Verloor jy meer as 100 hare per dag? Dit maak nie saak watter kleur jou hare is of in watter styl dit geknip is nie; jy wil nie een van hulle verloor nie.

As jy dus sien daar lê bosse hare op jou kopkussing, hulle vergader in jou stort of val op jou lessenaar, begin jy jou bekommer. Hoekom val my hare uit? Gaan ek bles raak?

Haarverlies kan, by mans sowel as vroue, lei tot angs en depressie – ’n welige haardos is immers blykbaar belangrik vir jou selfbeeld.

Dr. Adolf Klenk, een van die voorste deskundiges op die gebied van haarnavorsing, het aan Health24 die betekenisvolle verskil in haarverlies by mans en vroue verduidelik.

Androgenetiese haarverlies

“By vroue begin haarverlies gewoonlik op die middelste gedeelte van die kopvel en versprei in ’n wye patroon agtertoe. By mans begin die haarlyn terugwyk en naderhand is die boonste gedeelte van die kop heeltemal kaal,” het hy gesê.

Nog ’n verskil is die ouderdom waarop die hare gewoonlik begin minder raak.

Spanning, streng diëte en ongebalanseerde kos kan haargroei uiters nadelige beïnvloed.

“By mans begin puberteit op 16 en by vroue begin die tipiese androgenetiese haarverlies tydens menopouse. Jong vroue kan natuurlik ook haarverlies ervaar.”

Spanning, streng diëte en ongebalanseerde kos kan haargroei immers uiters nadelige beïnvloed.

“By albei geslagte word dit geneties bepaal. Of mense rede het om hulle te bekommer, kan geneties bepaal word deur hul familiegeskiedenis.”

Vroue wat meer as honderd hare per dag verloor, kan aan óf stresverwante óf menopousale haarverlies ly.

“Die haarwortel is ’n orgaan wat baie energie verbruik; daarom kan ’n enkele haarvesel gewoonlik nie lewenslank groei nie,” het Klenk beduie.

Talle uitdagings vir die haarwortel

Hy het gesê ná ’n ononderbroke groeitydperk van vyf tot sewe jaar hou die haarwortel op groei en ondergaan dit ’n herstelproses, wat etlike maande duur.

“In hierdie hersteltydperk sal die haarvesel afgewerp word. Dit is normaal en daar is geen risiko dat die hare yler sal word nie. Weens hierdie sensitiwiteit is daar heelwat faktore wat die haarwortel in ’n voortydige hersteltydperk kan dwing. Die daaglikse telling van haarverlies kan gevolglik drasties toeneem.”

Klenk sê die haarwortel moet talle uitdagings die hoof bied.

“Eerstens is daar die oorgeërfde postmenopousale verdunning van die hare. Van die begin van die menopouse af verminder die natuurlike beskerming wat estrogeen bied, en die uitwerking van testosteroon (ja, vroue het dit ook) neem toe. Vroue word gedurende hul menopouse aan dieselfde soort haarverlies onderwerp as mans van puberteit af.”

’n Man kan baie maklik seker maak of hy deur androgenetiese haarverlies geraak word.

Volgens hom is stres nog ’n ernstige uitdaging. “Haarwortels is baie gevoelig vir spanningsvolle tye. Stres word ook veroorsaak deur ’n streng of ongebalanseerde dieet. Vroue wat streng ’n verslankingsdieet volg, ervaar ’n waarneembare toename in haarverlies. ’n Tekort aan belangrike spoorelemente, soos sink, kan die gevolg wees van ongebalanseerde voedsel of wanabsorpsie van spoorelemente.”

Hy het ook gesê ’n man kan baie maklik seker maak of hy deur androgenetiese haarverlies geraak word.

“Hierdie soort haarverlies word oorgeërf en ’n vinnige kykie na jou familiegeskiedenis kan jou sê of jy geraak word of nie. As daar by ouers, ooms, grootouers, ens. ’n patroon van ylerwordende hare te bespeur is, is dit hoog tyd dat jy die heel eerste simptome van verswakte hare voorkom en omkeer. Hoe gouer jy met behandeling begin, hoe beter is die kans dat jy jou hare kan red.”

Bron: Health24

Ons moes almal al die een of ander tyd smart verwerk het, of dit nou kleintyd ná die dood van ’n troeteldier was, of ’n ouer of bejaarde familielid of ’n maat s’n – en dit is dikwels iets waarop ons nie kan of wil voorberei nie.

Vir sommige van ons kan dit kan ’n diep hartseer wees wat ons in ons spore tot stilstand ruk en wat die lewe uit ons uitsuig; ander mense sien eenvoudig nie ’n uitweg uit die pyn en verlies nie. Almal verwerk dit verskillend, maar hier volg ’n paar wenke wat jou moontlik kan help om ongedeerd deur die ergste tyd in jou lewe te kom.

Past. Russell Willoughby, van Los Angeles, het dekades lank met smart te doen gekry en het raad vir diegene wat te kampe het met die verlies van ’n geliefde: “Smart duur nie vir altyd nie. Mits ons dit toelaat, sal dit mettertyd verflou of in ander gevoelens verander. Vir baie mense is dit aan die begin baie terapeuties om met ander mense daaroor te praat en dit te deel.”

Hy sê: “Ons is van nature groepswesens en dit is die beste verband waarbinne ons heling en troos kan vind.”

Russell waarsku mense teen “groot, lewensveranderende besluite” kort nadat hulle ’n geliefde verloor het en hy lê ook klem daarop dat dit ’n “wanbegrip” is om te aanvaar dat sulke “dapper” optrede dié wat treur, sal help om hul pyn te oorkom.

“Dié soort optrede is dikwels reaktief en kan ander probleme veroorsaak,” verduidelik hy. “Jy hoef ook nie te voel jy moet dadelik jou geliefde se besittings deurgaan nie; jy hoef nie van alles ontslae te raak wat jou aan hom of haar herinner nie. Andersyds moet jy ook nie altare skep wat jou aan jou smart help vasklou nie. Kry balans tussen herinneringe koester en jou verlies laat vaar.”

“’n Mens se lewe nie verby is wanneer jy sterf nie”

En wat sê die pastoor vir die mense wat sukkel om iemand na aan hulle se dood te verwerk?
“Ek sê gewoonlik vir mense dat ’n mens se lewe nie verby is wanneer jy sterf nie. Die invloed van ons lewe word op tallose maniere en in vele situasies voortgesit.

“Oral in die geskiedenis het mense uit uiteenlopende kulture ’n beloning, geregtigheid, heling of vrede vir hul geliefdes in die hiernamaals gesoek. Dit kan saamgevat word in gelowe rakende die hemel, die paradys, nirwana, reïnkarnasie of soortgelyke begrippe.”

Russell glo dat begrafnisdienste baie belangrik is vir diegene wat lig soek in die duisternis van rou, en hy beklemtoon dit dat rou- of gedenkdienste of “die een of ander soort ritueel belangrike maniere is om afsluiting te bring in die geval van verlies.

“Ek glo die pyn van verlies word op lang termyn beter versag deur die viering van die beste van dit wat ’n persoon in sy of haar leeftyd was, as deur bespiegeling oor die hiernamaals,” merk hy op. “Ons kan die waarde van ’n persoon se lewe gedenk en met ander mense deel … ek is ’n sterk voorstander daarvan dat die familie en vriende herinneringsdienste hou óf dienste om die oorledene se lewe te vier, pleks van ’n gewone begrafnis.”

© Cover Media

Dit is vanaand op die kassie:

17:00 The Ellen DeGeneres Show (M-Net): Ellen is weer op haar beste! Die komediant gesels met bekendes, gewone mense met buitengewone stories en voer ’n paar danspassies uit.

17:00 Skole Top 10 (kykNET): Ons weet almal dat Grey Kollege bekend is vir hulle sportprestasies, maar hoe lyk ‘n skool wat al vir 160 jaar bestaan se matriekafskeid? Trek jou beste rok of pak aan vir ‘n ‘Funky Black Tie’-aand met die beste musiek.

17:30 QI (BBC BRIT): Die slimkoppe onder ons moet naderskuif vir ure se vermaak en inligting saam met Stephen Fry. Dis pret en jy leer iets.

18:30 Villa Rosa (kykNET): Stef moedig Saskia aan om Monique te ondersteun. Liam manipuleer Marius om finaal teen al sy vriende te draai. Chubby smeek vir Cardo se vergifnis. Uiteindelik kry Liam Marius waar hy hom wil hê.

18:30 7de Laan (SABC2): Het Aggie die liefde van haar lewe opgespoor? Kim is opsoek na ‘n nuwe woonstelmaat.

19:30 Binnelanders (kykNET): Naomi se goeie idee kan op ‘n ramp afstuur. ‘n Hysbak is ‘n ongemaklike plek vir twee mense, en dit word gou duidelik dat Steve se probleme maar nou eers begin het.

19:30 Top Billing (SABC3): Die Top Billing-span fokus op mense en plekke in Suid-Afrika, asook oor die hele wêreld. Hulle kyk na die nuutste modegiere, flieks en hou eksklusiewe onderhoude met bekendes.

19:30 Power Couple SA (M-Net): Paartjies ding mee in ‘n reeks uitdagings in die trant van Fear Factor en Survivor. Die punt van die spel is om te kyk hoe goed die paartjies mekaar ken.

20:00 Bravo! (kykNET): Binnelanders vier ‘n dekade op die lug, en ons woon die partytjie by. Ons is agter die skerms van Sorina Erasmus se nuwe musiekvideo en die Flooze is vir eers nie in sig nie. En ons hou makietie in Middelburg.

20:00 Turn: Washington’s Spies (M-Net Edge): Jamie Bell (Billy Elliot) vertolk die hoofrol in hierdie geskiedkundige drama vol intrige en spioenasie wat tydens die Amerikaanse Vryheidsoorlog afspeel.

20:00 Ons Stories (kykNET & Kie): Nuwe én ervare storievertellers kry die kans om die pen op te neem, terwyl groentjies ook ingespan word vir die verfilming van elke storie.

20:30: Boer soek ‘n vrou (kykNET): Die boere leer hul kuiergaste beter ken. Hy stel hulle aan die plaaslewe bekend en wys wat sy boerdery behels. Die drie vroue moet die boer beïndruk, maar terselfdertyd hulself afvra of hulle gereed is om ‘n boer se vrou te wees.

20:30 Enough (e.tv): ‘n Vrou leer selfverdedigingstegnieke sodat sy teen haar bullebak-man kan terugbaklei in die rolprent met Jennifer Lopez.

21:00 Masters of Sex (M-Net Edge): Libby konfronteer vanaand die waarheid oor haar eie lewe. Tessa knoop ‘n verhouding aan met haar verkragter.

21:00 Girl Eat World (SABC3): Masterchef SA-wenner Kamini Pather besoek tien van die wêreld se beste stede opsoek na die beste kos.

21:30 The Night Shift (M-Net): Vanaand moet Drew sy vriend se vrou se lewe red.

21:30 Supernatural (SABC3): In hierdie fantasiereeks moet die broers Sam and Dean bonatuurlike wesens soos spoke en vampiere beveg.

22:00 kykNET Aktueel – Flits (kykNET): Kim Cloete, Yvonne Beyers en Fanie Cronjé het ’n vars en enrgieke benadering tot die wêreld van Afrikaanse kuns, modes en sosiale ontwikkelinge.

Durban – ’n Dapper katjie het amper 8 km ver aan die onderstel van ’n bakkie vasgeklou waar hy in ’n gat tussen die enjinblok en die oliebak vasgekeer was.

Die katjie wat, nou Lucky heet, het die beproewing verlede maand oorleef. Hy is onder die enjinkompartement van die bakkie gekry toe die bestuurder eindelik by ’n winkelsentrum in Empangeni parkeer.

Dat die katjie so klein is, was vermoedelik ook sy redding terwyl hy bo die teerpad gehang het.

Janine Quaite, woordvoerder van die Empangeni-dierebeskermingsvereniging (DBV), het gesê ’n ander inkopieganger het die paniekerige gemiaau van die vasgekeerde katjie gehoor.

“Die katjie is in ’n gaatjie in die plaat onder die oliebak van die bakkie gevind,” sê sy.

“Die bestuurder van die bakkie was onbewus daarvan dat hy daar onder vassit en het al die pad van Ngwelezane na die middedorp van Empangeni gery.”

Die DBV moes die beangste katjie eers verdoof voor hulle hom uit die enjinkompartement kon haal.

Toe hy vry was, is hy na die DBV geneem, waar hy gelukkig was om ’n pleegma te kry.

“Ons het ’n gemmerkat met vier kleintjies van haar eie gehad en sy het hom dadelik as deel van haar werpsel aanvaar.”

“Hy was gelukkig om met net ’n skroeimerkie aan sy snoet en twee piepklein snytjies agter sy voorpote aan sy bolyf daarvan af te kom,” sê Janine.

Bron: News24

Robin Williams het enkele weke voor hy as binnepasiënt na ’n behandelingsoord sou verhuis, sy eie lewe geneem.

Die akteur van Mrs. Doubtfire het in Augustus 2014 op 63-jarige ouderdom sy lewe beëindig.

Sy vrou, Susan, het intussen verduidelik dat daar tydens ’n lykskouing bevind is dat hy aan Lewy-liggaamsiekte (DLB, ’n vinnig-progressserende soort demensie) gely het. Die siekte veroorsaak hallusinasies, probleme met motoriese vaardighede en ’n wisselvallige gemoedstoestand, en dit het bygedra tot die depressie waaraan hy gely het.

Susan het Dinsdag (3 November 2015) bekendgemaak dat Robin “moontlik nog drie jaar” oorgehad het om te leef. Sy het ook verduidelik dat hy binnekort na ’n behandelingsinrigting toe sou moes trek, want hy kon nie langer tuis versorg word nie. Dit het gebeur nadat hy ’n kopbesering opgedoen het weens dit wat hy genoem het ’n “misrekening” in die badkamer, en dit het die egpaar genoop om ’n psigiater te spreek.

“Dit was beslis nie goeie nuus nie”

“Dit was ’n deurslaggewende oomblik,” het Susan aan die tydskrif People gesê. “Die psigiater het gesê ‘Nou, Robin …’ – en onthou, dit was ’n paar weke voor hy (dood) is – ‘Neurokognitiewe evaluering as binnepasiënt is nie langer ’n keuse nie. Dit is nou gebiedend noodsaaklik dat ons besluit, dat jy besluit waarheen jy wil gaan en ons gaan dit almal saam oplos.’”

Susan beweer dat Robin – by wie Parkinsonsiekte in 2014 gediagnoseer is – ná die gesprek drasties verander het. Hy was baie ontsteld oor die voorval in die badkamer waartydens hy beseer is en sy gemoed het in ’n afwaartse spiraal begin draai.

“Dit was beslis nie goeie nuus nie,” het sy gesê. “Ons was bang. Ons almal was werklik bang. Ons het nie geweet waarteen ons veg nie.”
Die baie geliefde ster het sy lewe beëindig voor hy na ’n inrigting moes trek waarvandaan hy, soos Susan te kenne gegee het, hoogs waarskynlik nooit weer sou kon huis toe kom nie.

“Teen die tyd dat hy tot by die binnepasiënte-afdeling sou vorder, sou ons vrede gemaak het daarmee dat hy Lewy-liggaamsiekte het,” het sy verklaar. “Wat ek egter nou weet, is dat Robin nog drie jaar sou lewe as hy gelukkig was. En hy sou moontlik nooit die inrigting verlaat het nie. Dit was baie sleg.”

DLB word dikwels verkeerd gediagnoseer, aangesien dit so moeilik is om die simptome noukeurig aan te wys. Susan het tydens ’n verskyning op Good Morning America Robin se mediese span geprys vir hul behandeling en sy het haar oorlede man “die dapperste mens” wat sy ken, genoem vanweë die manier waarop hy sy siekte aangepak het.

© Cover Media

Wat jou sterre vandag voorspel met Joanne Moore

JOU DAG
Span vandag jou energie op positiewe maniere in.

AS JY VANDAG VERJAAR
Moenie tyd mors deur aan die toekoms te dink nie. Jou motto vir die volgende 12 maande is die Amerikaanse aktrise Sally Field, wat vandag verjaar, se woorde: “Jy moet hier wees, jy moet nou wees, jy moet in die oomblik wees.”

RAM 21 Mrt.-20 Apr.
Gryp die geleentheid aan om jou energie op positiewe maniere te gebruik. Jy is nie net baasspelerig en ongeduldig nie – jy is ook dapper en inspirerend. Jy is ooko nie net dominerend nie – jy is ook dinamies!

BUL 21 Apr.-21 Mei
Die sterre bied ’n gulde geleentheid om ’n morsige verhoudingsprobleem op te los wat jou al geruime tyd pla. Sê wat jy dink en suiwer die lug – dan kan jy vorentoe kyk.

TWEELING 22 Mei-21 Jun.
Dis ’n wonderlike dag om deur opgehoopte roetinetake by die werk te kom. As jy die wanorde opruim, vinnig die papierwerk afhandel en ’n nuwe begin maak, sal jy vars en verkwik voel.

KREEF 22 Jun.-23 Jul.
’n Verhouding met ’n gewaardeerde geliefde verdiep en word meer intens. Jy vermy oppervlakkige onderwerpe en praat oor belangrike sake waaroor jy baie dink.

LEEU 24 Jul.-23 Aug.
Daar is verandering in die lug! Jy het vandag die energie en aantrekkingskrag om probleme met ander uit te klaar of ’n huishoudelike situasie wat jou onderkry op te los. Doen dit, Leeu!

MAAGD 24 Aug.-23 Sep.
Vandag is die omstandighede gunstig vir alle soorte studie en navorsing. Jy delf onder die oppervlak om uit te vind wat werklik aan die gang is. Maak deeglik seker van die feite voor jy iets aanlyn pos.

WEEGSKAAL 24 Sep.-23 Okt.
Baie Weegskale is omgeef deur intrige en geheime kom uit. Maak seker jy hanteer enige nuwe inligting so subtiel en diskreet moontlik.

SKERPIOEN 24 Okt.-22 Nov.
Jou sjarme en kommunikasievaardighede sal vandag op hul beste wees met die son en Pluto wat jou selfvertroue ’n ekstra hupstoot gee. Gebruik dit as ’n geleentheid om ander se lewe te verander.

BOOGSKUTTER 23 Nov.-21 Des.
Moenie die positiewe uitwerking onderskat wat ’n invloedryke vriend op jou loopbaan kan hê nie. Hoe meer jy jou talente bemark – in persoon en aanlyn – hoe meer suksesvol sal jy wees.

STEENBOK 22 Des.-20 Jan.
Gebruik jou mag op positiewe maniere terwyl jy netwerk en ander oorhaal. As jy met mense wat soos jy dink ’n verbintenis vorm en strategiese ondernemings saam aanpak, sal dit vir almal ’n wen-wen-situasie wees.

WATERDRAER 21 Jan.-10 Feb.
Gebruik jou verbeelding en intuïsie. Jy het baie kreatiewe inspirasie, maar moenie dat iemand jou op ’n dwaalspoor bring nie. As jy na jou binnestemmetjie luister, sal jy weet wat om volgende te doen.

VIS 20 Feb.-20 Mrt.
Dis tyd om jou persoonlike planne in lyn te kry met die planne van ’n groep, klub of organsisasie waarby jy betrokke is. Dan kan julle jul talente saamspan en sukses behaal.

Soms het ons almal so ‘n lekker lag nodig. En jy’s nooit te jonk om dit te doen nie.

In hierdie prettige video dink die oulike kleinding beslis pa is die snaaksste man op aarde. Daar word behoorlik gekraai van die lag terwyl hy allerhande manewales met sy seun se fopspeen aanvang.

Maar kyk gerus die video – ons glo dit gaan jou dag ook ophelder.

Bron: YouTube

Dié week is die belowendste nuwe flieks op ouer, ernstiger gehore gemik. 

Bridge of Spies (10-12O) is nog ’n politieke drama deur Steven Spielberg (Saving Private Ryan, Jurassic Park), een van die min regisseurs wat ’n uitstekende fliek in byna enige genre kan lewer.

Die ewe betroubare Tom Hanks (Forrest Gump) speel die Amerikaanse prokureur James B. Donovan, wat in 1957 gevra word om Rudolf Abel (Mark Rylance van Wolf Hall) te verdedig wat daarvan verdink word dat hy ’n Sowjet-spioen is. Donovan neem sy werk ernstig op en sy poging om ’n sterk verdediging vir Abel te bied veroorsaak dat die Amerikaanse publiek hom en sy gesin as volksverraaiers uitkryt.

Intussen word die Amerikaanse vlieënier Francis Gary Powers (Austin Stowell van Dolphin Tale 2) in Rusland afgeskiet en gevangene geneem. Die Russe is bewus van Donovan se hantering van Abel se saak en stel voor dat die VSA en die USSR onderhandel om Powers vir Abel te verruil, maar op een voorwaarde: Donovan moet namens Amerika optree.

Die meeste resensente dink dié fliek is uitstekend. Die webtuiste Rotten Tomatoes, wat die punte bymekaartel wat kritici aan flieks toeken en ’n gemiddelde uitwerk, gee dit 92 persent, en bevind: “Bridge of Spies blaas nuwe lewe in Hollywood se klassieke formule vir ’n Koue Oorlog-spioenasieriller te danke aan betroubaar uitstekende werk deur Steven en Tom.”

John Beifuss van commercialappeal.com gee dit drie en ’n half sterre. “Dié fliek is slim en aangrypend en gemotiveer deur vertroue in Amerika se basiese ordentlikheid. Die rolprent se inherente kritiek van die huidige konserwatiewe politieke klimaat word aangebied uit die oogpunt van ’n patriot, nie ’n sinikus nie.”

Nog ’n fliek gegrond op ware maar aansienlik vroliker gebeure, is A Walk in the Woods (10-12OTS). Robert Redford (Butch Cassidy and the Sundance Kid) speel die skrywer Bill Bryson, wat ná twee dekades in Engeland na Amerika terugkeer en besluit om die uitdagende Appalachiese staproete aan te durf as ’n manier om weer in voeling te kom met sy vaderland. Hy nooi sy ou makker Stephen Katz (Nick Nolte van Cape Fear) saam, maar gaan diée twee onfikse mans in hul 70’s die roete kan baasraak?

Die meeste resensente is nie vreeslik opgemaak met dié rolprent nie. Die webtuiste Metacritic, wat op dieselfde grondslag as Rotten Tomatoes werk, gee dit 51 uit 100. By laasgenoemde kry dit 46 persent en die konsensus is: “Die fliek is innemend maar minder boeiend as wat enige rolprent met Robert en Nick behoort te wees. A Walk in the Woods is eindelik net te ordinêr.”

Die gesiene Britse kritikus Mark Kermode gee die film drie sterre op theguardian.com. “Die fliek vereis nie veel van die kyker nie. Daar is ’n paar lekkerlagoomblikke, maar al wat diepte het, is die natuurskoon.”

Die Christelike drama War Room (O) is vervaardig deur die broers Alex en Stephen Kendrick, wat ook vir Courageous (2011) en Fireproof (2008) verantwoordelik is.

Die paartjie Tony (T.C. Stallings) en Elizabeth Jordan (Priscilla C. Shirer) lyk dalk op die oog af asof hulle die perfekte lewe het, maar hul huwelik wankel weens geldprobleme en Tony se dwalende oog. Toe Elizabeth, ’n eiendomsagent, die huis van ’n bejaarde dame, Miss Clara (Karen Abercrombie), verkoop, raak hulle bevriend en Miss Clara begin Elizabeth die krag van gebed leer.

Die meeste resensente is nie juis beïndruk met die fliek nie. Rotten Tomatoes het nog nie genoeg resensies bymekaargemaak om konsensus te bereik nie, maar tot dusver gee hulle die rolprent 37 persent gegrond op 30 resensies.

Joe McGovern van die Amerikaanse tydskrif Entertainment Weekly gee dit ’n B- en is bly War Room “is nie nog ’n vervelige Sondagskoolpreek nie. Die vervaardigers is slim genoeg om die rolverdeling te diversifiseer en dis verfrissend om vrouebemagtiging as een van die hooftemas te sien.”

As jy gruwelflieks geniet, kan jy dalk Scouts Guide to the Zombie Apocalypse (16TGNGr) beproef. Soos die meeste zombie-flieks handel dit oor ’n groepie oorlewendes – in dié geval drie tienderjarige Boy Scouts – wat die gereg in eie hande neem toe zombies hulle dorp bedreig.

Die meeste kritici dink die fliek is laf. Metacritic gee dit 32 uit 100 en by Rotten Tomatoes kry dit 36 persent. Hulle bevind: “Scouts Guide to the Zombie Apocalypse doen nie gestand aan die prikkelend eksentrieke titel nie, en bied net nog ’n zombie-komedieriller met flou seksgrappies.”

Tom Huddleston van Time Out London gee dit een ster en beskryf dit as “ ’n aanstootlike en onsnaakse toevoeging tot die komedie-zombie-genre; bly liewer tuis met jou Shaun of the Dead (2004) DVD. Dié fliek bevat lui, gewelddadige vrouehaat wat moeilik is om te verduur. Alvrou wat nie ’n manhatende feeks of ’n dom flerrie is nie, is ’n ontkleedanseres in ’n sjoebroekie. Net ’n uiters onvolwasse 11-jarige seun sal dalk dié fliek se kru humor waardeer.”

Sandra Visser

Kaapstad – ’n Sewejarige seun is gelukkig om nog te kan sien nadat vuurwerk by ’n park in Delft in sy gesig ontplof het.

Jahmeil Galant en ’n familielid (ook 7) het saamgespeel toe ’n ouer kind vuurwerk in sy rigting gooi, het sy ma, Sharlene Galant, Donderdag aan News24 gesê.

“Hy het nader gestap om dit te bekyk en dit opgetel. Dit het toe begin tol en ontplof. My seun is doof en het nie besef wat gebeur het nie. Ek was met afgryse vervul toe die kinders hom huis toe bring en ek sy bloedbesmeerde gesig sien. Hy kon nie sy oë oopmaak nie.”

Sy het met Jahmeil dokter toe gejaag en dié het haar na die Tygerberg-hospitaal verwys. “Terwyl ons daar gesit het, het nog kinders weens vuurwerkbeserings vir behandeling opgedaag. Een meisie het haar vingerpunte verloor omdat ’n klapper in haar hand ontplof het.

“Ons is gelukkig dat hy nie sy oë verloor het nie”

“Ek het net gebid dat my kind nie sy sig moet verloor nie. Ons het deurnag daar gesit; die spesialis het hom die volgende oggend gesien. Toe sy hom ontslaan, het sy vir my gesê ons is gelukkig dat hy nie sy oë verloor het nie.”

Sharlene sê sy het nog nooit vir haar kind vuurwerke gekoop nie. “Dis gevaarlik. Ek sien nie die punt daarvan nie. Al wat dit doen, is om mense te traumatiseer en honde bang te maak. Sedert ons van die hospitaal teruggekeer het, speel my kind nie meer buite nie. Hy is baie getraumatiseer. Ek hoop mense besef watter skade hierdie goed kan aanrig en dat hulle twee keer sal dink voor hulle dit koop.”

Intussen het die Stad Kaapstad gewaarsku niemand onder 16 jaar mag vuurwerke afvuur nie.

Die Kaap die Goeie Hoop-Dierebeskermingsvereniging het ook gevra vir ’n “vuurwerkvrye jaar” en gesê Guy Fawkes-vierings “veroorsaak meer as net een aand se foltering – vir talle verlore en beseerde diere lei dit tot weke se lyding”.

Bron News24

Vrydag

Exodus: Gods & Kings
M-Net 09:15
Ons almal ken die Bybelstorie waarin Moses die Israeliete bevry het van Egiptiese oorheersing, maar nou kry ons dit te sien in hierdie epiese fliek. En wie beter om die hoofrol te vertolk as Batman self, Christian Bale?

Dark Tide
Mzansi Magic 22:00
Skuif opsy, Jaws . . . daar is ’n nuwe haai in die water. En hierdie keer is hy agter Halle Berry se bloed aan terwyl sy die rol van ’n haaiduik-toeroperateur vertolk wat deur ’n klomp geld terug water toe gelok word. O, en dit is in Kaapstad verfilm; dus kry ons ons eie haaie te sien.

City of Violence
M-Net 22:30
Twee polisiemanne ondersoek die moord op ’n vrou en hoe sy verbind word met ’n nuwe dwelmmiddel wat beskikbaar is, asook die verdwyning van straatkinders. Het ons genoem dat dit in Kaapstad verfilm is? En dat Forest Whitaker en Orlando Bloom daarin speel?

Saterdag

Back to the Future
SABC2 16:00
Die verwaande tiener Marty McFly kry die kans van sy lewe. Sy vriend Doc het ’n tydmasjien gebou en stuur Marty terug na die 1950’s waar hy dit op die een of ander manier regkry om sy toekomstige ma en pa se verhouding te beduiwel voor hulle kan trou. O gaats . . .

The Lion King
SABC3 19:30
Kan jy glo dat hierdie fliek is al 21 jaar oud? Kyk hoe die bose Uncle Scar sy kleinneef Simba oortuig dat dit sy skuld is dat sy pa dood is. Wat Scar nie besef nie, is dat Simba maats het wat hom die grootste leeukoning gaan help word.

You Don’t Mess With The Zohan
e.tv 21:40
Israel se topsoldaat wil nie meer mense doodmaak nie. Hy wil liewer New York toe trek . . . en die wêreld se beste haarkapper word. Net Adam Sandler kan so iets regkry.

Sondag

D2: The Mighty Ducks
SABC3 14:30
Die dolle yshokkietieners en hul afrigter is terug vir nog ysige aksie. Hierdie keer pak hulle die buitelanders in ʼn wêreldjeugtoernooi in Kalifornië van alle plekke, met sy volop sonskyn, branderplankryery en heeljaar se lieflike weer.

The Hangover Part 2
e.tv 20:00
Jy sou dink dat hulle hul les geleer het in die eerste fliek, maar nee! Hierdie keer is die spannetjie in Thailand vir die ramparty en dit wil voorkom dat wat in Vegas gebeur, nie altyd daar bly nie, want hulle voer hul wilde nag tot nuwe uiterstes.

The Interview
M-Net 20:05
Die verslaggewer van ’n poniekoerant en ’n kollega word na Noord-Korea genooi om die eerste onderhoud met die land se diktator te voer. Hoekom? Want hy is versot op hul gekke program. Min weet dié stommerik die CIA het sy twee gaste gehuur om hom om die lewe te bring.

Khloé Kardashian se ma, Kris Jenner, was meer bekommerd oor haar dogter se kleredrag as die aanklag van motordiefstal toe sy net 15 jaar oud was.

Die werklikheidster bewandel weliswaar deesdae die smal weg, maar sy het met die jare meermale met die gereg gebots. Sy is in 2007 in hegtenis geneem weens dronkbestuur, maar haar probleme het lank tevore al begin. Die 31-jarige ster onthul nou sommige van die dinge wat sy tydens haar tienerjare aangevang het.

“Ek is aangekeer omdat ek my ma se motor gesteel het,” het sy gesê tydens ’n vraag-en-antwoordsessie met haar beste vriendin, Malika Hagg. Dis op Khloé se webtuiste geplaas.

‘Ek skaam my so vir jou”

“Ek is afgetrek. Ek was 15, en ek was agter die stuur van my ma se Range Rover, wat ek gesteel het om by ’n ouer seun te gaan kuier; dus is ek in hegtenis geneem en in die tronk gestop.

“Hulle het my ma gebel en ek onthou dat my ma, toe sy my kom oplaai, iets gesê het soos: ‘Ek skaam my so vir jou, en kyk na hierdie klere, wat op aarde het jy aan!’”

Dit was ook nie al voertuigverwante gebeurtenis waarby Khloé in haar jeugjare betrokke was nie; op ’n ander keer het sy Kris se motor bestuur en toe slaan dit aan die brand, wat nogal ’n paar probleme veroorsaak het.

Sy hou vol sy het die Range Rover “geleen” om ’n kêrel te beïndruk, maar toe die skoonmaakdiens dit gaan haal, was dit aan die brand.

“Dit sal moontlik nie beskou kan word as jou slegste afspraak nie; dit was een van jou slegste maande,” het Malika gelag.

“Ek kan nie glo ons het ons ouers se motors gesteel nie. Ek is veral geskok oor die feit dat ons so lank daarmee weggekom het voor hulle agtergekom het wat aan die gang was.”

Die twee het ook ’n bietjie ernstiger geraak en gesels oor wie die volgende president van Amerika moet wees. Khloé het erken dat, alhoewel sy ’n bewonderaar is van “die Trump-hotel”, sy nie seker is of die flambojante Donald Trump die beste president sal wees nie.

© Cover Media

Slide the City bevorder pret in die buitelug en gemeenskapsamesyn. Hierdie somer sal die 304 m lange glybaan talle plekke in Suid-Afrika besoek sodat gesinne en vriende die somer kan ingly.

Slide the City is ook bedag op waterbehoeftes, veral in droogtegeteisterde gebiede, waar daar kommer is oor waar die water vandaan kom en waarheen dit gaan ná die geleentheid.

“Ons is toegewyd daartoe om geen omgewingsimpak te hê op die gemeenskappe waar ons is nie,” sê die Slide the City-organiseerder Minette Ferreira.

“Ons wil ’n veilige en volhoubare ervaring vir al ons deelnemers skep”

“Ons wil ’n veilige en volhoubare ervaring vir al ons deelnemers skep; dus is een van ons grootste bekommernisse verantwoordelike waterverbruik.”

Daarom is die glybaan ontwerp om water bedags te herwin pleks van nuwe water die glybaan binne te pomp. Die water word behandel op ’n veilige en omgewingsvriendelike wyse met min tot geen lekkasie, en word teruggegee aan die gemeenskap ná die geleentheid; in werklikheid “leen” ons die water.

Die glybaan se water word deur die loop van die dag deur ’n sterk filtrasiesisteem gesit wat dit binne 30 minute suiwer tot die gehalte van drinkwater.

Boonop is die opvangswembad aan die einde van die glybaan nie ’n swembad nie, maar ’n plaspoel wat hoogstens 50 cm diep is. Dit bekamp vermorsing. Dit, sowel as die algehele ontwerp, verminder die uitwerking en waterverbruik.

Hoeveel water word gebruik?
’n Gemiddeld van 35 000 L water word tydens die geleentheid by die munisipaliteit ‘geleen’ en deur die glybaan se sisteem gesirkuleer. Ter vergelyking: die deursnee huishoudelike swembad (5 m x 5 m x 1,5 m diep) bevat 37 500 L water. Slide the City werk saam met munisipale amptenare om behoorlike waterbeheer te verseker.

Waar kom die water vandaan?

1. In Ballito sal die Sugar Rush-plaas se boorgatwater gebruik word.
2. In Kaapstad sal fonteinwater na die geleentheid aangery word.
3. In Johannesburg, Nelspruit, Knysna, Pretoria en Port Elizabeth sal die brandweer water voorsien.

Waarheen gaan die water ná die geleentheid?

1. In Ballito word die water teruggesirkuleer in die Sugar Rush-plaasstelsel.
2. In Kaapstad word die water teruggepomp in watertenks en aan die munisipaliteit geskenk.
3. In Kaapstad, Johannesburg, Nelspruit, Knysna, Pretoria en Port Elizabeth word die water deur die filtrasieproses gesit en dan in houers aan die munisipaliteit gelewer om te gebruik na goeddunke.
4. Die water by die Ballito geleentheid word ook deur hierdie filtrasie proses gesit voordat dit terug in die plaas se waterstelsel geplaas word.

Besoek www.slidethecitysa.co.za vir nog inligting oor Slide the City, insluitend datums en plekke.

Bindi Irwin het die gehoor en beoordelaars met haar dansvernuf in die werklikheidsreeks Dancing with the Stars beïndruk, maar sy is dalk nie geregtig op inkomste wat sy daaruit verdien nie.

Die wyle Crocodile Hunter Steve Irwin se 17-jarige dogter het ’n kontrak as minderjarige met die Amerikaanse ateljee onderteken wat beteken haar ouers moet toestemming gee as sy haar geld wil gebruik, wat tans staan op R3,2 miljoen.

Haar ma, Terri, het dit gedoen, maar nou het ’n regter in Los Angeles die ster verhoed om haar geld te eis sonder bewyse dat haar pa dood is. Steve is in 2006 dood nadat ’n pylstertvis hom gesteek het.

TMZ berig “die hof kon nie beslis dat dit in die minderjarige se beste belange is om deur die bepalings in die kontrak gebind te word nie”.

Die Australiese tiener en haar dansmaat, Derek Hough, het die asem weggeslaan met uitstekende dansvertonings in die reeks, waarvan sy talle aan haar pa opgedra het. Sy het die agtste week van die trefferreeks gehaal en dit lyk nie of sy binnekort uitgestem gaan word nie.

“Ek hoop dat hy trots sou wees,” het die jong natuurbewaarder oor haar pa gesê. “Ek hoop regtig so. Alles wat ek doen, is om hom trots te maak en om seker te maak dat alles waarvoor hy so hard gewerk het, voortleef.”

Bronne: The Mirror, TMZ

Kersfees gaan vanjaar vir Joan Collins en haar familie ’n moeilike tyd wees ná haar suster, Jackie, se skielike dood.

Die romanskrywer het op 19 September op 77-jarige ouderdom haar stryd teen borskanker verloor, en die gedagte aan die vakansietyd is veral vir Joan ’n uitdaging, aangesien sy reeds planne beraam het wat haar suster insluit.

“Sy het my sowat twee weke voor haar dood gebel en gesê sy het dit (kanker), maar sy veg daarteen en kry behandeling,” het Joan onthul in ’n eersdaagse episode van The Jonathan Ross Show, wat Saterdag (7 November) in Brittanje uitgesaai word.

“Ons het beplan om, saam met al ons baie kinders, Hawaii toe te gaan.”

“Alles was in ’n waas gehul”

Joan gee toe dis steeds swaar om oor haar suster se dood te praat, en sy voeg by: “Alles was in ’n waas gehul . . . Ek probeer steeds om dit te verwerk, en wanneer ek oor die hele ding dink, vind ek dit baie moeilik om dit te begryp.

“Die feit dat sy in LA gewoon het en ek die meeste van die tyd in Europa is, beteken dat ek, wanneer ek aan haar dink, net dink: ‘O, sy is in LA; ek gaan haar binnekort sien.’”

Alhoewel Joan steeds oor haar suster se dood treur, probeer die 82-jarige ster van Dynasty alles in haar vermoë om Kersplanne te maak, ten spyte van haar gebroke hart.

Die aktrise sien uit na die tyd saam met familielede, aangesien sy glo dat hul teenwoordigheid haar beter sal laat voel.

“Ons gaan ‘n groot Familiekersfees hê,” het Joan gesê en moedig geglimlag. “Die hele familie kom Londen toe: my broer, Jackie se kinders en kleinkinders, my kinders en kleinkinders.

“Dit gaan massief wees. Daar is baie van ons.

“Hazel, my skoonsuster, sal die kookwerk doen, want sy het ’n yslike groot eetkamer, en dan gaan ek op die 26ste ’n poging aanwend om iets te doen.”

© Cover Media

Woensdagaand, 11 November 2015, se program op kykNET (DStv kanaal 144).

• Ons kuier by die bekende argitek GAWIE FAGAN, wat vanjaar 90 jaar oud word.
• CARINA FRANCK wys die Kalahari se sagter, skoner kant.
• Die mense agter die skerms van die nuwe sepie, SUIDOOSTER, kom kuier op die bank.
• En dan sien ons ook wie is die finaliste van ons Kwêla FEITE EN GEITE en Kwêla FUNNIES-kompetisies.

Dit is een wat jy beslis nie wil misloop nie, en dit alles gebeur Woensdagaand, 11 November 2015, om 20:00 op KWÊLA!

Kwêla-herhalings is as volg:
Donderdae, 14:30
Vrydae, 10:00
Saterdae, 18:00
Sondae, 13:00
Maandae, 08:30

Wat jou sterre vandag voorspel met Joanne Moore

SATERDAG
JOU DAG
Probeer om op kreatiewe en deernisvolle wyses te kommunikeer.

AS JY VANDAG VERJAAR
Jy is op die diereriem se dag van ontdekkings gebore en persoonlike vryheid is vir jou baie belangrik. Jy bly in 2016 met baie passie en doelgerigtheid op jou gekose pad.

SONDAG
JOU DAG
Kalm samewerking is vandag die geheim tot sukses.

AS JY VANDAG VERJAAR
Jou motto vir die volgende 12 maande is die Amerikaanse sangeres Bonnie Raitt, wat Sondag verjaar, se woorde: “Een van die grootste hindernisse in my lewe wat ek moes oorkom, was ek het gedink ek verdien nie om suksesvol te wees nie.”

RAM 21 Mrt.-20 Apr.
Met vier planete in jou sone vir gesondheid en fiksheid, kan jy die hardloopskoene uitskud en fisieke oefening in die gim of buite inkry. Pas jou dieet aan om meer voedsame maaltye in te sluit.

BUL 21 Apr.-21 Mei
Daar is die naweek baie kreatiwiteit en deernis terwyl jy groot droom of begin om ’n nuwe, ambisieuse doelwit na te jaag. Bestee kwaliteittyd saam met ’n geliefde of gunsteling-vierpootvriend!

TWEELING 22 Mei-21 Jun.
Probeer om dié naweek ’n baie spesiale persoon – jy – te koester. Ignoreer mooiweersvriende en omring jouself met positiewe mense wat jou selfvertroue vermeerder.

KREEF 22 Jun.-23 Jul.
Duidelike kommunikasie is die sleutel tot ’n positiewe, produktiewe naweek. As jy nou al ’n ruk lank ’n gesondheidsprobleem het, is dit dalk tyd om ekstra deeglik te wees en ’n tweede mening te kry.

LEEU 24 Jul.-23 Aug.
Leeus hou daarvan om in die kollig te wees. Jy is mal daaroor om al die aandag te krky, maar dit is tyd om ’n geliefde ook hul plekkie in die son te gun. Staan ’n rukkie opsy en kyk hoe hulle skitter.

MAAGD 24 Aug.-23 Sep.
Die gonswoord die naweek is kommunikasie. Die omstandighede is gunstig vir lang gesprekke. Jy dra jou mening aan ander oor en kry belangrike terugvoering.

WEEGSKAAL 24 Sep.-23 Okt.
Saterdag is ’n goeie tyd om stil te wees en te fokus op wat jy voel. Dis die ideale tyd vir joga, meditasie en oordenking. Sondag is weer wonderlik om te kuier, dinge te deel en sake af te handel.

SKERPIOEN 24 Okt.-22 Nov.
Met die son in jou teken is jou motto vir die oomblik die Kanadese sanglegende Joni Mitchell, wat Saterdag verjaar, se liriek: “Ek wil pret hê, ek wil skyn soos die son.”

BOOGSKUTTER 23 Nov.-21 Des.
Jy is in die kollig en dra jou boodskap hard en duidelik oor. Die fokus is ook op studie en opleiding. Maak dus seker jy gee jou breinselle oefening en leer iets nuuts.

STEENBOK 22 Des.-20 Jan.
Is jy ’n Steenbok wat kritiseer en ander probeer beheer? Jy sal die naweek beloon word as jy deernisvol met familie, vriende en kollegas praat.

WATERDRAER 21 Jan.-19 Feb.
Die omstandighede is die naweek gunstig vir opleiding, studie, reis en avontuur en jy oefen jou verstand en liggaam behoorlik. Probeer om ekstra deernisvol teenoor ’n gesinslid te wees.

VIS 20 Feb.-20 Mrt.
Dis ’n wonderlike tyd om jou geldgeletterdheid te verbeter deur te lees of nuwe vaardighede by ’n kundige te leer. Hoe meer gedissiplineerd en gefokus jy is, hoe beter sal jou toekoms wees wat geld betref.

Meeste families stuur blomme of verras hul geliefdes met ontbyt in die bed, maar die Kardashians doen natuurlik dinge op hul eie unieke manier.

Vir die matriarg Kris se 60ste verjaarsdag het die dames in die beroemde familie ’n musiekvideo gemaak met van hul ma se beroemde vriende.

Die video is ’n bygewerkte weergawe van die een wat Kris vir haar eie 30ste verjaardag gemaak het en Kim, Kourtney, Khloé, Kendall en Kylie wys gesig daarin. Haar vier kleinkinders, asook Kanye West, Justin Bieber, Kris se eks, Caitlyn Jenner in ’n bad, en selfs Katy Perry maak ’n verskyning en verklaar: “Wie gee ’n hel om hoe oud jy is, want jy sal altyd jonk wees in my oë.”

En soos met baie dinge wat dié gesin aanvang, was daar gemengde reaksie op die video.

Sommige het gesê dis te oordadig, terwyl ander meen hulle sou hulle doodskaam daarvoor. Kyk hier na die video en besluit maar self:

Toe haar toekomstige man haar enkele dae voor hul troue los, het Quinn Duane (27) besluit haar luukse onthaal, wat haar familie sowat ’n halfmiljoen rand uit die sak gejaag het, gaan beslis nie vermors word nie.

Quinn se ma, Kari, het met die blink pan na vore gekom om die hawelose mense in haar tuisdorp Sacramento in die Amerikaanse deelstaat Kalifornië, uit te nooi om te kom deel in die fees.

“Toe ek uitvind dat die troue nie meer gaan plaasvind nie, het dit net natuurlik gevoel dat hierdie iets is waardeur ons kon teruggee (aan die gemeenskap),” het Kari gesê.

Baie van die gaste by die buitensporige feesmaal was van ’n plaaslike nagskuiling. In gevalle het die hele familie, insluitend die grootouers, ouers en kinders – tot baba’s – opgedaag.

Die kos was van ’n plaaslike vierster-hotel afkomstig en het salm, steak sowel as versnaperinge ingesluit.

Rashad Abdullah, wat die geleentheid saam met sy vrou en vyf kinders bygewoon het, vertel die maaltyd was ’n seëning.

“As jy deur moeilike tye gaan en sukkel, is dit ’n seëning om uit te gaan en iets anders saam met jou familie te doen,” het hy bygevoeg.

Die kos was van ’n plaaslike vierster-hotel afkomstig en het salm, steak sowel as versnaperinge ingesluit.

Quinn het egter nie haar eie onthaal bygewoon nie. Sy was besig om alles gereed te kry om op haar wittebrood na Belize te vertrek.

Sy het dié reis saam haar ma aangepak en die twee het glo “hope pret” gehad.

Hoewel Quinn volhou sy is heel rustig na haar toekomstige bruidegom, Landon Borup, haar gelos het, rep sy geen woord oor wat tussen hulle skeefgeloop het nie.

Sy word wel wyd geprys vir haar onbaatsugtige gebaar om nie die kos van haar eens blye dag te vermors nie.

Bronne: Daily Mail; Buzzfeed

Verhoudingsdeskundiges raai paartjies aan om ’n seksrooster op te stel om te keer dat katelkaskenades net nog ’n item op hul oorvol lys van huishoudelike take word.

Die meeste liefdesverhoudings se paadjies is soms besaai met dorings wanneer een of beide van die paartjie kla hulle is eenvoudig te moeg, besig, gestres of net nie lus is vir intimiteit met hul ander helfte nie.

Dit klink nou wel ietwat onnatuurlik om seks haarfyn te beplan, tog beklemtoon deskundiges op daardie gebied dat die instel van sperlyne in der waarheid ’n verhouding kan red.

Volgens Tracey Cox, ’n seksdeskundige, voel paartjies selde op dieselfde oomblik amoreus. Dit is te wyte aan botsende roosters en verpligtinge. Sy stel voor dat die twee gaan sit en ooreenkom oor ’n tyd om weer met mekaar te intiem te wees. Tracey lê veral klem op die belangrikheid van ’n deeglike bespreking vooraf.

“Sit ’n ‘ons-tydjie’ opsy en hou daarby.”

“Sit ’n ‘ons-tydjie’ opsy en hou daarby,” het Tracey aan MailOnline gesê.

“Dit werk egter nie as jy nie beplan wat jy in daardie tydjie gaan doen nie – anders word seks net nog ’n taak op jou lys van take wat afgehandel moet word.

“As julle beurte neem om iets buitengewoon te beplan – soos om eers saam te bad en dan iets nuuts en opwindends te beproef, soos saam na ’n erotiese fliek te kyk – kan dit goed werk.”

Lucy Jones, die seks-en-verhoudingskundige by toyboywarehouse.com, sê julle moet ’n tyd vind wat albei pas, ten einde maksimum bevrediging te vind.

“Vind uit wat werk vir jou”

“Ek het ’n vriendin wat altyd seks het met haar man net ná hulle na die gereelde episode van hul geliefkoosde televisiedrama gekyk het. Vind uit wat werk vir jou!” was Lucy se raad.

Die beplanning van gereelde aande uit kan ook bietjie woema terugsit in ’n tanende huwelik. Nixala Watson, stigter en redakteur van die blog Sex & London City, raai paartjies met kinders aan om so dikwels moontlik ’n babawagter te huur en dan te gaan uiteet.

Ander wenke sluit in: verkeer seksueel voordat jy werk toe gaan as jy of jou maat dikwels te moeg is ná ’n lang dag op kantoor. Jy kan ook voorstel dat julle ’n dag verlof neem, in die bed ontspan en erotiese tyd saam deur te bring.

As jy nie geneë voel nie, maar jou maat wel, raai Tracey julle aan om dinge ’n kans te gee en ’n soen-en-drukkiesessie te hê voor julle besluit of julle verder wil gaan of nie.

As enigiemand verveeld is met seks net in die slaapkamer, hoekom nie ander plekke uittoets nie? Baie mense is maar te gewillig om op die bed neer te val en te slaap nadat hulle hul tande geborsel het. Verander dus van omgewing en laat die temperatuur elders styg.

“Sodra my vriendin se tweeling veilig aan die slaap is in hul bedjies, laat waai die paartjie,” verduidelik Nixala. “Hulle het die hele huis tot hul beskikking … as jy verstaan at ek bedoel.”

© Cover Media

Hy’t nog altyd gedroom van ’n spogtroue, maar die terminaalsiek man wou nie ’n hartseer weduwee agterlaat nie.

En toe besluit die onbekende man van China om met ’n lewensgrootte opblaaspop te trou.

“Hy het besluit om met ’n pop in plaas van ’n regte mens te trou sodat niemand se gevoelens moet seerkry nie,” het ’n bron aan CCTV vertel.

En die opblaaspop is op haar groot dag nes enige ander bruid behoorlik bederf, sy’t selfs ’n grimeerkunstenaar en ’n pragtige trourok gehad. In die troufoto’s staar die 28-jarige man liefdevol in sy “bruid” se oë en in nog een gee die twee vir mekaar ’n drukkie voor ’n spieël.

Dis nie die eerste keer dat ’n terminaalsiek persoon by ’n pop troos vind nie. In Mei het ’n man, ook van China, ’n lewensgrootte pop gekoop om die dogter wat hy nooit gehad het nie se rol in sy lewe te vervul.

Bronne: mirror.co.uk, telegraph.co.uk