Petrus van Zyl, Oscar Pistorius se bestuurder, het ’n lys beurse, handelsmerke, liefdadigheidsorganisasies en minstens een beroemde tennisspeler genoem met wie die atleet betrokke was.
Vonnisverrigtinge vir Oscar Pistorius het Maandag ná middagete in die hooggeregshof in Pretoria voortgegaan; die Paralimpiese atleet se bestuurder het getuig oor sy liefdadigheidswerk.
Petrus van Zyl, onder leiding van Barry Roux, vir Oscar, het ’n lys beurse, handelsmerke, liefdadigheidsorganisasies en minstens een beroemde tennisspeler genoem met wie Oscar betrokke was.
Foto’s saam met weeskinders, werk vir Unicef in Tanzanië vir bewustheid oor malaria en ’n verskyning by die bekendstelling van die beroepstennisspeler Novak Djokovic se stigting in 2012 is onder die prestasies wat Petrus genoem het.
Petrus het ook onthul dat Oscar beplan het om in 2017 uit atletiek te tree.
Op 12 September is Oscar skuldig bevind aan die strafbare manslag van sy meisie, die model en regsgeleerde Reeva Steenkamp, maar nie van haar moord nie.
Regt. Thokozile Masipa het hom skuldig bevind van die afvuur van ’n vuurwapen in die openbaar. Hy het sy vriend Darren Fresco se Glock-pistool in Januarie verlede jaar by die restaurant Tasha’s in Melrose Arch, Johannesburg, afgevuur.
Oscar het beweer hy het gedink daar is ’n inbreker in sy toilet toe hy op Valentynsdag verlede jaar vier skote deur die deur afvuur en Reeva doodskiet. Die staat voer aan hy het haar tydens ’n rusie doodgeskiet.
Oscar is onskuldig bevind aan twee vuurwapen-verwante klagte – die onwettige besit van ammunisie en die afvuur van ’n vuurwapen deur die oop sondak van ’n motor op 30 September 2012 toe hy saam met vriende in Modderfontein was.
- Sapa