As jy ’n glas wyn of twee gedrink het, moet jy eerder van sosiale media wegbly, veral as jy ’n bekroonde sangeres soos Adele is.

Sy het onlangs erken haar bestuur keur haar Twitter-boodskappe goed voor dit gestuur word, want sy het haar al daaraan skuldig gemaak om te twiet terwyl sy dronk was.

Die 27-jarige – wat onlangs Hello, haar eerste enkelsnit in vier jaar, uitgereik het – het erken toe Twitter begin het, het sy dikwels getwiet terwyl sy onder die invloed was.

“Ek bedoel ek drink nie meer nie, maar toe Twitter bekendgestel word, het ek getwiet terwyl ek dronk was en ’n hele paar keer amper ’n blaps begaan,” het sy tydens ‘n spesiale TV-aanbieding op BBC gesê.

Maar die twiets wat sy aan haar bykans 24 miljoen volgelinge stuur, is steeds haar eie. “My bestuur het besluit dit moet deur twee mense gaan en dan moet iemand dit afteken, maar dit is alles my twiets.”

“Niemand skryf my twiets vir my nie. Hulle plaas dit net vir my.”

BRONNE: dailymail.co.uk, telegraph.co.uk

Dit is vanaand op die kassie:

17:00 The Ellen DeGeneres Show (M-Net): Ellen is weer op haar beste! Die komediant gesels met bekendes, gewone mense met buitengewone stories en voer ’n paar danspassies uit.

17:30 Hier gaan ons alweer! (kykNET): Petri de Wet en Loukie van der Merwe hengel in ‘n publieke dam vir trofee Karpe. Ten spyte van moelike hengel-omstandighede, maak Petri geskiedenis, waneer hy die grootste Karp vang wat al ooit op S.A. televisie gewys is.

17:30 Inspirasiekos met Sarie (via.): Pure plaaskos via Herman, die stadskok. Die talentvolle SARIE-kosredakteur, Herman Lensing, is op soek na ons beste bestanddele. Hy ontmoet die passievolle persoonlikhede agter die bestanddele – en kook dan ’n feesmaal!

18:00 The Goldbergs (M-Net): Leef jou weer in die 80’s in met hierdie wilde familie en leef saam met hulle die lewe se struikelblokke en hoogtepunte uit.

18:30 Villa Rosa (kykNET): Marius en Liam se onheilige alliansie duur voort. Vicky verras Eben met haar nuwe toekomsplanne. Cardo ontdek iets skokkends en Monique vermy die waarheid oor Vincent. Saskia stamp kop met Fritz.

18:30 7de Laan (SABC2): Die inwoners van die Heights is op hete kole: is die gebou aan die brand?! Oubaas is vasoortuig Kim is besig met onaardse goed.

18:30 The X Factor UK (M-Net): Die Verenigde Koninkryk se beste onontdekte talent word in hierdie talentkompetisie ontgun.

19:00 Helix (M-Net Edge): In hierdie gruwelreeks hou die uitbreek van ‘n virus in die Arktiese streek ‘n groot gevaar vir die mensdom in.

19:30 Binnelanders (kykNET): Dit is duidelik dat twee dokters nie genoeg van mekaar se geselskap kan kry nie. Steve se skoonpa daag op, Lisa rig nog ‘n waarskuwing aan Steve, en ‘n groot belegger kyk die kat goed uit die boom.

19:30 Grey’s Anatomy (M-net): Vanaand se episode word ‘n pasiënt met ‘n vernederende siekte oor geskinder deur die hospitaalpersoneel.

20:00 Fiësta (kykNET): Ons draai in Heidelberg vir hulle gewilde Varkfees. Met heerlike kos, opkomende en groot sterre wat optree, fietsry en selfs toneel, is hierdie ‘n ware makietie vir die feesgangers. Cordelia is ons gas-aanbieder.

20:00 Dominion (M-Net Edge): In vanaand se episode maak Claire vir Zoe dood, William is terug in Vega, en Michael ontmoet Mallory se profeet.

20:00 Those Who Can’t (SABC3): In vanaand se episode begin die onnies staak ná Zeke besluit om hul 13de tjek te ontneem.

20:30 SuperRugby (KykNET): Kenners kyk na die jongste ontwikkelinge in die rugby-wêreld. Ateljeegaste neem ook deel aan besprekings en beantwoord kykers se inbelvrae.

21:20 The Walking Dead (FOX): Die inwoners van Alexandria is bedroef na ‘n rits terugslae.

21:30 Madam Secretary (M-Net): In vanaand se episode sit Elizabeth met ‘n diplomatieke gemors wanneer die vorige finansminister op die Griekse skuldkrisis reageer deur kunswerke van dié land te “konfiskeer”.

22:00 kykNet Aktueel – Insig (kykNET): Die redakteur van Rapport, Waldimar Pelser, is aan die stuur van hierdie geselsprogram wat dikwels ‘n politieke inslag het. Die program sluit aan by ‘n trotse tradisie van Afrikaanse kritiese joernalistiek.

22:00 Chicago Fire (SABC 3): Volg die avonture van die brandweermanne van die Chicago brandweer deur hierdie intieme kykie na hul persoonlike sowel as professionele lewens.

Bloemfontein – Die liggaam van ’n matriekleerder is Vrydag by die Petunia Sekondêre Skool in Heidedal gevind waar sy haarself gehang het.

Die meisie, Charneil Wilson (18), het vroeër die dag haar ma met ’n skoolfunksie gehelp, het Harward Ndaba, woordvoerder van die departement van onderwys, gesê.

“Toe hulle klaar vir die funksie voorberei het, het die ma en drie van die meisie se vriende die klaskamer verlaat en sy’t agterbly,” sê Harward.

Toe haar ma terugkeer na die klaskamer was dit gesluit. Harward sê toe die kind se ma deur die venster kyk, het sy haar dogter van die plafon sien hang.

“Sy het nie ’n briefie agtergelaat nie. Ons het selfs haar foon nagegaan en daar’s niks,” het hy gesê en bygevoeg dat Charneil ’n slim student was.

“Daar is hulp daarbuite”

Haar familie wou nie kommentaar lewer op die voorval nie. Intussen het die Suid-Afrikaanse Depressie-en-angsgroep (Sadag) gesê selfdood en depressie onder tieners kom al hoe meer voor.

Selfdood is nie al manier om probleme op te los nie, het Cassey Chamber, bedryfsdirekteur van Sadag, gesê. “Tieners is nie alleen nie. Daar is hulp daarbuite. Dit kan jou regtig help om jou probleme die hoof te bied as jy met iemand praat. Selfdood is ’n permanente oplossing op ’n tydelike probleem.”

Bron: News24

Wat jou sterre vandag voorspel met Joanne Moore

JOU DAG
Dis ’n wonderlike dag om ’n lastige probleem op te los.

AS JY VANDAG VERJAAR
Jy is verbeeldingryk en kreatief en sê graag hoe jy voel. Moenie ontmoedig word deur skynbare terugslae in die komende jaar nie – laat jou unieke talente skitter.

RAM 21 Mrt.-20 Apr.
Dit sal nie vandag help om alles vinnig te probeer doen nie. Daar is geen plaasvervanger vir deeglike navorsing en aandag aan klein besonderhede nie. Jy is ekstra gefokus en handel projekte gou en met finesse af.

BUL 21 Apr.-21 Mei
Jy is in die bui vir ernstige gesprekke en bespreek professionele en persoonlike uitdagings met iemand ouer en wyser as jy. ’n Gedeelde probleem is ’n gehalveerde probleem.

TWEELING 22 Mei-21 Jun.
Met magtige Pluto in Mercurius se gebied sal jy raakgesien word waar jy ook al gaan. Jy is gemotiveerd en selfversekerd. Benut die positiewe omstandighede ten volle.

KREEF 22 Jun.-23 Jul.
Aanvaar verantwoordelikheid vir jou aandeel in die probleem as jy ’n moeilike tyd met ’n kind of tiener beleef. Jy is tans baie kreatief – luister na jou innerlike muse.

LEEU 24 Jul.-23 Aug.
Jy is lus om vandag jou eie ding te doen en vry te wees van ekstra verantwoordelikhede en irriterende beperkings. Jou kommunikasiesone is geaktiveer en jy ruil stories met ander uit.

MAAGD 24 Aug.-23 Sep.
’n Verstandige, gestruktureerde en versigtige benadering is die beste manier om vandag die positiewe ligging van die planete te benut. Moenie vergeet om pret te hê nie.

WEEGSKAAL 24 Sep.-23 Okt.
Die Weegskaal skitter helder met Venus wat tot 5 Desember in jou teken vertoef. Jy is lus om te sê hoe jy voel en ander sal fokus op wat jy te sê het.

SKERPIOEN 24 Okt.-22 Nov.
Die verbinding tussen Mercurius en Pluto gee jou ambisie ’n hupstoot. Jy kommunikeer met ekstra selfvertroue en sjarme. Dis ’n fantastiese dag om op kragdadige wyses positiewe veranderinge te maak.

BOOGSKUTTER 23 Nov.-21 Des.
Die ’n wonderlike dag om navorsing te doen. Jy is gefokus en vind ’n verduideliking vir ’n lastige probleem. Die omstandighede is ook goed om met kinders te speel en jy raak weer bewus van die kind in jou.

STEENBOK 22 Des.-20 Jan.
Jy is vandag selfversekerd en Mercurius en Pluto help jou om ’n uitdaging baas te raak. Put inspirasie uit die woorde van die bekende sjef Julia Child: “Die enigste ware struikelblok is vrees vir mislukking.”

WATERDRAER 21 Jan.-19 Feb.
Oppervlakkighede sal nie vandag werk nie. ’n Huidige probleem tuis of by die werk vereis ’n gefokusde benadering terwyl jy vasstel wat werklik aan die gang is.

VIS 20 Feb.-20 Mrt.
Mercurius en Pluto moedig jou aan om sake te ondersoek en bestudeer voor jy jou goedkeuring gee. Wees proaktief wanneer jy uitdagings aanpak en projekte vinnig afhandel.

Die Nasionale Kredietreguleerder (NKR) raai verbruikers aan om hul gratis kredietverslae te kry, sodat hulle kan weet wat die status van hul kredietwaardigheid en –tellings is.

Volgens Mpho Ramapala, die NKR se bestuurder rakende opleiding en kommunikasie, is verbruikers, luidens die Nasionale Kredietwet (NKW), geregtig op een gratis kredietverslag per jaar by enige van die 14 geregistreerde kredietburo‘s.

Kredietburo’s is in besit van positiewe inligting, byvoorbeeld van verbruikers wat hul rekeninge betyds betaal, sowel as negatiewe inligting, byvoorbeeld waar ’n verbuiker agtergeraak het met betalings of glad nie betaal het nie.

“Die kredietburo het 20 werkdae tyd om die saak te ondersoek“

Ramapala het gesê dit is verbruikers se reg om toegang te hê tot hul kredietverslae en die inligting te bevraagteken indien hulle glo dat dit nie akkuraat is nie.

“As die verbruiker ’n verslag van ’n kredietburo bevraagteken, moet hy/sy die kredietburo nader wat die kredietverslag uitgereik het. Die kredietburo het 20 werkdae tyd om die saak te ondersoek,“ het sy gesê.

As ’n verbruiker ’n ekstra kopie van sy of haar kredietverslag in dieselfde jaar wil hê, sal die kredietburo’s vergoeding daarvoor verlang, sê Ramapala.

Jeannine Naudé Viljoen, die uitvoerende bestuurder van die KBR, het gesê: “Elke persoon wat ’n rekening by ’n krediet- of diensverskaffer in die land het of wat van kredietverskaffingsdienste gebruik maak, sal vind dat die geskiedenis van hul betalingsgedrag by ’n kredietburo aangeteken is, of die persoon nou sy/haar rekening gereeld betaal, al dan nie.”

“Die doel van die kredietburo’s se kollektiewe aantekening van inligting is om ’n omvattende beeld van die verbruiker te skep vir voornemende, sowel as bestaande, krediet- en diensteverskaffers, ten einde hulle te help om nuwe aansoeke om kredietrekenings te evalueer, en ook om hulle te help met die bestuur van hul verhoudings met kliënte,” het sy verduidelik.

Hier volg’n lys van die kredietburo’s:

• Compuscan – 0861 514 131
• 
Consumer Profile Bureau (CPB) – 010 590 9505
• 
Credit Watch– 086 100 0694
• 
Crosscheck Information Bureau – 0105 909 505
• Experian SA – 0861 105 665
• Inoxico – 010 001 0540
• 
LexisNexis Risk Management – 011 245 6500
• 
Managed Integrity Evaluation – 012 644 4000
• Robertsons International Reports – 011 777 4000
• South African Fraud Prevention Services – 011 867 2234
• 
Tenant Profile Network – 086 187 6000
• TransUnion – 0861 482 482
• 
Vericred – 018 294 1000
• Xpert Decisions Systems (XDS) – 011 645 9100

Bron: Fin24

Meer op Fin24
MTN-hoof se vertrek ‘n verlies
Veiligheidsonderbrekings kortwiek AngloGold

Pide is ’n Turkse gereg van pizzadeeg wat soos ’n pantoffel gevorm is met ’n soutige vulsel.

Genoeg vir 4 mense
Bereiding: 10 min.
Gaarmaak: 10 min.

Deeg
5 g gis
5 ml (1 t) suiker
100 ml louwarm water
250 ml (1 k) meel
5 ml (1 t) sout
1 eiergeel gemeng met 5 ml (1 t) water
Vulsel
300 g maalvleis, gaar
1 suurlemoen, skil
2 hande vol spinasie, gekap
5 ml (1 t) vinkelsaad
5 ml (1 t) fyn koljander
’n hand vol pietersielie

Voorverhit die oond tot 200 ˚C.

1. Deeg Sit al die bestanddele in ’n bak en meng tot ’n deeg vorm. Keer dit uit op ’n oppervlak wat liggies met meel bestrooi is en knie 5 min. of tot glad. Laat staanr 30 min. op ’n warm plek of tot die grootte verdubbel het.
2. Vulsel Meng al die bestanddele in ’n bak en sit eenkant.
3. Verdeel die deeg in die helfte en rol elkeen in ’n reghoek uit. Skep die helfte van die vulsel in die middel van elkeen. Vou dan albei kante oor terwyl jy ’n gaping in die middel los en knyp die punte saam.
4. Plaas op ’n gesmeerde bakplaat, verf met die eierwas en bak 10 min. of tot goudkleurig.

Deur Hope Malau
Foto: Megan Miller

Kalifornië. Eers sien jy net ’n aansienlike groot bol wol. En dan iewers tussenin, ’n snuffelende pienk neus en twee ore. Dan besef jy: dis ’n Angora-konyn wat hier sit.

Om seker te maak elke konyn is reg vir enige van die tot 50 kompetisies per jaar, is harde werk. Elkeen van die kompetisiekonyne word elke dag gekam en gestileer – iets wat die konyne oënskynlik baie geniet. Dr. Betty Chu, eienaar van die konyn, se gunstelingkonyn, Franchesca, het gespog met ’n haredos wat byna 37 cm lank is. Sy het ook in die Guiness Book of Records verskyn.

Natuurlik besorg die haredos ’n mens ook heelwat hoofbrekens. Toe dit tyd is dat Franhcesca ’n nuwe nageslag moet voortbring, het die hare letterlik gewaai. Die pragtige babakonyne het gelukkig meer as vergoed daarvoor.

Bron: YouTube

Djakarta. Luidens ’n plan wat die agentskap teen narkotika ingedien het, kan krokodille dalk binnekort gebruik word om Indonesiese dwelmgevangenes op te pas.

“Budi het voorgestel dat ’n tronk op ’n afgeleë eiland gebou en deur krokodille opgepas moet word as die wet nie daarin slaag om misdadigers af te skrik nie,” het Slamet gesê. “As hulle dan probeer ontsnap, sal hulle opgevreet word.”

“Die land het vanjaar 14 gevonnisde dwelmsmokkelaars tereggestel”

Om te wys hoe ernstig hy oor die saak is, het Budi drie provinsies besoek om die aggressiefste krokodille te soek. Hy maak kommer oor die gevangenes se regte af.

“Dit is nie ’n skending van menseregte as die krokodille die doodmaakwerk doen nie,” het hy in ’n skynbaar lighartige stemtoon opgemerk.

Indonesië is onverbiddelik wat dwelmsmokkelary betref en voer aan dwelms het gelei tot ’n noodtoestand in die land. Die land het vanjaar 14 gevonnisde dwelmsmokkelaars tereggestel en internasionale druk vir begenadiging geïgnoreer.

Tog bly dwelms volop in Indonesiese tronke, en soms is bewaarders vasgetrek wat dwelmtransaksies help beklink het waarby gevangenes betrokke was.

Volgens die departement van justisie wag minstens 121 mense op teregstelling in Indonesië, en die meeste van hulle is weens dwelmverwante misdade gevonnis.

Bron: News24

’n Ligter jy via jou slanker sielsgenoot. In Deur Dik en Dun, van vanmiddag 16:00 af op VIA, pak vier paartjies mekaar in ’n gewigstryd. Maar net een van die wederhelftes is oorgewig, die ander een moet ondersteun. Hul liefde word tot die uiterste getoets terwyl die skaal praat.

Hierdie is die vier inspirerende paartjies wie se vordering ons elke week gaan dophou:

• 1
• 2
• 3
• 4

« »

Elsie en Eugene Immelman

Naam: Elsie Immelman
Ouderdom: 37
Beroep: Huis- en sakevrou
Blyplek: Brakpan
Gewig aan begin van program: 79,6 kg

Naam: Eugene Immelman
Ouderdom: 40
Beroep: Kommunikasietegnikus
Blyplek: Brakpan

Chanél Erasmus en Ian Beirowski

Naam: Chanél Erasmus
Ouderdom: 28
Beroep: Hanswors en dekorspesialis
Stad: Centurion
Gewig aan begin van program: 139 kg

Naam: Ian Beirowski
Ouderdom: 32
Beroep: IT-programmeringstudent
Stad: Centurion

Estelle en Avril van Zyl

Naam: Estelle van Zyl
Ouderdom: 45
Beroep: Rekeningbestuurder
Blyplek: Randburg, Johannesburg
Gewig aan begin van program: 136 kg

Naam: Avril van Zyl
Ouderdom: 48
Beroep: Skoolhoof
Blyplek: Randburg, Johannesburg

Genene Marais en Shaun Smit

Naam: Genene Marais
Ouderdom: 22
Beroep: Werwingsbestuurder
Blyplek: Centurion
Gewig aan begin van program: 95,1 kg

Naam: Shaun Smit
Ouderdom: 24
Beroep: Masjienmonteur
Blyplek: Centurion

Ons het elke paartjie bietjie gaan pols om meer oor hulle uit te vind:

Ontmoet vir Elsie en Eugene Immelman:

Hoe het julle mekaar ontmoet?
Elsie: Baie jare gelede het ons die heerlikste kuierplek in Springs gehad: Murray Park. Ek en my vriendin was daar om die skoolvakansie (ek was toe 16) en ons goeie rapporte te vier. Eugene was saam met sy vriende daar. Ons het lekker gesels, en hy het my die aand op ons eerste date gevat. Ek was maar baie skepties, want ek kon nie glo hy stel in my belang nie. Maar, ja, van toe af is ons saam, al was dit ook nie altyd net maanskyn en rose nie.

En hoe lank is julle al saam?
Elsie & Eugene: Ons is nou al amper 22 jaar saam, waarvan ons 18 jaar getroud is.

Wat het julle laat besluit om deel te neem aan Deur Dik en Dun?
Elsie: Ek het arme Eugene en die kinders nie eintlik ’n keuse gegee nie. Ek is raadop met my gewig, maar het nie die uithouvermoë of kennis om deur te druk met ’n gesonder leefstyl nie. Ons lewe is in ’n rigiede roetine: slaap, eet, werk! Op die ou end is die lewe net te kort daarvoor. En ek wou sommer almal trots maak!

Was julle senuagtig voor julle op die program verskyn het? Het julle enige voorbereiding gedoen?
Elsie: Ja, en ons is steeds! Ek is maar ’n bangbroek en skrikkerig vir enige verandering, maar almal staan bankvas agter my. Dr. Wian Stander en Lara de Chazal (die voedingkundige) maak dit net soveel beter. Hulle laat ons regtig op ons gemak voel! En nee, ons het glad nie voorbereiding gedoen nie.

Wat doen julle wanneer julle saam wil ontspan?
Elsie: Ons kyk TV. Dis seker nie so gesond nie? Ons is ook mal daaroor om die kinders se sportbedrywighede by te woon, of ons braai net rustig by die huis saam met familie en vriende.

Oorvleuel enige van jul stokperdjies?
Elsie & Eugene: Ons kan eintlik nie onthou wanneer laas ons ’n stokperdjie gehad het nie. Dis ’n skande! Al stokperdjie wat ons het, is ons kinders.

Het julle al van tevore saam ’n dieet probeer volg, oefen of gewig verloor?
Elsie: Nee, glad nie. Dis meestal maar net ek wat altyd kla oor my gewig.

Hoe lyk ’n gewone aandete vir julle twee?
Elsie & Eugene: Baie lekker kossies! Baie vet, baie sous, baie kaas; meestal pasta of die tradisionele vleis, rys, en aartappels. Bitter min van ons etes is sonder aartappels!

Hoe oorkom julle uitdagings, en hoe motiveer julle mekaar?
Elsie: Ons oorkom uitdagings sonder dat ons dit eers agterkom – en met baie gebed. Ons praat maar selde daaroor en verwerk dit op ons eie manier. Ons is al deur baie diep waters, maar tog kom ons elke keer bo uit. Ons het baie goeie vriende en familie. Sonder hulle is en het ’n mens niks in die lewe nie. Ek het wonderlike ouers wat regtig baie help. Ek is maar ’n moeilike mens en het tyd nodig om iets te verwerk, maar Eugene ondersteun my altyd. Ek is wel bereid om daaraan te werk en die lewe van nou af positiewer aan te pak.

Meer oor Chanél Erasmus en Ian Beirowski:

Hoe het julle mekaar ontmoet?
Chanél & Ian: Op die internet.

Hoe lank is julle al saam?
Chanél & Ian: Al 16 maande.

Wat het julle laat besluit om deel te neem aan Deur Dik en Dun?
Chanél: Ek is keelvol vir vet wees.

Was julle senuagtig voor julle op die program verskyn het? Het julle enige voorbereiding gedoen?
Chanél: Nee, nie regtig nie. Ek was meer senuagtig toe ek op die skaal moes klim.

Oorvleuel enige van jul stokperdjies?
Chanél & Ian: Ons hou daarvan om saam video-speletjies te speel.

Het julle al vantevore saam probeer oefen of gewig verloor?
Chanél & Ian: Nee.

Hoe lyk ’n gewone aandete vir julle twee?
Chanél & Ian: Wel, gewoonlik was dit rys, vleis en aartappels. Jy weet, gewone boerekos. Maar nou is dit heeltemal anders.

Hoe oorkom julle uitdagings, en hoe motiveer julle mekaar?
Chanél: Ek huil baie maklik. Ian het net die vermoë om my te laat bedaar en my te laat lag. Ons hou die kommunikasielyn oop. Elkeen weet hy kan met vrymoedigheid praat, sonder dat daar verwyte gaan wees. Ons spoor mekaar aan deur deur dik en dun daar te wees vir mekaar en nooit mekaar se menswees te beledig nie.

Meer oor Estelle en Avril van Zyl:

Hoe het julle mekaar ontmoet?
Estelle & Avril: Ons het mekaar by ’n jeugaand ontmoet.

En hoe lank is julle al saam?
Estelle & Avril: Ons ken mekaar al 27 jaar lank en sal in Desember 25 jaar getroud wees.

Wat het julle laat besluit om deel te neem aan Deur Dik en Dun?
Estelle: Ek het gevoel ek sou baat vind by die program. Ek het dit baie nodig!

Was julle senuagtig voor julle op die program verskyn het? Het julle enige voorbereiding gedoen?
Estelle & Avril: Ja, beslis! Ons was baie senuagtig. Ons het glad nie enigiets beplan nie, want ons het nie regtig geweet wat om te verwag nie.

Wat doen julle wanneer julle saam wil ontspan?
Estelle & Avril: Ons stap graag deur ons buurt en ons kampeer gereeld.

Oorvleuel enige van jul stokperdjies?
Estelle: Ja, ons het onlangs begin staproetes doen. Ons geniet dit, maar dit is soms baie straf. Dit is hoekom ek hierdie program nodig het: sodat ek aan meer staptoere kan deelneem en meer steiltes kan uitklim.

Het julle al van tevore saam ’n dieet probeer volg, oefen of gewig verloor?
Estelle & Avril: Ja, ons het saam probeer oefen . . . dit het nie gewerk nie.

Hoe lyk ’n gewone aandete vir julle twee?
Estelle & Avril: Rys, vleis en aartappels! Of tradisionele trooskos, soos lasagne.

Hoe oorkom julle uitdagings, en hoe motiveer julle mekaar?
Estelle & Avril: Ons het nou ’n doel waarna ons saam streef. Dit maak die program soveel makliker wanneer jy iemand het wat dieselfde doelwitte as jy het. Die ander voordeel is, ek verloor gewig. Dis wonderlik!

Wat jy wil weet van Genene Marais en Shaun Smit:

Hoe het julle mekaar ontmoet?
Genene: Ons het gemeenskaplike vriende. Hy het eendag saam met sy vriende kom kuier, toe was die koeël deur die kerk.

Hoe lank is julle al saam?
Shaun & Genene: Amper ses jaar, waarvan ons al drie jaar verloof is.

Wat het julle laat besluit om deel te neem aan Deur Dik en Dun?
Genene: My ma het vir my ’n skakel na Deur Dik en Dun se inskrywingsblad gestuur. Ek wou eers nie deelneem nie, maar hoe meer ek en Shaun daaroor gepraat het, hoe meer het ek besef dis dalk vir ons. Al wat ek kon verloor, was gewig.

Was julle senuagtig voor julle op die programme verskyn het? Het julle enige voorbereiding gedoen?
Shaun & Genene: Beslis, maar ons het nie voorberei nie. Ons het besluit ons gaan net onsself wees en dit vat soos dit kom.

Wat doen julle wanneer julle saam wil ontspan?
Shaun & Genene: Ons hou van familietyd, braai, kuier en buitemuurse aktiwiteite. Ons is ook mal daaroor om ’n bietjie weg te kom, veral wildtuin toe.

Oorvleuel enige van jul stokperdjies?
Genene: Ons oefen saam. Shaun het ’n Yamaha R6, en ons hou daarvan om met sy motorfiets saam na plekke toe te ry. Ons hou ook baie van visvang.

Het julle al van tevore saam ’n dieet probeer volg, oefen, of gewig verloor?
Genene: Ons het in die eerste twee jaar van ons verhouding saam geoefen en reg geëet. Toe het ons daarmee opgehou. Ek het gewig begin aansit, en van daar af is dit maar ’n stryd met my gewig. Shaun het baie gesukkel om alles saam met my te doen, maar ons probeer dinge saam aanpak.

Hoe lyk ’n gewone aandete vir julle twee?
Shaun & Genene: Ons is mal oor proteïen, so aandete sal definitief vleis, vis en hoender insluit, met bygeregte soos slaai en groente.

Hoe oorkom julle uitdagings, en hoe motiveer julle mekaar?
Shaun & Genene: Ons staan van die begin af saam. Ons het al moeilike tye gehad, maar ons was daar vir mekaar, en wanneer die een aansporing nodig het, hou die ander een hom regop.

’n Nuwe episode van Deur Dik en Dun word elke Dinsdag om 16:00 op VIA uitgesaai.

’n Groep verpleegsters het meer as hul plig gedoen om ’n dapper peuter se verblyf in die hospitaal draagliker te maak.

In Junie is fase 4-neuroblastoom, ’n vorm van senuselkanker, by die driejarige Millie McColl gediagnoseer. Sedertdien ontvang sy chemoterapie by ’n kinderhospitaal in Glasgow, Skotland.

Vyf verpleegsters daar het besluit om Millie te bederf om haar moed te gee, en in ‘n hartroerende video kan ’n mens sien hoe hulle die Disney-treffer Let it Go (kompleet met rekwisiete en dierbare danspassies) uit volle bors vir Millie sing.

“Julle is fantasties!”

Die kind het duidelik elke oomblik daarvan geniet, want sy het gelag en saam met haar nuwe vriendinne gesing.

Milly se ma, Lynsey McColl, het daarna op die Facebook-blad Millie’s Journey geskryf: “Ek moet hierdie pragtige vroue bedank wat gisteraand in Schiehallion op nagdiens was omdat hulle gawe mense is en Millie baie bly gemaak het. Julle is fantasties!”

Volgens Lynsey is die behandeling wat Millie moet kry, nog nie in die Verenigde Koninkryk beskikbaar nie. “Met hierdie soort en gevorderde vlak van kanker is daar ’n kans van ongeveer 80 persent dat dit sal terugkeer, en in die Verenigde Koninkryk is daar nog nie ’n behandelingsprotokol sou sy ’n terugslag hê nie.”

Die gesin hoop om Millie Amerika toe te neem vir behandeling, en hulle het ’n JustGive-blad opgestel om te help om geld vir die reis in te samel. “Elke donasie word van harte gewaardeer en dit neem ons pragtige dogter een tree nader aan die helder toekoms wat sy werklik verdien.”

Bronne: Facebook, hellogiggles.com, The Mirror

Flambojante feeste via ’n Olimpiese spiertier. Zavion vrek oor goud: of dit nou as glansfunksie-koördineerder of tienkamp-atleet is.

Die kameras probeer byhou terwyl Zavion sy besige dagboek tussen troues en tienkamp balanseer.

• 1
• 2

« »

Zavion Kotze

Ouderdom: 27
Beroep: Glansfunksiekoördineerder
Blyplek: Fourways, Johannesburg

Zavion Kotze

Ouderdom: 27
Beroep: Glansfunksiekoördineerder
Blyplek: Fourways, Johannesburg

Hoekom het jy ’n glansfunksiekoördineerder geword?
Ek was nog altyd kreatief, en toe my ouers ’n troue-venue begin bou, het ek geweet dís wat ek wil doen. Ek het gevorder van messelaar en kelner tot koördineer, en daarna het ek eindelik my eie trouebeplanningsmaatskappy en bloemiste begin.

Ek moet sê, ek is dol oor die druk en die rush wat ’n mens in my bedryf kry. Elke dag is opwindend, en ek is mal oor wat ek doen.

Wat is die vinnigste wat jy al ’n troue moes beplan?
Ek het ’n troue gereël vir kliënte wat moes emigreer. Ek het drie weke gehad om die hele troue te beplan en uit te voer. Nodeloos om te sê, ons het dit reggekry en hulle is steeds gelukkig getroud. Ek is mal daaroor om dinge onder druk te doen, want dis wanneer ek regtig perform.

Wat is die geheim vir ’n stresvrye troue?
Kies verskaffers wat by jou persoonlikheid pas en sal kan voldoen aan jou visie van die volmaakte troudag – en maak seker jy bespreek hulle vroegtydig.

Enige wenke vir paartjies wat hul eie troue beplan, maar nie weet waar om te begin nie?
Die heel eerste ding wat jy moet doen is om jou venue, fotograaf en videograaf te bespreek. Die res sal alles in plek val. Maar my raad? Bel my.

Wat is die troueneigings die somer?
Ek hou altyd daarvan om trends vooruit te wees en my kliënte die beste raad te gee. As ’n mens na die res van die wêreld kyk, lyk dit of ’n meer klassieke of moderne bruid in is en die quirky en whimsical bruid uit is. Ek dink die kleurpalet gaan oorheers word deur swart, wit en roosgoud, en die klassieke look, gaan groot wees.

En verder in die toekoms? Wat is dan die volgende groot troueneiging op die horison?
Blinkers! Goud en roosgoud gaan hoogmode wees.

Watter tradisies by troues dink jy is oudmodies en moet liefs waai?
Tradisies is wat troues maak, en ek is mal oor elke liewe een. Hulle kan bly solank mense hulself gedra.

Hoe sou jou eie groot dag lyk?
Mmm . . . Ons sal maar moet wag en sien. Al wat ek kan sê is: mind-blowing!

Enige maltraptroudagstories wat jy met ons kan deel?
Ontelbaar baie! Miskien moet ek ’n boek skryf. Ek sal vir almal skuilname moet gee; laat ons liefs nie name and shame nie.

Jy oefen tans om vir die Olimpiese Spele te kwalifiseer. Vertel ons oor jou planne.
Ja! Die plan is om te kwalifiseer en ek het tot einde Junie volgende jaar om dit te doen. Die Suid-Afrikaanse Kampioenskapsbyeenkoms word in April gehou, en ek wil dit dan regkry. Ek werk nou aan my krag, tegniek en fiksheid. Van volgende jaar af begin ek soos ’n Olimpiër oefen.

Volg jy ’n spesifieke oefen- en eetplan?
Ja, ek is mal oor oefen. Die probleem is ek is ook mal oor eet. Die eetplan is dus maar moeilik om te volg, maar ek gaan deurdruk! Ek oefen drie keer per dag en dit sluit gewoonlik gim, baanatletiek en paalspring in.

Hoekom moet mense op Zavion inskakel? Wat kan kykers verwag?
Die program gaan oor my lewe en wat ek doen. Stel jou voor: ek hardloop met ’n bos blomme in my hand, my pa skree ek moet vinniger hardloop en ’n bruid smeek my dat sy peonies (pinksterrose) vir haar troue soek. Dit gaan awesome wees.

Enige snaakse agter-die-skerms-stories wat jy met ons kan deel?
Ek is super random en sal gereeld met liedjies en danspassies lostrek. My Tina Turner-nabootsing laat mense skaterlag. Ek skeer ook graag die gek. Gelukkig is dit alles op kamera vasgevang!

Bieg: wat is jou guilty pleasures?
Enigiets wat ek nie veronderstel is om te eet nie! Cupcakes, spek en soesji – al drie saam sou ook fantasties wees!

’n Nuwe episode van Zavion word elke Dinsdag om 18:00 op VIA uitgesaai.

Hy praat Afrikaans; sy praat Engels. Maar saam maak hulle ‘n plan wat enige skaal sal ontstel. Ontmoet vir dr. Wian en Lara, die twee kenners wat die deelnemers op Deur Duk en Dun help om hul gewigstryd te oorwin.

• 1
• 2

« »

Lara de Chazal

Ouderdom: 44
Beroep: Holistiese kliniese voedingskundige
Blyplek: Johannesburg

Wian Stander

Ouderdom: 40
Beroep: Dokter
Blyplek: Johannesburg

Lara de Chazal se gesondheidswenke:

Watter dieet volg jy?
Ek volg nie op die oomblik ’n dieet nie, maar hou heeltyd ’n ogie op wat ek eet – ek sit nogal maklik gewig aan. Ek is mal oor gesonde, natuurlike, onverwerkte kosse, so my etes bevat baie blaargroente, groente, gehalteproteïen en egte vette. My liggaam reageer beter op ’n lae-koolhidraat-leefstyl, so ek is baie kieskeurig oor die hoeveelheid en die gehalte van die koolhidrate wat ek eet. Ek eet ook min vrugte.

Wat is jou gunsteling-gesondheidsgereg? Kan jy die resep met ons deel?
Die term “gesond” is subjektief en hang af van die dieet wat jy volg, so hier is eerder ’n idee vir ’n vinnige, gesonde ontbyt:

Gesonde bessie-proteïen-smoothie
Die absoluut heerlike smoothie bevat baie proteïen en min koolhidrate en is supervullend danksy die veselinhoud. Boonop verhoog dit nie jou bloedsuikervlakke nie. Die kleur is ook so mooi, en dit is vol natuurlike antioksidante.

• 1 k water
• ½ k gevriesde of vars bloubessies
• 1 skeppie ertproteïen (“pea protein”) of weiproteïenisolaat (“whey protein isolate”) (Belangrik: gebruik ’n proteïenpoeier wat nie kunsmatige versoetingsmiddels, vullers en verdikkingsmiddels bevat nie)
• 1 e amandelneutbotter of 8 amandels
• 1 e pynappelvesel
• versoetingsmiddels vir smaak: Stevia of xilitol
• kaneel (opsioneel)

Plaas al die bestanddele in ’n menger en met tot glad en romerig, skink en geniet.

Watter oefenplan volg jy?
Ek gaan deur fases. Ek hou van boks en gewigsoefening, maar ek moet ’n instrukteur kry om my te druk; ek is nutteloos op my eie. Ek woon soms verfermingsklasse by my gim by en ek hou van strek en joga.

Wat is die beste gesondheidsraad wat jy al ontvang het?
Ons moet oplet hoe wat ons eet ons laat voel. Ek het eers gedink dit is vreemd, maar ek het na my lyf begin luister en ál meer bewus geraak van hoe sekere kosse my energiek laat voel terwyl ander my moeg, omgekrap en opgeblaas laat voel. Ons moet almal na ons liggaam luister!

Wat is die grootste oorsaak van ’n ongesonde leefstyl?
’n Tekort aan kennis en begrip van wat gesond wees behels, die koste van ’n gesonde dieet en laastens hoe min tyd daar in ons besige lewens is om die regte kos te maak en oefening te doen.

Enige raad vir mense wat gesond wil leef, maar nie weet waar om te begin nie?

• Maak klein veranderings wat uitvoerbaar en oor die lang termyn volhoubaar is, soos:
• Neem minder suiker in. Dit geld nie net vir die suiker in jou tee en koffie nie. Kosse soos brood, pastei en pasta proe souterig, maar word in jou bloed in suiker omgeskakel.
• Lees kos-etikette. As jy van die bestanddele nie kan uitspreek nie, is daar ’n goeie kans dat dit preserveermiddels of kunsmatige versoeters is wat nie goed is vir jou nie.
• Drink water – en baie daarvan. Sny ander drinkgoed uit jou dieet en maak seker jy drink elke dag 2 L water.
• Oefen. Beweeg jou liggaam soveel moontlik en maak dit deel van jou roetine.
• Maak tyd om gesonde geregte te berei. Sondag is ’n goeie dag om jou weeklikse proteïen en groente reg te kry; dan hoef jy nie gedurende die week bekommerd te wees oor lank in die kombuis staan en kos maak nie.

Wat is die grootste gesondheidsuitdaging wat jy al moes oorkom?
Hipotiroïdisme (’n onderaktiewe skildklier), asook ’n binge-eetsteuring. Danksy die regte medikasie en voeding het ek albei suksesvol oorkom.

Het jy enige guilty pleasures?
Absoluut! Gee my ’n kaas- of ’n wortelkoek en ek is sielsgelukkig.

Meer oor Wian:

Watter eetplan volg jy?
Die intermittent fasting-program. Ek eet met ander woorde binne agt uur al my kos vir die dag. Dit sorg vir uitstekende gewigsverlies en werk veroudering doeltreffend teen.

Watter gesonde gereg is jou gunsteling?
Geroosterde Noorweegse salm met ’n pikantrissiemengelslaai.

Watter oefeninge doen jy?
Hoë-intensiteit-interval-oefeninge, soos om voluit te hardloop, om my kardiovaskulêre kapasiteit te verhoog.

Wat is die beste gesondheidsraad wat jy al ontvang het?
Drink genoeg water.

Wat is volgens jou die hoofredes vir ’n ongesonde leefstyl?
Die advertensie- en reklamebedryf! Dit kan ook die beste gesondheidspogings in die wiele ry as jy nie jou week vooruit beplan nie.

Het jy enige wenke vir mense wat gesond wil leef, maar onseker is hoe om te begin?
Maak seker jy het ’n tweede doel voor jy met jou eerste doel (jou nuwe leefstylprogram) begin. Daar moet ’n beloning wees nadat jy jou leefstyl suksesvol aangepas het. Dis goed en wel om net gewig te wil verloor of gesonder te wil leef, maar wanneer jy op die punt is om tou op te gooi, moet daar iets wees wat jou aanspoor om deur te druk met jou nuwe leefstyl.

Wat is eenvoudige afskopwenk?
Moet nooit op ’n leë maag inkopies doen nie.

Jou leefstyl is baie gesond, maar het jy enige guilty pleasures?
Rooiwyn.

’n Nuwe episode van Deur Dik en Dun word elke Dinsdag om 16:00 op VIA uitgesaai.

Dit is vanaand op die kassie:

17:00 Days of our lives (SABC 3): Dié immergewilde sepie het al meer as 12,000 episodes uitgesaai sedert dit in 1965 begin het.

17:30 Jan Braai vir Erfenis (kykNET): Dis weer tyd vir Jan Braai se jaarlikse braaivakansie in Ierland. Hy braai saam met CJ Stander en BJ Botha in Limeric, verower ‘n viking kasteel, leer hoe om whiskey te maak en braai Ierse streaks in Dingle se hawe.

17:30 Kersie op die Koek (VIA): Warm ouerharte via suikersoet kinders. Opvreetbare seuns en dogters ontmoet in sjef Renoir Sardinha en Loandi Boersma se studio om ’n kreatiewe dankie-sê-koek as verrassing vir ma of pa te versier.

18:00 About a Boy (M-Net): Hierdie komedie is gebasseer op die gelyknamige boek. Will Freeman se lewe verander heeltemal toe ‘n enkelma en haar 11-jarige seun langs hom intrek.

18:00 How I Met Your Mother (e.tv HD): In die skreeusnaakse komedie vertel die ouer Ted aan sy twee kinders presies hoe hy hulle ma ontmoet het.

18:30 Villa Rosa (kykNET): Marius besef vir hom en Liam kom D-dag al hoe nader en probeer van Carina afskeid neem. Beulah onthul die eintlike rede hoekom sy by die Villa is. Sy wil vlug, maar waarvan?

18:30 7de Laan (SABC2): Matrone kry ‘n belangrike oproep van haar dokter. En ‘n energieke nuwe intrekker maak sy opwagting in die Heights.

19:30 Binnelanders (kykNET): At vra Steve oor Ivanka, maar is nie tevrede met die antwoord nie. Okkie en Ilse deel ‘n sentimentele oomblik, Tim vra Lexi uit oor haar ouers se verhouding, en Bronwyn se agterdogtige houding het gevolge vir Steve.

20:00 Edik van Nantes (kykNET): Die broers koop meubels vir die eetkamer en besoek ‘n tipiese kaaswinkel in die middestad van Nantes. Hulle gebruik kaas in geregte wat wissel van tradisionele streekskos tot splinternuwe eie skeppings.

20:00 Homeland (M-Net Edge): In vanaand se episode help Quinn om Carrie se identiteit te beskerm. Carrie roep ook die hulp van ‘n oudkollega in.

20:30 Bloedbroers (kykNET): Die groot mynstaking het begin. Willem en Soekie se verhouding ontwikkel vinnig te midde van sy verantwoordelikhede by Republikeinse Leër. Na Bennie se pa onskuldig doodgeslaan word, besluit Bennie om aksie te neem.

20:30 Minority Report (Fox): Meer as 10 jaar ná die ontbinding van die pre-misdaadeenheid, wat toekomstige misdadigers gevang het voor hulle misdade pleeg, probeer ‘n eensame oudlid, wat die vermoë het om misdade te voorspel, ‘n normale lewe lei.

21:00 The Good Wife (SABC3): ‘n Familie- en regsdrama met die formidabele Julianna Margulies in die hoofrol.

21:20 The Kennedys (History): ‘n Biografiese minireeks oor die lewe van JFK.

21:30 Chicago PD (M-Net): Lindsay baklei teen die drankduiwel, en ‘n heroienbaas ontvoer ‘n speurder.

22:00 Desperate Housewives (SABC3): Die dames van Wisteria Lane konkel onder mekaar met allerhande intriges wat volg.

22:00 Winslyn (kykNET): Divan Botha maak ingewikkelde plaaslike en internasionale ekonomie meer verstaanbaar.

Donderdagaand, 12 November 2015, se program op kykNET (DStv kanaal 144).

Dieselfde episode word Sondag, 15 November om 18:30, op kykNET NOU! (DStv kanaal 146) uitgesaai.

1. Bravo is verfilm by Kleine Constantia Gastehuis in Roodepoort.
2. Ons begin met CARING DAISIES se jaarlikse fondsinsamelingsgeleentheid.
3. Kyk agter die skerms van SUIDOOSTER se publisiteitsfotosessie.
4. En sien dan hoe die mode-ontwerper Gert-Johan Coetzee se skeppings vir SA MODEWEEK lyk.

Dit is een wat jy beslis nie wil misloop nie, en dit alles gebeur Donderdagaand, 12 November, om 20:00 (kykNET) en Sondag, 15 November om 18:30 (kykNET NOU!) net op BRAVO!
Die herhalings op kykNET is Vrydag 14:30; Saterdag 22:30; en Sondag 02:30.

Wat jou sterre vandag voorspel met Joanne Moore

JOU DAG
Die nuwemaan is die ideale tyd om ’n nuwe begin te maak.

AS JY VANDAG VERJAAR
Moenie toelaat dat jou besitlike, geheimsinnige kant in 2016 buite beheer raak nie. Vat dinge stadig, leer om te ontspan en hou jou gedagtes op die toekoms gefokus.

RAM 21 Mrt.-20 Apr.
Die nuwemaan dui op ’n ommekeer wat met geldsake of ’n intieme verhouding te doen het. Dis tyd om met positiewe veranderings te begin en ander te inspireer om dieselfde te doen.

BUL 21 Apr.-21 Mei
Gaan ’n verhouding deur ’n slegte tyd? Is jou verhoudings vervelig? Die nuwemaan en Mercurius spoor jou aan om op kreatiewe maniere met jou naastes en geliefdes te praat.

TWEELING 22 Mei-21 Jun.
Kyk goed hoe fiks en gesond jy is terwyl die nuwemaan jou welstandsone aktiveer. Dis tyd om gesond eet en gereelde oefeninge ’n belangrike deel van jou daaglikse roetine te maak.

KREEF 22 Jun.-23 Jul.
Die nuwemaan beloof ’n tydperk waarin ou vriendskappe gekoester en nuwes gevestig word. Beplan iets romanties saam met jou maat. Liefde is in die lug vir enkellopendes.

LEEU 24 Jul.-23 Aug.
Dis jou beurt om te skitter! Jou gesinslewe lyk ook fantasties met die nuwemaan en Mercurius in jou huishoudelike sone. Dit dui op pret, leer en nuwe beginner tuis.

MAAGD 24 Aug.-23 Sep.
Is jou brein oorvol inligting? Probeer om jou kop skoon te kry. Pas aan by nuwe denkwyses en vind nuwe oplossings vir ou, hardnekkige probleme.

WEEGSKAAL 24 Sep.-23 Okt.
Bly skerp terwyl jy nuwe inligting oor geld oordink. Venus beloof groter kontantvloei, maar jy kan dit dalk met ’n inkopietog kanselleer.

SKERPIOEN 24 Okt.-22 Nov.
Jy is vandag uitsonderlik deernisvol en sjarmant met die nuwemaan en Mercurius wat jou teken belig. As jy kreatief met ander kommunikeer, sal jy waarlik vooruitgang maak.

BOOGSKUTTER 23 Nov.-21 Des.
Boogskutters is gesellige mense wat van partytjies hou. Maar die nuwemaan is in jou sone vir privaatheid. Probeer dus vandag tyd alleen bestee om te ontspan en weer krag te kry.

STEENBOK 22 Des.-20 Jan.
Met die nuwemaan in jou sone vir hoop en wense streef jy daarna om innoverend en kreatief te droom. Die omstandighede is ook goed vir prettige groepsaktiwiteite.

WATERDRAER 21 Jan.-19 Feb.
Dis tyd om werksomstandighede te skep en jou professionele potensiaal te vermeerder terwyl die nuwemaan jou loopbaansone stimuleer. Jy sal dalk ’n projek moet laat staan en van voor af begin.

VIS 20 Feb.-20 Mrt.
Baie Visse is gretig om te reis en die beste tyd vir ’n heerlike vakansie is tussen nou en 4 Januarie. Begin beplan, bespreek en pak so gou moontlik!

Vark en vrugte is ’n klassieke kombinasie. Toets gerus ons resep uit.

Genoeg vir 6 mense
Bereiding: 15 min.
Gaarmaak: 20 min.

2 × 400 g-blikke pynappel
1 ui, gekap
4 knoffelhuisies, gekap
15 ml (1 e) brandrissiepoeier
5 ml (1 t) komynsaad
15 ml (1 e) droë gemengde kruie
sout en peper
500 g varkblad, in blokkies gesny
30 ml (2 e) olie
Tortillas
750 ml (3 e) meel
2, 5 ml (½ t) sout
125 ml (½ k) olie
250 ml (1 k) warm water

1. Meng die 1 blik pynappel, ui, knoffel, brandrissie, komyn, gemengde kruie, sout en peper. Gooi dit in ’n verwerker en verwerk tot glad. Sit die vleis in ’n bak, giet die pynappelmengsel oor en laat marineer 1 uur.
2. Verhit ’n pan oor hoë hitte. Voeg die olie by en braai die vark in sarsies tot verbruin en deurgaar. Roer die oorblywende blik pynappel in.
3. Tortillas Meng die droë bestanddele in ’n groot bak. Maak ’n holte in die middel en giet die olie en water stadig in. Meng alles tot ’n deeg vorm. Keer uit op ’n skoon oppervlak en knie tot glad. Verdeel die deeg in 10 ewe groot porsies.
4. Rol die deeg in sirkels uit en bak 2 min. weerskante of tot goudkleurig. Sit die tortillas saam met die pynappelvark voor.

Deur Hope Malau
Foto: Megan Miller

Johannesburg. In sommige dele van Johannesburg is daar sedert Dinsdag niks water nie, glo weens watervlakke in reservoirs wat gedaal het.

Dit volg nadat die Stad Johannesburg vroeër die week aangekondig het hulle gaan vlak 2- waterbeperkings instel.

Die tekort volg ná kwaai droogtes in dele van die land, tesame met ’n weeklange hittegolf. Woensdag het die temperatuur in Johannesburg tot 36°C gestyg.

Die Stad Johannesburg het Dinsdag op hul Twitterblad gesê daar is ’n probleem met die reservoir in Brixton. “Brixton en omliggende gebiede: Ons reservoir lek, en die druk neem te stadig toe om water vir die watertoring te verskaf. Sodra die watertoring vol is, sal watertoevoer na al die geraakte gebiede herstel word. Ons kan nie bevestig wanneer die watertoevoer volledig herstel sal wees nie.”

The Star het berig twee skole in die suide van Johannesburg het leerders Dinsdag weens die tekort aan water huis toe gestuur.

Die Stad Ekurhuleni het Dinsdag gesê minstens 11 gebiede daar is sonder water. Hulle het ook watertenks na verskeie gebiede gestuur. “As die situasie in al die gebiede verder verswak, sal dit stad beurtwater instel en watertoevoer van 22:00 tot 03:00 sluit,” lui ’n verklaring.

“Die stad sal watervlakke by reservoirs voortdurend gemonitor en beurtwater sal soos nodig ingestel word.”

Bron: News24; EWN

Pretoria. JP van Niekerk, ’n veiligheidswag wat in Waterkloof doodgeskiet is, het sy lewe vir ’n ander gesin gegee, het ’n kollega Dinsdag gesê.

Foto: facebook.com/Bull-Security

“Hy het sy lewe opgeoffer, maar hy is ’n held,” het French Jooste van Bull Security aan News24 gesê. “In ons almal se oë is hy ’n held. Hy het altyd eerste ingegaan. Hy was vir niks bang nie.”

French moes saam met Bull Security se eienaars, JP Griesel en Lendl Jansen, vir JP se vrou, Erica, gaan sê haar man is dood.

“Dit was een van die slegste ervarings van my lewe. Sy het nog geslaap. Ons het haar wakker gemaak en gesê: ‘Luister, daar was ’n voorval, en JP is op die toneel dood.’ Dit was nie baie aangenaam nie.”

JP laat sy vrou en twee kinders na wat albei nog op skool is. Hy is doodgeskiet nadat hy Dinsdag in die vroeë oggendure op ’n huisbraak in Waterkloof gereageer het. French sê ’n kliënt van Bull Security het omstreeks tien oor een Dinsdagoggend gebel en hulle ingelig daar is mense in die huis. Vyf mans, van wie twee gewapen was, het by die huis ingegaan.

‘Skietgeveg’
“Toe my ouens (Bull Security) by die kompleks inry, het die ouens begin skiet. ’n Hengse skietery het losgebars,” sê French. “Dit was ’n koeëlreën. Die hele huis, die baksteenmure, selfs die bure se mure is vol koeëlgate. Tot nou toe is ons nie seker hoeveel rondtes afgevuur is nie.”

Hy sê JP is net onder sy koeëlvaste baadjie in die maag getref. French sê toe hy op die toneel aankom, het JP nog geleef. “Ek het daar aangekom en een van die eienaars van Bull Security, JP Griesel, het ook opgedaag. Hy het noodhulp op JP begin toepas. Hy het hom probeer help.”

Netcare-paramedici het minute later op die toneel aangekom en JP probeer bybring, maar hulle kon nie daarin slaag nie.

French sê een van die verdagtes is deur JP se kollega Neila Botha gewond. Die verdagte was in ’n kritieke toestand en French was nie seker of hy sou oorleef nie. Drie van die vyf verdagtes het oor die agtermuur gevlug. ’n Ander een is op die toneel doodgeskiet.

‘Al die jong ouens het na hom opgesien’

JP, wat voorheen by ’n ander veiligheidsmaatskappy gewerk het, het maar sowat vier maande vir Bull Security gewerk. “Hy was een van ons beste beamptes,” sê French.

“Daardie ou het vir sy kinders en sy vrou geleef.”

French sê ’n mens kon altyd op JP staatmaak en hy is met deernis “oupa” genoem omdat hy die oudste lid van die span was. “Al die jong ouens het na hom opgesien. Wanneer hulle raad nodig gehad het, het hulle na JP toe gegaan.”

Hy voeg by Dinsdag se voorval was traumaties vir die hele span wat op die toneel was en traumaberading is gereël. Hy sê ook hulle kry baie steun van die gemeenskap, en baie mense het blomme by Bull Security se kantoor gaan afgee.

Bron: News24

Broers en susters ding gewoonlik onder mekaar mee om ma se gunsteling te wees. Nou is daar in ’n nuwe studie bevind om ma se oogappel te wees, is dalk nie so ’n goeie idee nie.

Sowat 725 volwassenes uit 309 gesinne was deel van die voortdurende studie oor verskille binne gesinne onder leiding van prof. Jill Suitor van die Purdue-universiteit in Indiana. Jill en haar span het bevind kinders wat emosioneel gehegter aan hul ma’s is, toon meer simptome van depressie.

“Dit is die gevolg van meer spanning tussen volwasse broers en susters wat emosioneel nader is aan die ma, of die groter gevoel van verantwoordelikheid wat die versorging van die ouer ma betref,” sê Megan Gilligan van die Iowa-staatsuniversiteit, wat saam navorsing gedoen het.

“Ouers maak meer op hul ‘gunstelingkind’ staat”

Kortom: om die witbroodjie te wees, beteken jy gaan deurloop onder jou broers en susters se geterg, en dit kan jou kans verhoog om depressief te raak.

Interessant genoeg is daar ook in die studie bevind die depressiesimptome verhoog as jy bejaarde ouers het. Dit is omdat ouers in hul 70’s en 80’s geneig is om meer op hul “gunstelingkind” staat te maak en dit kan die kind emosioneel uitput.

Die wedywering tussen broers en susters eindig nie daar nie. Sy sê die spanning kan voortduur selfs wanneer die ouers hul laat 70’s en 80’s bereik. “Dis interessant dat broers en susters nog in ’n groot mate tot in hul middeljare met mekaar wedywer.”

Die verslag is in die Journal of Gerontology: Social Sciences gepubliseer.

Bronne: telegraph.co.uk, metro.co.uk

Drie hoopvolle kokke spook dit uit sodat ons bekroonde kosredakteur, Carmen Niehaus, vir een van die disse die gesogte Wenresep-status kan gee.

• 1
• 2

« »

Carmen Niehaus

Naam: Carmen
Van: Niehaus
Ouderdom: 55
Beroep: Kosredakteur van Huisgenoot
Blyplek: Proteahoogte, Kaapstad

Carmen Niehaus

Naam: Carmen
Van: Niehaus
Ouderdom: 55
Beroep: Kosredakteur van Huisgenoot
Blyplek: Proteahoogte, Kaapstad

Ons het uit die groentetuin geëet en naweke, wanneer ons van die koshuis by die huis was, het my ma altyd gesorg dat daar allerhande lekkernye van sjokoladekoek tot koeksisters was. Hier teen matriek moes ek en my tweelingsuster op Sondae regstaan met die ete. Op universiteit moes ek kies tussen my liefde vir syfers en vir kos.

Wat is jou kosmaakmantra?
Proe, proe, proe.

Watter bestanddele sal altyd in jou kombuis wees?
Suurlemoen, neute, sade en koljanderblare.

Wat is die beste kosmaakraad wat jy nog ontvang het?
Om binne geurprofielbane te kook.

Wat maak Jy het ’n Wenresep! anders as ander kosprogramme?
Ons kyk nie soseer na die kookvernuf van die deelnemer nie; dit gaan meer oor of die resep voldoen aan die kriteria wat gestel word.

Wat is jou nommereenwenk aan Wenresep!-deelnemers?
Maak seker jy het die kriteria waaraan ’n wenresep moet voldoen goed deurgegaan.

Wat soek jy in ’n wenresep?
Ek werk op ’n vyfsterstelsel. Die resepte moet vinnig en veelsydig wees, en die bestanddele moet vars, bekostigbaar en toeganklik wees. Gesonde geregte kry ook ’n ster. Dan is daar ’n ster vir vernuwing en natuurlik ook een vir smaak.

En wat maak ’n gereg dadelik ’n “verloorresep”?
Een wat ooglopend ongesond is weens te veel suiker of botter of een wat te veel bestanddele bevat.

Enige wenwenke vir ’n kombuisleek wat ’n feesmaal wil optower, maar nie weet waar om te begin nie?
Kry vir jou ’n betroubare resepteboek (soos Wenresepte) waar jy basiese tegnieke kan leer sonder intimiderende metodes en bestanddele.

Wat is die grootste flop wat jy nog in die kombuis gemaak het?
Ek is nie een vir suikerkook nie, so spinsuiker sal altyd vir my ’n uitdaging bly.

’n Nuwe episode van Jy het ’n Wenresep! word elke Woensdag om 16:00 op VIA uitgesaai.