Suzuki het die Swift-reeks uitgebrei met die toevoeging van ’n nuwe sedanweergawe. Die nuwe vierdeursedan staan bekend as die DZire en bied meer ruimte as die luikrug-weergawe – die bagasiebak beslaan 300 L.
Die nuweling het ’n 1,2 L-petrolenjin en is beskikbaar met ’n keuse van ’n outomatiese of handratkas.
Dié nuwe kragbron behaal ’n maksimum-kragsyfer van 63 kW by 6 000 r/min, met ’n gepaardgaande wringkragpiek van 113 Nm by 4 500 r/min.
Brandstofverbruik vir die handrat-weergawe is 5,7 L/100 km, terwyl die outomatiese model 6,3 L/100 km lewer.
Die nuwe Suzuki Swift DZire word met ’n keuse van twee spesifikasievlakke gebied: die GA-intreevlakmodel, en die meer volledig toegeruste GL-weergawe.
Die GA is gemik op waardebewuste kopers met ’n beperkte begroting, terwyl die GL ’n langer lys van weelde- en geriefkenmerke bied.
Standaardkenmerke vir die GA-model sluit onder meer in kragstuur, lugversorging, vier luidsprekers wat maklik aan ’n opsionele klankstelsel gekoppel kan word en twee lugsakke voor.
Die luukser GL-model het misligte voor, elektries verstelbare kantspieëls, elektriese vensters, ’n klankstelsel, kontroles op die stuurwiel en afstandbeheerde sentrale sluiting met sleutellose toegang. Die GL het ook twee lugsakke voor, maar word bykomend met ABS-remme toegerus.
Albei modelle het ’n diensplan van twee jaar of 30 000 km en ’n waarborg van drie jaar of 100 000 km.
Pryse:
- DZire 1,2 GA R128 900
- DZire 1,2 GL R138 900
- DZire 1,2 GL Auto R153 900
