voorskrifmedisyne bevat amiene en dit verklaar hoekom ek so baie reaksies toon op medikasie. Ek toon selfs soms binne enkele ure ’n reaksie op sekere soorte medisyne, terwyl ander ná twee of drie dae, of selfs langer, reageer.

“Reaksies op voedsel kan binne minute ná inname voorkom, of dit kan etlike ure duur en dae later eers weggaan. Voedselonverdraagsaamheid word oor die algemeen veroorsaak deur een of almal van die volgende: stres, parasiete en lekkendedermsindroom (LGS). Ek het verskeie soorte alternatiewe terapie probeer en ’n bietjie verligting gekry, maar nou is ek by ʼn nuwe dokter, wat LGS by my gediagnoseer het.

“Lekkendedermsindroom laat gifstowwe toe om deur die bekkenholte se wand in te sypel en so ekstra werkdruk op die lewer, niere en ander organe te plaas soos hulle poog om die gifstowwe uit te liggaam te verwyder. Dit lei tot voedselonverdraagsaamheid en kan jou redelik siek laat voel.

“My gestel is uiters sensitief”

“Dit is ongelukkig ’n uiters stadige proses en tot dusver het ek nadelige reaksies getoon op ses van die agt kure wat voorgeskryf is, natuurlike middels ingesluit. My gestel is uiters sensitief en ek moet elke dag vat soos dit kom.

“Ek kom agter dat my reaksies taamlik verskil. Sommige dae kry ek stywe nekspiere, skeelhoofpyn en is gedisoriënteer, ’n week later is my reaksie miskien warm gloede, hartkloppings, slapeloosheid en mislikheid. Binne minute nadat ek iets geëet het waarvoor ek sensitief is, meestal moeilik om te identifiseer, begin my ore suis; dus maak ek ’n aantekening in ’n kosdagboek wanneer reaksies erg is.

“Uiteet is ’n nagmerrie omdat ek die meeste restaurantgeregte nie kan eet nie. Om ’n slaai te bestel is sinneloos, aangesien ek net sekere soorte blaarslaai, seldery en radyse kan eet – tamaties, komkommers, olywe of krulblaarslaai is taboe. Preserveermiddels, souse, kruie, speserye, die meeste soorte vrugte, kase, verwerkte vleis, gegiste kos, blikkieskos en baie ander gewilde kossoorte is verban uit my dieet.

“Wanneer ek deur ’n supermark stap, besef ek dat ek slegs ’n baie klein persentasie van die items op die rakke kan kies. Waarna verlang ek die meeste? Jogurt, donkersjokolade, tamaties, avokado’s en kaas!

“Ek moet kies wat ek kán eet”

“Ek is in my senior jare en is dankbaar dat ek langer as 60 jaar kon eet wat ek wou, behalwe skulpvis, maar nou moet ek my kos baie versigtig kies. Dit is nie meer ’n geval van vermy wat ek nie kan eet nie, maar kies wat ek kán eet. Wanneer ek dae beleef met kwaai reaksies, sal ek gekookte wit rys eet (ongegeur), ’n klein porsie wit vis of hoender, met uitgesoekte groente, gevolg deur geskilde, gekookte pere.

“Ek het sommige voedselsoorte weer probeer insluit by my dieet, maar met min sukses, aangesien skeelhoofpyn of erge hartkloppings gewoonlik weer begin opduik. Ek kan net parasetamol inneem, aangesien alle ander pynstillers ’n reaksie veroorsaak.

“Ek bak my eie glutenvrye brood, drink rysmelk en eet baie wortelgroente. Om tot my ellendes by te dra, veroorsaak sommige goed, as gevolg van my VCS, asma by my; dus moet ek lugverfrissers, parfuum, sigaret-, braaivleis- en houtrook, en verfdampe vermy. Ongelukkig lyk dit asof sommige mense nie omgee dat hulle optrede, soos om te rook, ’n reaksie in iemand se liggaam kan veroorsaak nie. Dit het selfs ’n ruk geduur voor my familie verstaan het dat my probleem lewensgevaarlik kan wees.

“Nee, ek is allesbehalwe vol fiemies, en dit is beslis nie my verbeelding nie. Toe ek my nuwe allergis ontmoet, het sy bevestig dat voedselonverdraagsaamheid en VCS ’n werklikheid is en laasgenoemde word as ’n kroniese siekte geklassifiseer.

“Daar is nog min oor LGS geskryf”

“Die meeste publikasies het al artikels aangebied oor gluten- en laktose-onverdraagsaamheid, maar ek het nog nooit enige artikel raakgeloop oor amien-onverdraagsaamheid (HI) en VCS nie. Daar is nog min oor LGS geskryf, aangesien dit ’n sindroom is, nie ’n siekte wat dokters maklik kan herken nie.

“Vir die rekord: onverdraagsaamheid rakende voedsel of sensitiwiteit daarvoor is nie dieselfde as ’n allergie nie; dit word dus beheer deur kosse en chemikalieë wat die probleem veroorsaak, uit te skakel. ’n Allergie kan gewoonlik met medikasie behandel word.

“Ek wonder hoeveel mense daar buite ly aan dieselfde simptome en wonder wat op aarde hulle makeer? Let op wat jy eet, aangesien jou maag op stuk van sake jou tweede brein is.”

*Nie haar regte naam nie.

Daar was lanklaas ’n treffende avontuurfliek waarin wilde diere ’n prominente rol speel, maar liefhebbers van sulke films kan nader staan vir Wolf Totem (13G).

Die Franse regisseur Jean-Jacques Annaud het reeds twee uitstekende flieks in hierdie genre agter sy naam: The Bear (1988) en Two Brothers (2004), wat oor twee tierwelpies handel.

Wolf Totem is gegrond op ’n outobiografiese roman deur die Chinese skrywer Lü Jiamin en speel af tydens die Chinese kulturele revolusie in die 1960’s toe die regering ontslae wou raak van tradisionele elemente van Chinese kultuur en kommunistiese ideale wou vestig. ’n Student, Chen Zhen (Feng Shaofeng), word na Mongolië gestuur om die nomades daar op te voed, maar kom agter hulle het meer wysheid om met hom te deel as hy met hulle. Hy leer ook hoe hulle saamleef met ’n plaaslike trop wolwe en toe hy ’n agtergelate welpie vind, neem hy hom aan.

Die meeste resensente dink dis ’n baie goeie fliek. Die webtuiste Rotten Tomatoes, wat die punte bymekaartel wat resensente toeken aan flieks en ’n gemiddelde uitwerk, gee dit 70 persent. Hulle bevind: “As ’n visuele ervaring spog Wolf Totem met genoeg opwinding om te vergoed vir die beduidende veranderings wat in die verhaal gemaak is om die boek vir die silwerdoek aan te pas.”

Tirdad Derakhshani van die Amerikaanse koerant Philadelphia Inquirer gee die rolprent drie uit vier sterre. “Wolf Totem het van die opwindendste, mees verbysterende natuurtonele wat ek al gesien het. Annaud se film verwater die roman se politieke boodskap en die karakterisering neig om op stereotipes te steun. Tog betower dit die kyker so geheel en al dat ’n mens hierdie swakpunte kan vergewe.”

Die biografiese drama The Program (13TD) is ’n blik op die lewe van die berugte fietsryer Lance Armstrong (Ben Foster van The Mechanic) en hoe ’n Ierse sportverslaggewer, David Walsh (Chris O’Dowd van Bridesmaids), se vermoede dat Armstrong onwettige opkikkers gebruik, daarnatoe lei dat hy begin ondersoek instel en eindelik die kampioen se skokkende geheim ontbloot.

Die kritici is oor die algemeen nie vreeslik beïndruk nie. Rotten Tomatoes het nog nie konsensus bereik nie, maar tot dusver gee hulle dit 59 persent gegrond op 32 resensies. Die webtuiste Metacritic, wat dieselfde as eersgenoemde werk, gee dit 61uit 100.

Die Britse fliektydskrif Total Film se Andrew Lowry is veel positiewer en gee dit vier sterre. “Dis ’n gewigtige onderwerp vir ’n fliek en ’n vooraanstaande Britse span – die regisseur, Stephen Frears (Philomena, The Queen), en draaiboekskrywer, John Hodge (Shallow Grave, Trainspotting) – kwyt hulle geesdriftig van hulle taak. Foster se vertolking van Armstrong is uitstekend, maar ongelukkig sien ’n mens al die gebeure as buitestaander en kry nooit enige insig in sy psige nie, maar dis ’n nietigheid. Dis ’n dringende, intelligente en aangrypende rolprent dié.”

Nog ’n literêre verwerking wat vandeesweek uitgereik word, is die liefdesdrama Brooklyn (10-12OS), gegrond op die gelyknamige roman deur die Ierse skrywer Colm Tóibín.

Dit handel oor Eilis (Saoirse Ronan van The Lovely Bones), ’n jong vrou wat in die 1950’s van Ierland na Amerika emigreer en verlief raak op die Italiaans-Amerikaner Tony (Emory Cohen). Maar net toe sy voel haar nuwe lewe kom op dreef, word sy teruggeroep Ierland toe nadat haar suster, Rose (Fiona Glascott), ernstig siek geword het. Daar ontmoet sy die hubare Jim (Domhnall Gleeson van About Time) en kom dan voor ’n moeilike keuse te staan.

Die resensente is gaande oor dié fliek. By Metacritic kry dit 87 uit 100, en Rotten Tomatoes gee dit 99 persent! Hulle bevind: “Brooklyn steun op uitstekende vertolkings deur Saoirse en Emory, en is ’n diep historiese drama wat sowel die hartsnare roer as die verstand bevredig.”

Henry Fitzherbert van Brittanje se Daily Express is nie heeltemal so oorstelp nie en gee dit drie sterre. “Ek het die fliek ewe veel geniet as die roman waarop dit gegrond is; dis te sê taamlik. Dis ’n elegante, sensitiewe verhaal wat met sjarme en afronding vir die silwerdoek verwerk is. Die probleem is net, dis te rustig en gedemp en bevat geen verassings of spanning nie; daarom is dit nie juis roerend nie, maar ek is seker liefhebbers van die roman sal tevrede voel.”

Die veteraanaktrise Lily Tomlin (I Heart Huckabees), veral bekend vir haar komiese werk, speel die titelkarakter in Grandma (16T), ’n komediedrama oor ’n hardekwas, oor-die-muur-digteres wat instem om haar swanger tiener-kleinkind (Julia Garner) te help om geld bymekaar te maak vir ’n aborsie.

Die kritici dink dis ’n voortreflike fliek. Rotten Tomatoes gee dit 92 persent en die konsensus is: “Grandma spog met ’n uitmuntende vertolking deur Lily en kragtige en empatieke werk deur die skrywer-regisseur, Paul Weitz (About a Boy).”

Simon Houpt van Kanada se The Globe and Mail gee dit drie uit vier sterre. “Tomlin se vertolking verdien ’n Oscar,” skryf hy. “En Paul skep ’n gulhartige, delikate werk waarin almal skitter.”

Die romantiese komedie How To Make Love Like an Englishman (13STN) handel oor ’n professor in die digkuns (die vorige James Bond, Pierce Brosnan) van Cambridge wat ’n welgestelde Amerikaanse student (Jessica Alba van Sin City) swanger maak, teësinnig met haar trou en na Malibu verhuis. Hy word ’n toegewyde pa, maar raak heimlik verlief op sy skoonsuster (Salma Hayek van Frida).

Rotten Tomatoes het nog nie konsensus bereik nie, maar tot dusver gee hulle dit ’n skamele vier persent gegrond op 24 resensies.

Die Britse fliektydskrif Empire se Angie Errigo gee dit twee sterre. “Ons almal hou van Brosnan en ’n mens wil regtig nie teen ouer mense diskrimineer nie, maar vir hierdie fliek om enigsins romanties, snaaks of selfs net draaglik te wees, moes die manlike hoofrol – en al die ander rolle ook – eintlik deur iemand baie jonger vertolk gewees het. Om alles te kroon word daar van ons verwag om te glo dat Malcolm McDowell (A Clockwork Orange) Brosnan se pa is, al is hy net 10 jaar ouer. Dis eintlik net hartseer.”

Die jongspan behoort Blinky Bill (O) te geniet, ’n rekenaaranimasie-weergawe van die koala-karaktertjie wat die Australiese skrywer Dorothy Wall in 1933 geskep het. Blinky (Ryan Kwanten se stem) gaan op ’n avontuur in die Australiese boendoes om sy pa te vind.

Rotten Tomatoes het nog nie konsensus bereik nie, maar tot dusver gee hulle dit 80 persent gegrond op vyf resensies. Luke Buckmaster van Brittanje se The Guardian gee dit drie sterre. “Die fliek se pogings om vreeslik Australies te wees – dit bevat hope Australiese uitdrukkings en verwysings na die land se diere, bekendste liedjies en geboue soos die Sydney-operahuis – sal dalk jong kinders van ander lande laat kopkrap, maar daar is genoeg pret en oulike diertjies dat hulle dit tog sal geniet.”

Die erotiese riller The Loft (16TSGD) wentel om vyf ryk, getroude mans, gespeel deur Karl Urban (Dredd), Wentworth Miller (Prison Break), James Marsden (X-Men), Eric Stonestreet (Modern Family) en Matthias Schoenaerts (The Drop), wat elkeen ’n sleutel het tot ’n luuksewoonstel waarheen hulle hul minnares kan neem. Maar dinge ontaard in ’n nagmerrie toe ’n onbekende vrou se lyk in die woonstel gevind word en hulle mekaar begin verdink.

Hoekom dié vyf goeie en bekende akteurs besluit het dat hierdie gegewens vir hulle belowend klink, sal net hul agente weet. Metacritic gee dit 24 uit 100 en by Rotten Tomatoes kry dit 11 persent. Hulle bevind: “Net kykers wat die minste van hul vermaak vereis, sal dit geniet. Die karakters is almal onaangenaam en die storie smerig.”

Katie Rife van avclub.com gee dit ’n C-. “Hierdie fliek kan nie besluit wat dit wil wees nie. Dis ’n manlike fantasie, maar ook ’n verhaal wat as waarskuwing dien. Dis ’n smerige konsep, maar die uitbeelding daarvan is beskroomd. Dit straf die mans vir hul oortredings, maar laat hulle daarmee wegkom. En, die ergste van alles, dit dring daarop aan dat hierdie ouens eintlik diep in hul binneste ordentlik is, ten spyte daarvan dat hulle gedrag dit telkens weerspreek.”

– Sandra Visser

Warden – Brandweermanne soek deur smeulende oorblyfsels van ‘n bus na twee kinders wat vermis word. Die bus het op die N3 op die roete van Warden na Harrismith aan die brand geslaan.

A Collection on Twitter

Volgens Netwerk24 het Netcare911-woordvoerder Chris Botha gesê medici kon nog nie bevestig of enige van die kinders wel oorlede is nie.

“Ons medici op die toneel is steeds besig en in hierdie stadium is daar twee kinders wat vermis word. Die soektog na hule duur voort,” het hy gesê.

“Brandweermanne het pas die bus binnegegaan en met hul soektog begin. Paramedici is besig met vier mense wat beseer is”

Twee van die vier is in ‘n kritieke toestand.

“Dis onbekend wat daartoe gelei het dat die bus aan die brand geslaan het,” het Chris gesê.

Die N3 Toll Concession waarsku motoriste om die gebied versigtig te nader.

Bron: News24

My Pretplaas se Bongi, Bella en Bennie gaan vanjaar by Tygervallei Sentrum se Kidz Skouspeel kuier. En hulle nooi jou om ook saam te kom speel!

• 1
• 2
• 3
• 4
• 5

« »

Lollos gaan daar wees

Moenie van Lettie vergeet nie!

Liewe Heksie ook

Tjiff & Tjaff tot die redding!

Die tiere Tom & Tina

Vir die tweede jaar in ’n ry kan jy aansluit by die gasvrou, die Prinses van die Vallei vir `n magiese produksie, wat verseker is om elke kind se fantasie in `n werklikheid te omskep. Nuwe avonture en musiek wag saam met Lollos en Lettie, Tjiff & Tjaff, Liewe Heksie en Tygervallei se eie tiere, Tom en Tina.

Dis ’n naweek propvol pret met drie vertonings in die Tygervallei Sentrum se Arena op Saterdag 21 November om 9 vm, 11:30 vm en 2 nm. Daar is ook nog ’n vertoning op Sondag om 11:30 vm.

Kaartjies kos R80. Kry dit vandag nog by Computicket

Bongi, Bella en Bennie van My Pretplaas, Huisgenoot se splinternuwe prettige, opvoedkundige app, kan nie wag om alle kinders onder 7 jaar ’n bietjie op die app rond te wys nie! Speel die prettige speletjies, lees die storie, sing saam op maat van die liedjies en kyk die video’s terwyl jy uitsien na die vertoning.

Sien jou daar!

Wat jou sterre vandag voorspel met Joanne Moore

SATERDAG
JOU DAG
Vandag se positiewe sterre spoor jou aan om prettige dinge op ’n gefokusde manier te doen.

AS JY VANDAG VERJAAR
Jy is slim en deeglik en het goeie waarnemingsvermoë. Die volgende 12 maande is dit tyd om meer in voeling met jou diepste emosies te kom.

SONDAG
JOU DAG
Maak seker jy kyk voor jy vandag ’n sprong waag.

AS JY VANDAG VERJAAR
Jy het wonderlike tegniese vaardighede en kundigheid, maar moenie jou sensitiewe, menslike kant in die proses verloor nie. Maart en April is ’n goeie tyd vir liefde en romanse.

RAM 21 Mrt.-20 Apr.
As jy probeer om ander met mening na jou siening oor te haal, kan jy weerstand verwag. Kompromie is die slim weg om te volg.

BUL 21 Apr.-21 Mei
Is jy superkoppig oor ’n persoonlike saak? Die sterre spoor jou aan om ’n ander benadering te probeer volg. Jy kies om die probleem kalm, kreatief en deur samewerking op te los.

TWEELING 22 Mei-21 Jun.
Jy voel die naweek gou verveeld. Dit is dus die ideale tyd om ’n fassinerende nuwe stokperdjie of stimulerende projek, wat by jou weetgierigheid pas, te kry.

KREEF 22 Jun.-23 Jul.
Dit voel asof jou emosies die naweek wipplank ry. Daar is heelwat uitdagings en jy sal dit die
beste hanteer as jy ander ooreed om saam met jou eerder as teen jou te werk.

LEEU 24 Jul.-23 Aug.
Die kollig val op geldsake, maar moenie toelaat dat jou aptyt vir luuks leef buite beheer word nie. Soek ekstra maniere waarop jy in jou plaaslike gemeenskap en aanlyn kennisse kan maak.

MAAGD 24 Aug.-23 Sep.
Die Maagd se brein is wakker, maar moenie die naweek te veel oor situasies dink en dit analiseer nie. Mercurius en Jupiter spoor jou aan om na die geheelbeeld te kyk en daarna aan die werk te spring!

WEEGSKAAL 24 Sep.-23 Okt.
Die sterre is gunstig vir langtermynliefde en ernstige verbintenisse. Dit is dus die ideale naweek om by ’n aanlynwebwerf aan te sluit om liefde te soek, jou lewensmaat te vind, verloof te raak, te trou of jou huweliksbeloftes te hernu.

SKERPIOEN 24 Okt.-22 Nov.
Moenie net rondsit en jou bekommer oor waarheen jy op pad is nie. Aktiewe verbeelding en kreatiewe visualisering is twee fantastiese maniere om jou toekoms in die vooruitsig te stel en dit dan waar te maak.

BOOGSKUTTER 23 Nov.-21 Des.
Boogskutters hou van gesels! Die verband tussen Mercurius en Jupiter maak jou nuuskieriger en selfs meer praterig. Jy het baie om te sê, maar staan ook tyd af om na ander te luister.

STEENBOK 22 Des.-20 Jan.
Dis ’n wonderlike naweek om jou meer tot ’n verhouding te verbind – of dit nou ’n romantiese, platoniese of sakeverhouding is. Sit genoeg tyd opsy om sake te oordink en te tob.

WATERDRAER 21 Jan.-19 Feb.
Fokus daarop om vir jou die lewe te skep wat jy wil hê en moenie te konvensioneel wees nie. Bestee tyd saam met ander – hoe meer selfgesentreerd jy is, hoe minder bevredigend sal die naweek wees.

VIS 20 Feb.-20 Mrt.
Buigsame Visse is geneig om probleme te vermy en hul kop in die grond te druk. Die sterre spoor jou aan om die daaglikse uitdagings met moed en selfvertroue te pak.

Meer as 140 mense is oornag in Parys, die Franse hoofstad, dood in ‘n rits terroris-aanvalle wat die stad geruk het.

Die ergste hiervan was ‘n gyselaarsdrama in die Bataclan-konsertsaal waar konsertgangers glo een vir een deur gewapende mans doodgeskiet is. Die Amerikaanse rockgroep Eagles of Death Metal het daar opgetree.

CNN berig daar was ses goed gekoördineerde aanvalle oor die stad wat laat Vrydag-aand begin het. Minstens agt aanvallers is dood, waarvan sewe hulself opgeblaas het.

‘n Joernalis wat by die konsert in die Bataclan-konsertsaal was, het vertel “Ons het op die grond gelê om nie seer te kry nie. Daar was groot paniek. Die terroriste het vir 10 tot 15 minute op ons geskiet. Dit was ‘n bloedbad.” Die skietery in die konsertsaal het sowat 112 mense dood gelaat.

Nog twee skietvoorvalle het terselfdertyd elders in die stad plaasgevind by restaurante en daar was ook ‘n ontploffing by die Stade de France, waar ‘n vriendskaplike sokkerwedstryd tussen Frankryk en Duitsland aan die gang was.

Die Franse president, Francois Hollande, het intussen ‘n noodtoestand verklaar. Die wedstryd is gekanselleer en die toeskouers het almal op die sportveld bymekaargekom voor die stadion ontruim is.

Frankryk het ook sy grense gesluit en millitêre personeel is regoor die hoofstad ontplooi.

Die presiese aantal sterftes is nog nie bepaal nie, en dit is ook nog onseker of daar nog aanvallers op vrye voet is.

Die Britse premier David Cameron het sy skok oor die voorval op Twitter gedeel en Frankryk belowe hulle sal “enigiets doen om te help”.

Die stad is ook in Maart geruk deur terreuraanvalle op die satiriese koerant Charlie Hebdo en ’n gyselaarsdrama in ’n Joodse winkel. Hoewel geen groep al verantwoordelikheid vir die aanvalle op Vrydag die 13de aanvaar het nie, het ooggetuies vertel van die aanvallers het oor Sirië en Irak gepraat.

Bronne: CNN; SkyNews; Netwerk24

GEBORG DEUR AFRICAN EXTRACTS

Lyk en voel jonger met rooibos, die natuurlike produk vir beeldskone vel

Rooibos is bekend vir sy verjongende, strelende en genesende uitwerking op die vel. Dis ’n natuurlike produk wat gesonde vel bevorder en terselfdertyd beskerming bied teen omgewingsinvloede wat veroudering veroorsaak.

Baie navorsing is al gedoen oor die voordele van rooibos en skoonheidshuise wêreldwyd gebruik dit in hul velsorgprodukte. Lees verder om uit te vind hoekom rooibos jou jare jonger kan laat lyk.

Voorkom veroudering
Omgewingsfaktore soos die son, besoedeling, stres en ’n ongesonde dieet laat vrye radikale vorm, wat die gesonde selle in jou vel aanval en die vervaardiging van kollageen vertraag. Met die afbreek van kollageen verloor die vel sy fermheid, en plooie vorm. Die antioksidante, alfahidroksiesuur en sink in rooibos voorkom en herstel hierdie skade.

• Antioksidante voorkom selbeskadiging
• Sink is noodsaaklik vir velvernuwing
• Natuurlike alfahidroksiesuur help plooie versag
• Ryk aan ander vitamiene en minerale wat nodig is vir ’n gesonde vel

Verminder stres
Stres is ’n groot faktor in velveroudering. Hoe minder jy stres, hoe jonger lyk jy. Rooibos is kafeïenvry en verlaag die produksie van kortisol (streshormoon) in die liggaam, en daardeur verminder dit die uitwerking van stres op die liggaam.

Behandel slapeloosheid
Slaap speel ‘n belangrike rol velvernuwing. Jou vel het rus nodig om jonk en gesond te lyk. Rooibos, wat kafeïenvry is, word aanbeveel vir diegene wat ly aan slapeloosheid, versteurde slaappatrone, hoofpyn, ligte depressie of spanning – alles aspekte wat gesonde slaap kan belemmer. Gebruik dus Rooibos vir ‘n heerlike nagrus en lyk jonger.

Rooibos as Velsorgproduk
Rooibosgebaseerde velsorgprodukte reinig die vel sonder om die natuurlike pH-balans te versteur of dehidrasie te veroorsaak. Ook reinig dit porieë deeglik van onsuiwerhede, wat verhoed dat die porieë verstop. Die antibakteriële eienskappe versnel ook die helingsproses van aknee en ander velprobleme.

Rooibos is dus ’n wonderlike manier om jou vel op die natuurlike wyse te versorg en veroudering teen te werk.

African Extracts gee ʼn velsorggeskenkpak ter waarde van R1 000 weg!  Kliek hier om in te skryf.

KLIEK HIER om meer uit te vind oor African Extracts of volg African Extracts op Facebook.

Bronne: vegkitchen.com, sarooibos.org.za, dollfacemagazine.com, homeremedyhacks.com

’n Mens sou normaalweg kon verwag dat die belofte van ’n lang lewe, vry van pynlike siektes, genoeg sou wees om mense te help om swak leefstylgewoontes af te sweer, maar dit werk nie so nie.

Talle gaan voort om te veel te rook en te drink. Party vergeet selfs om medisyne te drink wat hul aardse lewe sou kon verleng, aangesien dit nie by hul lewenstyl inpas nie.

Twee studies het bevind dat hulp egter byderhand kan wees in die vorm van die belofte van koue, harde kontant, want dit dra baie by om mense aan te moedig om gesondheidsbewus te raak.

Die eerste studie, wat in die tydskrif Addiction gepubliseer is, handel oor 600 swanger vroue wat rook. Almal van hulle kry berading om hulle te help om op te hou, maar 600 van hulle kry ook $600 in die vorm van koepons.

Dié wat die geldelke aansporing gekry het, was meer geneig om die nikotien af te sweer – 22 persent het geslaag om op te hou, vergeleke by 8,6 persent uit die ander groep. Die neiging het ook voortgegaan nadat hulle hul babas in die wêreld gebring het: 33 persent het op hul ou weë teruggeval in vergeleke met 55 persent van dié wat nie die koepons ontvang het nie.

“Indien die belonings bloot aan die lyer of die dokter gegee is, was dit nie suksesvol nie”

Vandeesweek het die Tydskrif van die Amerikaanse Mediese Raad navorsing rakende mense se cholesterol opgesom. Wanneer finansiële beloning aangebied is vir dokters en hul pasiënte met lae-digtheidslipoproteïne-cholesterolvlakke (LDL), was hulle aansienlik yweriger om dit te verlaag.

Interessant genoeg, indien die belonings bloot aan die lyer of die dokter gegee is, was dit nie suksesvol nie.

Dr. David Asch het die studie gelei. Hy is ’n professor in geneeskunde en uitvoerende direkteur van die Center for Health Care Innovation by die universiteit van Pennsilvanië in Philadelphia.

“Daar is geweldig baie entoesiasme vir die gebruik van geldelike aansporings ten opsigte van gesondheidsorg,” het hy aan CBS News gesê en ’n voorbeeld gegee van waar dit sou kon werk.

“Ons weet uit goeie kliniese proefnemings dat statiene baie doeltreffend is wanneer dit kom by die vermindering van ons risiko op latere kardiovaskulêre siektes.

Daar is goeie getuienis dat dit werk. Daar is baie goedkoop en generiese statienes. Dit word een keer per dag ingeneem en die newe-effekte is baie laag.

“Dit is die volmaakte stelsel vir goeie ondersteuning.”

© Cover Media

Die reuse haelstorm wat Pretoria en Middelburg vandag getref het, het omvattende skade aan eiendomme en voertuie aangerig. Daarom het ons dit goedgedink om Suid-Afrikaners aan te raai om waaksaam te wees en hulself en hul bates tydens die haelseisoen te beskerm.

Hier is ’n paar goed om in gedagte te hou tydens ’n haelstorm:

• Hou ’n ogie op die weervoorspelling wat jou oor ’n naderende haelstorm kan waarsku.
• As jy in ’n plek is wat skuilding teen ’n naderende storm kan bied, bly eerder daar tot die storm bedaar het.

As jy jou op die pad bevind:

• Moenie onder bome parkeer nie, want daar is ’n risiko dat takke en puin kan val.
• Soek skuiling as jy op die pad is en in ’n haelstorm vasgevang word. Dit kan ’n bedekte parkeerterrein of ’n petrolstasie insluit. Wees veral versigtig as jy aftrek, skakel jou gevaarligte aan, en moenie jou veiligheid of dié van ander waag deur wild te hardloop na skuiling nie. Bly in jou motor en verlaat net die veiligheid van die beskutte plek as die storm verby is.
• As daar nie skuiling naby is nie, word motoriste aangeraai om af te trek langs die pad indien dit veilig is. Haelskade is onvermydelik in ’n onbeskutte plek, maar dis veiliger as om deur die storm te bestuur terwyl sigbaarheid swak en die paaie glad is.
• Onthou dat ’n skielike daling in temperatuur tydens ’n haelstorm gaan beteken dat jou motorruite meer gaan toewasem, wat sigbaarheid belemmer, so maak seker jou motor se ontwasemer werk behoorlik.

Wat om by jou huis te doen:

• Hou geute skoon en rommelvry om ys en water weg van die dak te vervoer.
• Skuif soveel toerusting en meubels onderdak as kan as daar ’n swaar storm voorspel word.
• Dakstrukture moet nagegaan word om te verseker dit sal nie ingee onder die gewig van die hael indien daar ’n verstopte dreineringstelsel is nie.

Intussen word nog storms vir later vandag in Gauteng voorspel.

Bron: Dialdirect-persvrystelling

Die gewelddadige terreuraanval op 13 November het Parys in rou gedompel. Hier beskryf Shané Barnard, ʼn vryskutjoernalis wat by Huisgenoot gewerk het, die somber atmosfeer in die stad. Sy het in September 2014 Frankryk toe getrek toe haar man, Francois, sy Meestersgraad in volhoubare ontwikkeling daar gaan studeer het.

Shané en haar man, Francois Barnard.

“

Parys het Saterdagoggend onder ’n grys wolkkombers wakker geword.

Die skril sirenes van ambulanse en polisievoertuie wat die vorige aand oral deur die stad gehoor kon word, het plek gemaak vir gedempte praatjies tussen bure en nuuslesers wat in die agtergrond die jongste oor die terreuraanvalle oordra.

In die woonstelblok oorkant ons, het ’n ou tannie ’n Franse vlag oor haar balkon gehang. Skole, museums en ander openbare plekke soos gimnasiums, swembaddens en fliekteaters is onder die landswye noodstoestand wat president François Hollande ingestel het, gesluit.

Ons word aangeraai om liewer tuis te bly.

Strate wat gewoonlik dag en nag wriemel met mense is byna heeltemal verlate

Strate wat gewoonlik dag en nag wriemel met mense wat inkopies doen, toeriste-aantreklikhede besoek of in restaurante eet, is byna heeltemal verlate. Tot die bakkery op die hoek het die staaldeur voor sy ingang toegetrek.

By Place de la Republique, net ’n klipgooi van die Bataclan-teater waar die gyselaarsdrama afgespeel het, het mense hier en daar blomme kom neerpak of ’n kers aangesteek.

Maar daar was geen teken van die honderde duisende mense wat ná die Charlie Hebdo-skietery tien maande gelede in samesyn hier saam gestap het nie.

Die 20 000 ligte wat gewoonlik saans die Eiffeltoring verlig, is Saterdagaand afgeskakel uit empatie met die slagoffers en hul families.

Die stad van lig het tydelik donker geraak. Maar teen Sondagaand het die dinge weer plek-plek begin verhelder deur die geflikker van duisende kersligte wat in vensters die hele stad oor gesien kon word.”

Lees meer in hierdie week se Huisgenoot (26 November) oor die aanvalle.

Dit is vanaand op die kassie:

17:00 The Ellen DeGeneres Show (M-Net): Ellen is weer op haar beste! Die komediant gesels met bekendes, gewone mense met buitengewone stories en voer ’n paar danspassies uit.

17:30 Hier gaan ons alweer! (kykNET): Petri de Wet en 6 gashengelaars pak hul bakkies vol soutwater hengeltoerusting en ry drie dae tot na die weskus van Afrika. Hier hengel die manne met kunsaas vir groot groen Elwe en Leervis.

17:30 Inspirasiekos met Sarie (via.): Pure plaaskos via Herman, die stadskok. Die talentvolle SARIE-kosredakteur, Herman Lensing, is op soek na ons beste bestanddele. Hy ontmoet die passievolle persoonlikhede agter die bestanddele – en kook dan ’n feesmaal!

18:00 The Goldbergs (M-Net): Leef jou weer in die 80’s in met hierdie wilde familie en leef saam met hulle die lewe se struikelblokke en hoogtepunte uit.

18:00 Suidooster (kykNET): Kom ontmoet die mense van Suidooster, ‘n klein winkel- en sakesentrum in een van Kaapstad se voorstede waar drie gesinne saam werk en noodwendig in mekaar se lief en leed deel. Die Octobers, die Samsodiens en die Du Plooys.

18:30 Villa Rosa (kykNET): Liam speel met Marius soos ‘n kat met ‘n muis, en stoot hom nog nader aan die afgrond. Vicky maak ‘n voorstel wat Carina uitboul. Monique vertrek, maar nie voor sy ‘n groter wig tussen Stef en Saskia ingedruk het nie.

18:30 7de Laan (SABC2): Xander maak ‘n groot besluit oor die toekoms van die Hillside Times.Die pastoor lê besoek af by Kim en haar nuwe woonstelmaat.

18:30 The X Factor UK (M-Net): Die Verenigde Koninkryk se beste onontdekte talent word in hierdie talentkompetisie ontgun.

19:00 Helix (M-Net Edge): In hierdie gruwelreeks hou die uitbreek van ‘n virus in die Arktiese streek ‘n groot gevaar vir die mensdom in.

19:30 Binnelanders (kykNET): Tim wil graag vir Dennis ontmoet, Rian is meegevoer deur die nuwe projek, en Pippa terg Christiaan oor Mia. At vra Rossouw se hulp na ‘n gesprek met Ivanka, en Jana stap in op ‘n baie ongemaklike situasie.

19:30 Grey’s Anatomy (M-net): Vanaand se episode word ‘n langtermynpasiënt opgeneem wat meer stres op die dokters plaas.

20:00 Fiësta (kykNET): Leipoldtville verteenwoordig die heilsaamheid van die platteland. Eenkeer ‘n jaar hou hulle behoorlike opskop tydens die Kuierfees. Fiësta en ons gas-aanbieder, Andries Vermeulen, kuier saam en verken die omgewing.

20:00 Dominion (M-Net Edge): In vanaand se episode kom Alex, Noma en Michael teen ‘n struikelblok te stand in hul poging om by die huis te kom.

20:00 Those Who Can’t (SABC3): In vanaand se episode is die personeel in mekaar se hare soos vakansiekoors hoog loop.

20:30 SuperRugby (KykNET): Kenners kyk na die jongste ontwikkelinge in die rugby-wêreld. Ateljeegaste neem ook deel aan besprekings en beantwoord kykers se inbelvrae.

21:20 The Walking Dead (FOX): Daryl, Sasha en Abraham sukkel vreeslik om terug by hul makkers in Alexandria te kom.

21:30 Madam Secretary (M-Net): In vanaand se episode verdwyn ‘n Russiese duikboot in Amerikaanse waters.

22:00 kykNet Aktueel – Insig (kykNET): Die redakteur van Rapport, Waldimar Pelser, is aan die stuur van hierdie geselsprogram wat dikwels ‘n politieke inslag het. Die program sluit aan by ‘n trotse tradisie van Afrikaanse kritiese joernalistiek.

22:00 Chicago Fire (SABC 3): Volg die avonture van die brandweermanne van die Chicago brandweer deur hierdie intieme kykie na hul persoonlike sowel as professionele lewens.

Hierdie kan dalk in een van daardie legendariese grappies ontaard – die soort wat altyd begin met “Daar was ‘n Ier, ‘n Skot en ‘n Engelsman….”

In hierdie geval gaan daar egter net een karakter wees: ‘n Ier genaamd Joseph P. Griffin. Toe hy onlangs ‘n draai in Las Vegas gemaak het, het sy seun dit goedgedink om pa met ‘n GoPro en ‘n selfiestok toe te rus. Maar hy het vergeet om behoorlike instruksies te verskaf.

Die gevolg? Beslis een van die allersnaakste videos wat jy nog ooit van iemand se vakansie gesien het. Want Joseph P. Griffin het die kamera agterstevoorom op die selfsiestok vasgemaak. Maar wag, laat ons nie jul pret bederf nie.

Loer gerus hier na die video.

Terwyl talle op sosiale media hul dank uitspreek oor reën wat uiteindelik verligting bring vir groot dele van Gauteng, het hael ‘n towerwêreld geskep.

‘n Brug in Brakpan is geheel ontoeganklik en verkeerschaos is aan die orde van die dag.

KLIEK HIER vir wenke oor padveiligheid en vloedrisiko’s vir bestuurders en voetgangers

A Collection on Twitter

Wat jou sterre vandag voorspel met Joanne Moore

JOU DAG
Maak tyd om op kreatiewe maniere met ander te skakel.

AS JY VANDAG VERJAAR
Jy hou daarvan om ander te help. Probeer om meer diplomaties te wees wanneer hulle nie by jou hoë standaarde kan byhou nie. Maak gereelde ontspanning in 2016 ’n prioriteit.

RAM 21 Mrt.-20 Apr.
Moenie vandag oorhaastig tot gevolgtrekkings kom nie. Kommunikeer duidelik en maak seker van die feite voor jy reageer. Kontak met vriende maak jou entoesiasties vir gesamentlike projekte in die toekoms.

BUL 21 Apr.-21 Mei
Met Venus en Mars in jou welstandsone is dit tyd om proaktief oor gesondheid, fiksheid en ’n oefenroetine, wat jy werklik geniet, te wees.

TWEELING 22 Mei-21 Jun.
Venus spoor jou aan om bestaande vriendskappe te koester terwyl proaktiewe Mars jou motiveer om ’n opwindende, nuwe groep te soek by wie jy aanklank vind. Jy kan nooit te veel vriende hê nie!

KREEF 22 Jun.-23 Jul.
Probeer om regtig te verstaan waarom ’n gesinslid bekommerd is. Met deernis, samewerking en ’n proaktiewe gesindheid kan jy die verhouding verander.

LEEU 24 Jul.-23 Aug.
Daar is twee maniere waarop jy tans jou verhoudings met geliefdes kan verbeter: begin praat en raak kreatief. Hoe meer jy met hulle praat en saam met hulle dinge skep, hoe beter sal jul verhouding wees.

MAAGD 24 Aug.-23 Sep.
Jy is lus om met ’n wye verskeidenheid mense te gesels en is baie nuuskierig. Daar is onvoorspelbare energie in die lug en jou brein wil bars van al jou innoverende idees.

WEEGSKAAL 24 Sep.-23 Okt.
Die meeste Weegskale is groot uitstellers en kan dit moeilik vind om besluite te neem. Mars in jou teken help jou om vinnig besluite te neem en daarby te hou.

SKERPIOEN 24 Okt.-22 Nov.
Die son en Mercurius se ligging is fantasties vir studie, navorsing en nadenke. Jy leer ken jouself selfs beter. Span jou innerlike wysheid in vir die antwoorde waarna jy soek.

BOOGSKUTTER 23 Nov.-21 Des.
Met die son en Mercurius in jou sone vir afsondering is jy nie so gesellig soos gewoonlik nie. Maak tyd om te dagdroom, te mediteer, dinge te oordink en net rustig te word.

STEENBOK 22 Des.-20 Jan.
Betrekkinge met ander verloop nie volgens plan nie – veral waar geld betrokke is. Net omdat jy versigtig met kontant en skuld is, beteken dit nie die mense om jou is ook so nie.

WATERDRAER 21 Jan.-19 Feb.
Die son en Mercurius se ligging is wonderlik vir werk, want dit vermeerder jou selfvertroue en oorredingsvermoë. Soek jy werk? Dis nou tyd om iets daaromtrent te doen!

VIS 20 Feb.-20 Mrt.
Met die son en Mercurius in jou ambisiesone kan jy uitdagende doelwitte vir die toekoms stel. Moenie toelaat dat vrees of mislukking jou keer om jou drome te bewaarheid nie. Wie nie waag nie wen nie!

Jy kan enige verskeidenheid neute byvoeg en die sjokolade deur rosyne vervang.

Bereiding: 10 min.
Bak: 35 min.
Lewer 16

250 ml (1 k) meel
2,5 ml (½ t) bakpoeier
1 ml (¼ t) koeksoda
’n knippie sout
125 ml (½ k) krakerige grondbonebotter
60 g botter
200 ml (¾ k) bruinsuiker
80 ml (⅓ k) strooisuiker
2 eiers
5 ml (1 t) vanieljegeursel
125 ml (½ k) neute, gekap
125 ml (½ k) sjokoladeskyfies

Voorverhit die oond tot 180 °C. Voer ’n vierkantige bakpan met bakpapier uit en laat vou orige papier buiteom die rand van die pan.

1. Meng die meel, bakpoeier, koeksoda en sout in ’n bak. Klits die grondbonebotter en botter in ’n ander bak tot glad. Voeg die suikers by en klits tot goed gemeng. Klits die eiers en vanielje in.
2. Roer die meelmengsel by die bottermengsel in en voeg die neute en sjokolade by. Giet dit in die voorbereide pan en bak 35 min. of tot ’n steekpen skoon uitkom. Laat koel heeltemal af op ’n draadrak en sny dan in blokkies.

Deur Hope Malau

Charlie Sheen gaan glo Dinsdagoggend gerugte dat hy MIV-positief is aanspreek in ’n openhartige TV-onderhoud met Matt Lauer, aanbieder van die Today Show. Hy gaan ook ’n “onthullende persoonlike aankondiging” maak, lui ’n persverklaring.

Skinderblaaie regoor die wêreld het die afgelope paar weke bespiegel oor wie die ster is wat MIV-positief is. Die Britse koerant The Sun het die tonge laat klap nadat dit ’n artikel geplaas het oor die A-lys-akteur, wie se naam nie genoem is nie, wat glo “paniek” in Hollywood veroorsaak.

Die akteur wou nie die gerugte bevestig nie, maar die vername Hollywoodse reklameagent en krisisbeheerbestuurder, Howard Bragman, het die gerugte aangevuur deur ná die aankondiging aan die tydskrif People te sê mense na aan Charlie het hom ses maande terug genader om te help met die krisis, maar dat hy nooit direk met die ster gewerk het nie.

“Die onderhoud kan baie simpatie vir hom ontlok, maar hy is waarskynlik bekommerd dat voormalige seksmaats hom sal wil dagvaar,” het Howard gesê. “’n Mens neem nie so iets ligtelik op nie.”

Hy’t bygevoeg dat Charlie behandeling ontvang en dat diegene na aan die voormalige ster van Anger Management weet van sy gesondheidsprobleme.

“Dit gaan al ’n ruk lank aan. Hy’s nie noodwendig gemaklik om daaroor te praat nie. Dit was baie moeilik vir hom om die moed bymekaar te skraap om daaror te praat. Ek weet al vir ’n ruk lank hiervan, dis nie vir my ’n verrassing nie. Ek voel jammer vir hom en die pyn wat hy deurmaak. En ek hoop die wêreld leer iets hieruit. Dis ’n siekte wat enigeen kan raak.”

Jeff Ballard, Charlie se jarelange reklameagent, het ook met die tydskrif gepraat en gesê die akteur is nie meer sy kliënt nie. “Ons het verskil oor hoe om die situasie te hanteer en ons paaie het geskei. Ons was vir 35 jaar lank vriende en ek het hom lief. Ek wens hom net die beste toe.”

© Cover Media

Skokkende nuwe syfers toon baie vroue weet nie wat die vroeë waarskuwingstekens van borskanker is nie.

Meer as 1 100 vroue is betrek by ’n opname deur die liefdadigheidsorganisasie Breast Cancer Care en hoewel 96 persent van hulle geweet het ’n knop is ’n aanduiding van die siekte, kon baie van hulle nie die ander simptome identifiseer nie.

’n Hele 39 persent het nie geweet rooiheid of ’n uitslag is dalk ’n teken dat iets nie pluis is nie, en 28 persent het nie geweet ’n ingeduikte tepel is ’n moontlike aanduiding nie.

Daar is ook bevind ’n derde van die vroue wat deelgeneem het, ondersoek nie hul borste gereeld het nie, en een vyfde van dié wat nie hulself ondersoek het nie, het erken dat hulle nie weet hoe om dit behoorlik te doen nie.

“Dit behoort deel van ’n vrou se roetine te word”

“Ons weet vroeë opsporing kan lei tot doeltreffender behandeling,” het Samia al Qadhi, uitvoerende hoof van Breast Cancer Care, gesê. “Laat vandag die dag wees waarop jy begin om jou borste te leer ken.”

Die Nasionale Gesondheidsdiens se riglyne oor hoe om jou borste te ondersoek is eenvoudig en dit behoort deel van ’n vrou se roetine te word.

Om knoppe op te spoor, is die raad: “Kyk na jou borste en bevoel elke bors en okselholte, en voel dan op tot by jou sleutelbeen. Dit kan vir jou makliker wees om dit in die stort of bad te doen, want dan kan jy met ’n seperige hand oor jou bors en onder elke oksel voel.”

“Enige ongemak in die borste”

“Jy kan ook jou borste in die spieël bekyk. Hou eers jou hande langs jou sye terwyl jy kyk en hou hulle dan omhoog.”

Behalwe rooiheid, uitslag en ’n ingeduikte tepel, moet jy ook let op veranderinge in die grootte en die vorm van jou bors, hoe jou vel lyk en voel (kuiltjies en rimpeling), verdikte en knopperige dele en enige ongemak in die borste.

Afskeiding van jou tepels wat nie melkerig of bloederig is nie, is ook tekens, en so ook ’n klam of rooi kol op jou tepel wat nie maklik gesond word nie. Wees ook bedag op veranderinge in die posisie van die tepel.
Intussen is daar vooruitgang wat die behandeling van borskanker betref.

Een hiervan is ’n eenvoudige bloedtoets wat deur Britse wetenskaplikes ontwikkel is. Die nuwe metode, wat die trauma verminder waaraan pasiënte blootgestel word, behels die neem van bloedmonsters pleks van weefsel en daardeur kan gevaarlike veranderings in tumors opgemerk word.

Dit kan vroue met gevorderde kanker langer help leef.
© Cover Media

Pretoria – Die angs van vier ouers wie se kinders vyf jaar gelede met hul geboorte omgeruil is, is besweer toe die hooggeregshof in Pretoria Maandag gelas het dat die kinders bly by die ouers wat hulle grootgemaak het.

Die omruiling het 18 maande gelede aan die lig gekom toe een van die ma’s haar kêrel vir agterstallige onderhoud gedagvaar het. Toe hy ouerskap ontken, het DNS-toetse getoon nie een van hulle is die kind se biologiese ouers nie.

Daarna is ontdek ’n verpleegster by die Tambo-gedenkhospitaal in Boksburg het die twee babas, ’n seun en ’n meisie, se naamkaartjies omgeruil ná hul geboorte in Augustus 2010.

Groot was die skok toe DNS-toetse toon nie een van hulle is die kind se biologiese ouers nie.

Maandag het adjunkregterpresident Aubrey Ledwaba en twee mederegters ’n bevel toegestaan waarvolgens die ouers nou as die wettige aanneemouers van hul “sielkundige” kinders beskou word. Hulle sal geen wettige reg oor hul biologiese kind hê nie, maar die hof het hul reg bevestig om kontak met hul biologiese kind te hê.

’n Ouerskapskoördineerder sal aangestel word om oor die proses toesig te hou. Dié sal met die ouers saamwerk, asook met ’n terapeutiese ondersteunings-en-integrasiespan wat reeds by die saak betrokke is. Die staat sal die koördineerder betaal.

Een van die ma’s wou aanvanklik haar biologiese kind teruggehad het, maar ná sielkundige berading het al die ouers saamgestem dis in die kinders se beste belang as hulle bly waar hulle is.

Aubrey het dit duidelik gemaak die deure van die hof, as die oppervoog van alle kinders, staan oop as enige probleme ontstaan wat nie opgelos kan word nie.

Hy het aanvanklik gesê as die hof nie ’n tussentydse bevel toestaan nie, kan die kinders later ’n sê hê oor waar hulle kan bly wanneer hulle ouer is.

Maar prof. Ann Skelton het aangevoer dit sou nie in hul beste belang wees nie, want hulle het sekerheid en kontinuïteit nodig. Die hof het Ann aangestel om te ondersoek wat in die kinders se beste belang sou wees, asook die ingewikkelde kwessies wat daarby betrokke is.

Tydens vorige hofverrigtinge het Aubrey opgemerk dit is duidelik die partye sal moet saamwerk en ’n ooreenkoms bereik waarmee almal tevrede is.

“Dit is nie ’n saak waar enigiemand kan sê hulle het gewen nie. Dit is ’n saak wat op die ou end die kinders moet bevoordeel,” het hy gesê.

Die hofbevel sal die weg baan vir ’n siviele eis deur die ouers teen die gesondheidsowerhede.

Bron: News24

‘n Bejaarde kankerpasiënt van Newcastle in Engeland het gesterf nadat sy ‘n paar maande gelede in ‘n grusame fratsongeluk op ‘n elektriese saag geval het.

Mary Riley (70) moes 50 steke in haar gesig en 11 steke op haar knie kry toe sy oor werkersgereedskap gestruikel het en op ‘n elektriese saag te lande gekom het. Die gereedskap is glo deur die werkers agtergelaat toe hulle verbeteringe aan haar huis in ’n aftreeoord aangebring het.

Mary het in daardie stadium reeds longkanker gehad en het chemoterapie ondergaan toe die aaklige voorval plaasgevind het. Boonop het die kanker in hierdie stadium ook na haar brein begin versprei.

“Sy moes haar chemoterapie staak as gevolg van haar beserings en was net nooit weer sterk genoeg daarna om die behandeling te hervat nie,” het haar dogter Charlotte Farndale aan metro.co.uk gesê.

“My ma het vir bykans ‘n jaar gesukkel met die beserings wat sy opgedoen het. Sy het permanent in pyn verkeer en ‘n ellendige kwaliteit van lewe gehad. Haar knie het net nooit regtig genees nie,” het sy gesê.

Ná die val het Mary ’n lelike letsel oor haar gesig gehad waar die elektriese saag haar gesny het.

Charlotte is oortuig dat haar ma se lewe deur die kanker sowel as haar beserings beëindig is.

“Ons is uiters jammer om van Mary se dood te hoor,” het Olivia Grant, voorsitter van die aftreeoord waar Mary gewoon het, gesê. “Ons verstaan daar is ‘n uitstaande eis met die kontrakteur. Daarom sal dit onvanpas van my kant wees om verder kommentaar te lewer terwyl die saak ondersoek word.”

Charlotte hoop om met ‘n eis teen die subkontrakteur voort te gaan ongeag haar ma se dood.

Bron: metro.co.uk

Dit is vanaand op die kassie:

17:00 Days of our lives (SABC 3): Dié immergewilde sepie het al meer as 12,000 episodes uitgesaai sedert dit in 1965 begin het.

17:30 Jan Braai vir Erfenis (kykNET): Jan toer steeds deur Ierland. Dis ‘n aksiebelaaide avontuur wanneer Jan branderplank ry, bergfiets ry, roei en boogskiet. Hy leer hoe ‘n salmon fabriek werk en wys jou hoe om heerlike vis te rook en ‘n Ierse sodabrood te bak.

17:30 Kersie op die Koek (VIA): Warm ouerharte via suikersoet kinders. Opvreetbare seuns en dogters ontmoet in sjef Renoir Sardinha en Loandi Boersma se studio om ’n kreatiewe dankie-sê-koek as verrassing vir ma of pa te versier.

18:00 About a Boy (M-Net): Hierdie komedie is gebasseer op die gelyknamige boek. Will Freeman se lewe verander heeltemal toe ‘n enkelma en haar 11-jarige seun langs hom intrek.

18:00 Zavion (VIA): Zavion paalspring weer vir die eerste keer in 18 maande. Sy afrigter laat Zavion duidelik verstaan dat hy baie ure moet insit om Olimpiese hoogtes te behaal. Swaar reënwolke dreig om ’n sprokiestroue in die wiele te ry.

18:00 How I Met Your Mother (e.tv HD): In die skreeusnaakse komedie vertel die ouer Ted aan sy twee kinders presies hoe hy hulle ma ontmoet het.

18:30 Villa Rosa (kykNET): Liam begin weer konkel – sy planne is netjies uitgewerk. Celine word al minder bestand teen Alex se sjarme. Marius dink hy het Liam onder beheer, maar Liam bly hom een voor.

18:30 7de Laan (SABC2): Errol deel sy bekommernis met Vince en hulle besluit om saam teen Xander op te staan.

19:30 Binnelanders (kykNET): Jana soek antwoorde by Karli, en ‘n dokter moet misverstande uit die weg ruim. Mia stamp koppe met Rian, en At se visier is ingestel op Steve. Naomi deel haar geheim met Marinda, en Tim beraam ‘n gevaarlike plan.

20:00 Edik van Nantes (kykNET): Die gebruike van appels is ontelbaar. Dit is een van Nantes se bekendste produkte en vir jare ‘n gunsteling in Nataniël se kombuis. Hy en Erik baljaar behoorlik met appels, van kos tot kuns.

20:00 Homeland (M-Net Edge): In vanaand se episode klop Carrie aan vir hulp by van haar ou vriende. Saul vermoed iemand lek inligting.

20:30 Bloedbroers (kykNET): Die stof het gaan lê na die staking en elk van die bloedbroers moet nou met die nagevolge daarvan hanteer. Gerhard word in hegtenis geneem en PG besluit om eerder sy besigheid te verloor as om sy gewete te verloën.

20:30 Minority Report (Fox): Meer as 10 jaar ná die ontbinding van die pre-misdaadeenheid, wat toekomstige misdadigers gevang het voor hulle misdade pleeg, probeer ‘n eensame oudlid, wat die vermoë het om misdade te voorspel, ‘n normale lewe lei.

21:00 The Good Wife (SABC3): ‘n Familie- en regsdrama met die formidabele Julianna Margulies in die hoofrol.

21:20 Lee Harvey Oswald: 48 Hours to Live (History): Die skieter van JFK se laaste lewensure word ondersoek.

21:30 Chicago PD (M-Net): In vanaand se episode word ‘n kind ontvoer wat na aan Dawson se hart lê.

22:00 Desperate Housewives (SABC3): Die dames van Wisteria Lane konkel onder mekaar met allerhande intriges wat volg.

22:00 Winslyn (kykNET): Divan Botha maak ingewikkelde plaaslike en internasionale ekonomie meer verstaanbaar.