Koekedoor Episode 4: Pinkies in die lug!

Deur Mari-Louis Guy

As tiener was ek obsessief oor die doen en late van die Monaco-koninklikes, die Grimaldi’s. Dit blyk toe ons skoolhoof was ewe betotteld want met prinses Grace se afsterwe moes ons ’n minuut van stilte by die skool handhaaf. Verskriklik vreemd as jy dink hoeveel myle ver ons Weskusdorpie van die glans van Monte Carlo af was . . .

Die tema van ons huishoudkunde-taak in standerd 9 (vandag gr. 11) was “high tea”. Daarvoor stel ek myself toe aan as die burgemeester van Vredendal en in my amptelike hoedanigheid nooi ek vir prinses Caroline as my gas.

My ma wou gewoonlik nie met ons take help nie (die werk moes mos ons eie wees), maar kyk, as jou dogter koninklikes onthaal moet jy darem uithaal en wys. So gaan oortuig sy toe die regte egte burgemeester om sy ketting vir my te leen om op my tafel te gebruik. Die res van die tafel is met Royal Blue en ma se fynste teegerei gedek. Die grootste deel van die spyskaart is lankal vergete, maar ek onthou ek was baie trots op my perfekte éclairs waaraan ek weke lank geoefen het.

Só eg Frans, só oe-lala.

En so kom ons dan by vandeesweek se teepartytjie-gebak. Soos Elizabeth Cloete, my mede-beoordelaar, sê, regte pinkie-in-die-lug-tyd.

Die tuisgebak-ronde het heerlike rolkoeke opgelewer van sjokolade, haselneut, suurlemoen en tradisionele vanielje met interessante vulsels soos fyngekapte groenvyekonfyt en moerbeiroom.

Elizabeth het die deelnemers behoorlik getoets met haar moderne weergawe van ’n flan en die pronkgebak was die Franse juweeltjies petits fours.

Dit was ’n absolute hoogtepunt om Martjie Malan dop te hou terwyl sy flink die een ná die ander perfekte happie skep en sy was dan ook die welverdiende wenner van hierdie rondte.

• 1
• 2

« »

Hier is wat Martjie oor dié episode te sê gehad het:

“Fyn werk en detail-versiering is vir my die lekkerste gebak. Die eerste uitdaging – die rolkoek – was ’n besonderse ervaring, veral omdat ek dit vir die eerste keer op die program gedoen het. Die randkoekies was ook baie interessant en dit was ’n goeie tydtoets.

"Ek was onseker daaroor en het nie presies geweet hoe die eindproduk moes lyk nie. Dan natuurlik die petits fours, my groot liefde. Ek het die uitdaging baie geniet en dit was wonderlik om iets te kon voorsit wat vir my spesiaal en suksesvol was.”

Ek het ook met Caroli, die ongelukkige kombuis-verlater van die episode, gesels:

“Ná die vorige episode het ek besef ek moet al die moontlike doen om die beoordelaars te beïndruk! Ek was tevrede met die voorkoms en smaak van my rolkoek, maar ek het saamgestem met die beoordelaars dat die tekstuur te grof was.

"Die fyngebak-deel van die uitdaging het heeltemal die mat onder my uitgeruk! Ek het nie ’n idee gehad hoe die sponskoekies moes lyk nie en het ’n klomp verkeerde besluite ná mekaar geneem en swak beplan! Dit was baie sleg om te weet ek is nou in gevaar . . . op die laaste minuut was daar net te veel goed wat ek nog moes doen en my mousse het nie gestol nie!

"Ná hierdie groot flop het ek DIEP asemgehaal om my moed te gee vir die pronkgebak-afdeling. Dit was die eerste keer dat ek petits fours gemaak het, maar ek het darem geweet hoe dit behoort te lyk. Ek was tevrede met my poging en het gevoel ek het alles in my vermoë gedoen om my in die kompetisie te hou, maar ongelukkig was dit nie genoeg nie . . .

"Dit was 'n ongelooflike leerervaring en ek is so bly oor alles wat ek nou leer maak het!"

Mari-Louis Guy is ‘n beoordelaar van kykNET se Koekedoor-werklikheidsreeks, professionele kosstilleerder en resepontwikkelaar. Sy gaan gereeld vir Huisgenoot.com blog oor Koekedoor en so ‘n kykie agter die skerms gee.nner